ပြည်ထောင်စုရွေးကောက်ပွဲကော်မရှင် (UEC) သို့ နိုင်ငံရေးပါတီ တည်ထောင်ခွင့်နှင့် မှတ်ပုံတင်ခွင့် လာရောက်လျှောက်ထား သည့်ပါတီများအနက် နိုင်ငံရေးပါတီနှစ်ပါတီ၏ ပါတီအမည်၊ အလံ၊ တံဆိပ်တို့နှင့်ပတ်သက်၍ ခုနစ်ရက်အတွင်း ကန့်ကွက်နိုင်ကြောင်း ပြည်ထောင်စုရွေးကောက်ပွဲကော်မရှင် (UEC) က ကြေညာခဲ့သည်။
UEC က ကြေညာခဲ့သည့် ပါတီနှစ်ပါတီမှာ ရှမ်းနီ (တိုင်းလျန်) သွေးစည်းညီညွတ်ရေးပါတီ (S.S.P) နှင့် လူထုပါတီ (The Party of People) တို့ဖြစ်သည်။
ယင်းပါတီများ၏ ပါတီအမည် ၊ အလံ၊ တံဆိပ်တို့နှင့်ပတ်သက်၍ ကန့်ကွက်လိုပါက ကြေညာချက်ထုတ်ပြန်သည့်နေ့မှစပြီး ခုနစ်ရက်အတွင်း ခိုင်လုံသည့်အထောက်အထားများနှင့် ပြည်ထောင်စုရွေးကောက်ပွဲကော်မရှင်ထံတွင် ကန့်ကွက်နိုင်ကြောင်း နိုင်ငံရေးပါတီများ မှတ်ပုံတင်ခြင်းနည်းဥပဒေ ၁၄ (ဃ) အရ UEC က ကြေညာထားခြင်း ဖြစ်သည်။
ရှမ်းနီ (တိုင်းလျန်) သွေးစည်းညီညွတ်ရေးပါတီ (S.S.P) နှင့် လူထုပါတီ (The Party of People) တို့သည် မတ် ၁၃ ရက် နိုင်ငံရေးပါတီများ မှတ်ပုံတင်ခြင်းဥပဒေ ပုဒ်မ ၂၅ အ ရ နိုင်ငံရေးပါတီအဖြစ် ဆက်လက်တည်ထောင်လိုသဖြင့် UEC ထံ ပြန်လည်လျှောက်ထားလာခြင်းဖြစ်ကြောင်း သိရသည်။
ဖေဖော်ဝါရီ ၁ ရက်မှ မတ် ၁၅ ရက်အထိ ပြည်ထောင်စုရွေးကောက်ပွဲကော်မရှင် (UEC) သို့ လာရောက်လျှောက်ထားသည့် ပါတီ ၂၆ ပါတီရှိပြီး ပြည်ထောင်စုတစ်ဝန်းလုံး စည်းရုံးမည့်ပါတီ ခြောက်ပါတီနှင့် တိုင်း (သို့မဟုတ်) ပြည်နယ်တစ်ခုအတွင်း စည်းရုံးမည့်ပါတီ၂၀ ရှိကြောင်း သိရသည်။
မတ် ၁၅ ရက်အထိ နိုင်ငံရေးပါတီများ မှတ်ပုံတင်ခြင်းဥပဒေ ပုဒ်မ ၃ အရ လျှောက်ထားသောပါတီ ခြောက်ပါတီရှိပြီး ပုဒ်မ ၂၅ အရ လျှောက်ထားသော ပါတီ ၂၀ ကြောင်း UEC က ထုတ်ပြန်သည်။
