ဘရာဇီးလ်တိုက်စစ်မှူး နေမာက မိမိအနေဖြင့် ဘောလုံးပရိသတ်များ၊ မီဒီယာများထံမှ ထိုက်တန်သည့် လေးစားမှုကို မရရှိကြောင်း ပြောကြားခဲ့သည်။
အသက် (၂၉)နှစ် အရွယ်ရှိ နေမာသည် ပြီးခဲ့သည့်ကြာသပတေးနေ့က ကစားခဲ့သည့် ၂၀၂၂ ကမ္ဘာ့ဖလား ခြေစစ်ပွဲ(တောင်အမေရိကဇုန်)ပွဲစဉ် ဘရာ ဇီးလ် (၂-၀) ပီရူးပွဲတွင် အသင်းအတွက် တစ်ဂိုးသွင်းနိုင်ခဲ့သလို ဂိုးဖန်တီးမှုတစ်ကြိမ် ပြုလုပ်နိုင်ခဲ့သည်။ ထို့ကြောင့် ဘရာဇီးလ်အသင်းအတွက် နေမာ၏သွင်းဂိုးမှာ ၆၉ ဂိုးအထိ ရှိလာခဲ့ပြီး အသင်းသမိုင်းတွင် ဂိုးသွင်းအများဆုံးအဖြစ် ရပ်တည်နေသည့် ပီလီ (၇၇ ဂိုး)၏စံချိန်ကို လိုက်မီရန် ရှစ်ဂိုးသာလိုတော့သည်။
သို့သော် နေမာအနေဖြင့် ကစားသမားဘဝတစ်လျှောက် ဝေဖန်မှုများနှင့်ရင်ဆိုင်ခဲ့ရသလို လက်ရှိတွင် ၀ိတ်တက်နေသည်ဟုဆိုကာ ပရိသတ်များ၏ ဝေဖန်မှုကို ခံနေရသည်။ ထို့ကြောင့် နေမာက ပီရူးနှင့်ပွဲအပြီး ဘရာဇီးလ်ရုပ်သံ TV Globo နှင့် ပြုလုပ် သည့် အင်တာဗျူးတွင် မိမိအနေဖြင့် ထိုက်တန်သည့်လေးစားမှုမရခဲ့ကြောင်း ပြောကြားခဲ့ခြင်းဖြစ်သည်။
နေမာက "အသင်း နိုင်ပွဲ ရတာက ပိုအရေးကြီးပါတယ်။ ကျွန်တော့်အနေနဲ့ ဒီအတိုင်း ခြေစွမ်းပြနိုင်မယ်ဆိုရင် ပီလီရဲ့ဂိုးသွင်းစံချိန်ကို ချိုးဖျက်နိုင်မယ်လို့ မျှော်လင့်ပါတယ်။ ဒါပေမဲ့ လူတွေရဲ့ လေးစား မှုကိုခံရအောင် ဘာတွေလုပ်ရမယ်ဆိုတာကို ကျွန်တော် မသိပါဘူး။ အထူးသဖြင့် မီဒီယာတွေနဲ့ ပရိသတ်တွေရဲ့ ဝေဖန်မှုကို အမြဲခံနေရပါတယ်။ ဒါကြောင့် တစ်ခါတလေ အင်တာဗျူးတောင် မလုပ်ချင်ပါဘူး" ဟု ဆိုသည်။
