နယ်သာလန်နာမည်ကျော်တိုက်စစ်မှူးဟောင်း ဗန်ပါစီက PSG အသင်း၏ ပြင်သစ်တိုက်စစ်မှူး ဘာပေအား နေမာနှင့် လီဝန်ဒေါစကီးတို့ထက် ပိုကြိုက်သည်ဟု ပြောကြားခဲ့သည်။
ချန်ပီယံလိဂ်ဗိုလ်လုပွဲတွင် ဘာပေနှင့် နေမာတို့၏ PSG အသင်းသည် လီဝန်ဒေါစကီး၏ ဘိုင်ယန်မြူးနစ်အသင်းနှင့် တွေ့ဆုံနေပြီး ဗန်ပါစီက နာမည်ကျော်တိုက်စစ်မှူး (၃)ဦးထဲတွင် ၎င်းအကြိုက်ဆုံးကစားသမားကို ရွေးချယ်ခဲ့ခြင်းဖြစ်သည်။
ဗန်ပါစီက "လီဝန်ဒေါစကီးက လွန်ခဲ့တဲ့ (၈)နှစ်လောက်ကတည်းက ကမ္ဘာ့အကောင်းဆုံးစာရင်းဝင်ဖြစ်ပြီး နေမာကလည်း အရမ်းဆွဲဆောင်မှုရှိတဲ့ကစားသမားပါ။ ဒါပေမဲ့ ဘာပေကို ကျွန်တော် ပိုကြိုက်ပါတယ်။ သူက လိမ်ချင်လား၊ လူပေးချင်လား၊ ကန်ချင်လား၊ ဖန်တီးချင်လား သူကြိုက်တာလုပ်လို့ရတဲ့ ကျွမ်းကျင်မှုနဲ့ အမြန်နှုန်းကို ပိုင်ဆိုင်ထားသူပါ။ ကျွန်တော့်အတွက်တော့ သူက အကောင်းဆုံးပါပဲ"ဟု ဆိုခဲ့သည်။
အသက် (၂၁)နှစ်အရွယ်ရှိ ပြင်သစ်တိုက်စစ်မှူး ဘာပေသည် ယခုရာသီတွင် PSG အတွက် ပြိုင်ပွဲစုံ (၃၆)ပွဲတွင် ဂိုး (၃၀) သွင်းယူထားသည်။
PSG နှင့် ဘိုင်ယန်မြူးနစ်အသင်း ထိပ်တိုက်တွေ့ဆုံနေသည့် ချန်ပီယံလိဂ်ဗိုလ်လုပွဲကို သြဂုတ်လ (၂၂)ရက်တွင် ပေါ်တူဂီနိုင်ငံ၊ လစ္စဘွန်းမြို့ရှိ Estádio da Luz ကွင်း၌ ကစားမည်ဖြစ်သည်။
