ရီးယဲလ်မက်ဒရစ်ကွင်းလယ်လူ ဟာမီးစ်ရိုဒရီဂွက်ဇ်သည် ကိုလံဘီယာအသင်း၏ လေ့ကျင့်ရေးအစီအစဉ်တွင် ဒဏ်ရာရရှိခဲ့ကြောင်း သိရသည်။ 

အသက် (၂၈)နှစ်အရွယ်ရှိ ဟာမီးစ်ရိုဒရီဂွက်ဇ်သည် ကြာသပတေးနေ့က ကိုလံဘီယာအသင်း၏ လေ့ကျင့်ရေးအစီအစဉ်တွင် ဘယ်ဘက်ဒူးဒဏ်ရာရရှိခဲ့ခြင်းဖြစ်ပြီး စနေနေ့တွင် ကစားမည့် ပီရူးနှင့် ခြေစမ်းပွဲကို လွဲချော်မည်ဖြစ်ကြောင်း ကိုလံဘီယာအသင်းက ထုတ်ပြန်ခဲ့သည်။ 

ကိုလံဘီယာအသင်း၏ ထုတ်ပြန်ချက်တွင် "ဟာမီးစ်ရိုဒရီဂွက်ဇ်သည် အသင်းလေ့ကျင့်ရေးအစီအစဉ်တွင် ဒဏ်ရာရရှိခဲ့ပြီး လက်ရှိတွင် ဆရာဝန်များက ၎င်းကို စစ်ဆေးမှုများပြုလုပ်နေကြောင်း။ ဟာမီးစ်ရိုဒရီဂွက်ဇ်အနေဖြင့် ပီရူးနှင့်ကစားမည့် ခြေစမ်းပွဲကို လွဲချော်မည်ဖြစ်ကြောင်းနှင့် ဟာမီးစ်ရိုဒရီဂွက်ဇ်၏ ဒဏ်ရာအခြေအနေအသေးစိတ်ကို မကြာမီ ထုတ်ပြန်နိုင်မည်ဟု မျှော်လင့်ကြောင်း" ပါရှိသည်။ 

ကိုလံဘီယာအသင်းသည် လက်ရှိတွင် ရလဒ်ဆိုးများနှင့် ကြုံတွေ့နေရပြီး နောက်ဆုံးကစားခဲ့သည့် (၅)ပွဲစလုံး နိုင်ပွဲပျောက်ဆုံးထားရာ ဟာမီးစ်ရိုဒရီဂွက်ဇ်၏ ဒဏ်ရာ သတင်းမှာ စိတ်ပျက်စရာဖြစ်ခဲ့သည်။ 

ဟာမီးစ်ရိုဒရီဂွက်ဇ်သည် ယခုရာသီတွင် ရီးယဲလ်မက်ဒရစ်အသင်း၌ ပုံမှန်ပွဲထွက်ခွင့်ရရန် ရုန်းကန်နေရပြီး ပြိုင်ပွဲစုံ (၉)ပွဲတွင် (၁)ဂိုးသာ သွင်းယူထားနိုင်သေးသည်။