မန်ယူအသင်းနည်းပြ ဆိုးလ်ရှားက မိမိတို့အနေဖြင့် ယခုရာသီတွင် ပရီးမီးယားလိဂ်ပြိုင်ပွဲ၌ ဗိုလ်စွဲရန် မဖြစ်နိုင်တော့သော်လည်း ဖလားပြိုင်ပွဲများတွင် ချန်ပီယံဆုများ ရယူနိုင်ရန် ကြိုးစားသွားမည်ဖြစ်ကြောင်း ပြောကြားခဲ့သည်။ 

မန်ယူအသင်းသည် ယခုရာသီ ပရီးမီးယားလိဂ်ပြိုင်ပွဲတွင် ရလဒ်များ ဆိုးရွားနေပြီး ၎င်းတို့၏အမြင့်ဆုံးမျှော်လင့်ချက်မှာ လာမည့် ၂၀၂၀-၂၁ ရာသီတွင် ချန်ပီယံလိဂ်ဝင်ခွင့်ရရေးဖြစ်သည်ဟု ဗြိတိန်မီဒီယာများက သုံးသပ်နေကြသည်။ 

မန်ယူအသင်းသည် ပရီးမီးယားလိဂ်တွင် အခြေအနေဆိုးနေသော်လည်း လိဂ်ဖလား(ကာရာဘောင်ဖလား)တွင် ကွာတားဖိုင်နယ်နှင့် ယူရိုပါလိဂ်ပြိုင်ပွဲတွင် ရှုံးထွက် (၃၂)သင်းအဆင့်များသို့ တက်ရောက်ထားပြီး FA ဖလားပြိုင်ပွဲတွင်လည်း ဝင်ရောက်ယှဉ်ပြိုင်ရမည်ဖြစ်သည်။ 

ဆိုးလ်ရှားက "ပရီးမီးယားလိဂ်ပြိုင်ပွဲမှာတော့ ချန်ပီယံဆုအတွက် ကျွန်တော်တို့ မဖြစ်နိုင်တော့ပါဘူး။ ဇယားထိပ်ပိုင်းက အသင်းတွေနဲ့ ရမှတ်ကွာဟမှု အရမ်းများသွားပါပြီ။ ဒါပေမဲ့ ဖလားပြိုင်ပွဲတွေမှာ ဗိုလ်စွဲနိုင်ရေးအတွက် ကျွန်တော်တို့ လက်လျှော့ချမှာ မဟုတ်ပါဘူး။ ကျွန်တော်တို့အနေနဲ့ ဒီရာသီ ဖလားပြိုင်ပွဲတွေမှာ ချန်ပီယံဆုတွေ ရရှိဖို့အတွက် အစွမ်းကုန်ကြိုးစားသွားမှာပါ"ဟု ပြောကြားခဲ့သည်။ 

မန်ယူအသင်းသည် ယခုရာသီ ပရီးမီးယားလိဂ်ပွဲစဉ် (၁၁) အပြီးတွင် ရမှတ် (၁၃)မှတ်ဖြင့် အဆင့် (၁၀) နေရာ၌ ရပ်တည်နေပြီး အမှတ်ပေးဇယားထိပ်ဆုံးမှ လီဗာပူးလ်အသင်း(၃၁ မှတ်)နှင့် (၁၈)မှတ်အထိ ကွာဟနေသည်။ 

မန်ယူအသင်းနောက်ခံလူဟောင်း ပေါလ်ပါကားကမူ မန်ယူအသင်းအနေဖြင့် ယခုရာသီ ပရီးမီးယားလိဂ်တွင် အဆင့် (၄)အတွင်း ဝင်ရန်ပင် မလွယ်ကူကြောင်းနှင့် မန်ယူအသင်းအနေဖြင့် လာမည့်ရာသီ ချန်ပီယံလိဂ်ပြိုင်ပွဲတွင် ပါဝင်ယှဉ်ပြိုင်ရေးအတွက် ယခုရာသီ ယူရိုပါလိဂ်ပြိုင်ပွဲတွင် ဗိုလ်စွဲအောင် ကြိုးစားသင့်ကြောင်း ပြောကြားခဲ့သည်။