စပိန်အသင်းနည်းပြ ရောဘတ်မော်ရီနိုက မိမိအနေဖြင့် အသင်းခေါင်းဆောင် ရာမို့စ်ကို ပုံမှန်ပွဲထွက်ခွင့်အတွက် အာမခံချက်မပေးနိုင်ကြောင်း သတိပေးပြောဆိုခဲ့သည်။

အသက် (၃၃) နှစ်အရွယ် ၀ါရင့်နောက်ခံလူ ရာမို့စ်သည် ယခုရာသီတွင် ရီးယဲလ်မက်ဒရစ်အသင်း၌ ပုံမှန်ခြေစွမ်းရရန် ရုန်းကန်နေရသူ ဖြစ်သည်။ 

ရောဘတ်မော်ရီနိုက ရာမို့စ်မှာ လူငယ်ကစားသမားများကို ကူညီပေးနိုင်သူဖြစ်သော်လည်း ခြေစွမ်းမပြနိုင်ပါက ပွဲထွက်ကစားခွင့်ရမည်မဟုတ်ကြောင်း ပြောကြားခဲ့သည်။ 

ရောဘတ်မော်ရီနိုက "လူငယ်ကစားသမားတွေအတွက် ရာမို့စ် ရှိနေတာကို ကျွန်တော် ဝမ်းသာပါတယ်။ သူက လူငယ်တွေအတွက် အကူအညီဖြစ်မှာ သေချာပါတယ်။ ကျွန်တော်တို့မှာ ဗဟိုနောက်ခံနေရာအတွက် မျိုးဆက်သစ်တွေ အများကြီး ရှိပြီး ရာမို့စ်နေရာမှာ အစားထိုးနိုင်တဲ့ ကစားသမားတွေလည်း ရှိပါတယ်။ ဒီတော့ ရာမို့စ်အနေနဲ့ ခြေစွမ်းမပြနိုင်ဘူးဆိုရင် စပိန်အသင်းမှာ ပွဲထွက်ခွင့်ရဖို့ ကျွန်တော် အာမမခံနိုင်ပါဘူး။ ရာမို့စ်အနေနဲ့ ပုံမှန်ပွဲထွက်ခွင့်အတွက် အထူးအခွင့်အရေးရမှာ မဟုတ်ဘဲ တခြားကစားသမားတွေနဲ့အတူ တိုက်ပွဲဝင်ရမှာ ဖြစ်ပါတယ်"ဟု ပြောကြားခဲ့သည်။

စပိန်အသင်းသည် ယူရို-၂၀၂၀ ခြေစစ်ပွဲအဖြစ် စက်တင်ဘာ (၅) ရက်တွင် ရိုမေးနီးယားအသင်းနှင့် အဝေးကွင်းပွဲစဉ်၊ စက်တင်ဘာ (၈) ရက်တွင် ဖာရိုးကျွန်းစုများနှင့် အိမ်ကွင်းပွဲစဉ်များကို ယှဉ်ပြိုင်ကစားရမည် ဖြစ်သည်။

စပိန်အသင်းသည် ယူရို-၂၀၂၀ ခြေစစ်ပွဲ အုပ်စု (F) တွင် (၂) ပွဲကစားထားပြီး (၂) ပွဲစလုံး အနိုင်ရကာ အမှတ်ပေးဇယားထိပ်ဆုံးမှ ဦးဆောင်နေသည်။