ယခုနှစ် ဇူလိုင်လအတွင်း ကျပ်သိန်း ၁၂၆၀ ကျော် တန်ဖိုးရှိသည့် မူးယစ်ဆေးဝါးများနှင့် တရားခံ ၃၆ ဦးအား ဖမ်းဆီး အရေးယူထားကြောင်း မန္တလေးတိုင်းဒေသကြီး ရဲတပ်ဖွဲ့မှူးရုံးမှ သတင်းရရှိသည်။
စိတ်ကြွရူးသွပ်ဆေးပြား ၂၄ မှု၊ ၂၂၆၀၄ ပြား၊ တန်ဖိုးကျပ် ၈၁၇၈၀၀၀၀၊ ဘိန်းဖြူ လေးမှု၊ ၀ ဒသမ ၀၀၁၃၅ ကီလို၊ တန်ဖိုးကျပ် ၁၃၅၀၀၀၊ ဘိန်းစိမ်း တစ်မှု ၂၉ ဒသမ ၄၅ ကီလို၊ တန်ဖိုး ကျပ် ၄၄၁၇၅၀၀၀ ရှိကြောင်း သိရသည်။
ဇူလိုင်လအတွင်း မူးယစ်ဆေးဝါးမှုဖြင့် အမျိုးသမီးတစ်ဦး ဖမ်းဆီးရမိမှုမှာ တာဝန်ရှိသူများ သည် ဇူလိုင် ၁၆ ရက် ည ၇နာရီက မူးယစ်သတင်းအရ ပြည်ကြီးတံခွန်မြို့နယ်၊ (စ)ရပ်ကွက်၊ ကျန်စစ်သားလမ်း နှင့် ၅၆ လမ်း ထောင့်တွင် မကြည်ကြည်ညွန့် ၃၇ နှစ်၊ ဈေးရောင်းသူအား ရှာဖွေစစ်ဆေးရာ ယာလက်အတွင်း ကိုင်ထားသည့် လက်ဆွဲကြွပ်ကြွပ်အိတ်အတွင်း အပြာရောင် ပလတ်စတစ်ကပ်ခွာအိတ်ဖြင့် ထည့်ထားသည့် ၈၈/၁ စာတမ်းပါ ပန်းရောင် စိတ်ကြွရူးသွပ်ဆေးပြား ၂၀၀ ပြားစီပါ ငါးထုပ်၊ စုစုပေါင်းဆေးပြား ၁၀၀၀ ပြား၊ အလေးချိန် ၁၀၀ ဂရမ်ကို သိမ်းဆည်း ရမိခဲ့ခြင်းဖြစ်ပြီး ၁၀၅ မိုင် ဂိတ်အနီး နေထိုင်သူဟု သိရသူ အမျိုးသားတစ်ဦးထံမှ ပြန်လည်ရောင်းချရန် ဝယ်ယူခဲ့ခြင်းဖြစ်ကြောင်း သိရသည်။
