ရေဘေးသင့်ပြည်သူများအား လှူဒါန်းရန် ရည်ရွယ်ပြီး ဖူဆယ်ဘောလုံးပြိုင်ပွဲ အား စက်တင်ဘာ ၂၄ ရက်က ရန်ကုန်မြို့၊ သုဝဏ္ဏ ဖူဆယ်ရုံတွင် စတင် ကျင်းပခဲ့သည်။
အဆိုပါပြိုင်ပွဲတွင် YW FC ၊ Music FC ၊ Friends FC နှင့် Movie FC တို့ ပါဝင်ယှဉ်ပြိုင်မည်ဖြစ်ပြီး လေးသင်းပတ်လည်စနစ်ဖြစ်ကြောင်း သိရသည်။
ပထမဆုံးယှဉ်ပြိုင်မှုအနေဖြင့် စက်တင်ဘာ ၂၄ ရက်တွင် အမျိုးသမီးအသင်းဖြစ်သည့် YW FC နှင့် အဆိုတော် ယုန်လေး၊ ရာဝန၊ မင်းသန့် ၊ ရော်ရွက်နှင့် အဆိုတော်များ ပါဝင်သည့် Music FC တို့ ယှဉ်ပြိုင်ကစားခဲ့ပြီး YW FC ၂ ဂိုး - ၆ ဂိုး Music FC ရလဒ်ထွက်ပေါ်ခဲ့ကြောင်း သိရသည်။
ဒုတိယပွဲစဉ်အဖြစ် မာန်ဟိန်း ဦးဆောင်လာသည့် Friends FC နှင့် ပိုင်ဇေရဲထွန်း၊ သူထူးစံ၊ ထွန်းထွန်း၊ မိုးယံဇွန်နှင့် အခြားသရုပ်ဆောင်များ ပါဝင်သည့် Movie FC တို့ ယှဉ်ပြိုင်ကစားခဲ့ပြီး အကြိတ်အနယ်ရှိခဲ့ကာ ပရိသတ်အားပေးမှုများပြားခဲ့သည်။အဆိုပါပွဲတွင် Friends FC မှ ၈ ဂိုး - ၃ ဂိုးMovie FC ရလဒ်ထွက်ပေါ်ခဲ့သည်။
အဆိုပါ ရေဘေးသင့်ပြည်သူများအတွက် ရည်ရွယ်ပြီး ပြုလုပ်ကျင်းပသည့် ရန်ပုံငွေပွဲအား စက်တင်ဘာ ၂၄ ရက်မှ စတင်ကာ စက်တင်ဘာ ၂၇ ရက်အထိ ပြုလုပ်ကျင်းပမည်ဖြစ်ပြီး ရရှိလာသည့် အလှူငွေများအား ရေဘေးသင့်ပြည်သူများထံသို့ လှူဒါန်းမည်ဖြစ်ကြောင်း သိရသည်။
