ရခိုင်ပြည်နယ်ဆိုင်ရာ အကြံပြုချက်များမှ ၂၀၁၂ ခုနှစ်ကတည်းက တည်ရှိခဲ့သော IDP စခန်းကိစ္စရပ်များနှင့် လွတ်လပ်စွာသွားလာခွင့်ဆိုင်ရာ ညှိနှိုင်းဆောင်ရွက်ရေး ဆွေးနွေးပွဲကို ဇန်နဝါရီ ၂ ရက်တွင် စစ်တွေမြို့ရှိ ရခိုင်ပြည်နယ်အစိုးရအဖွဲ့ အစည်းအဝေးခန်းမတွင် ကျင်းပခဲ့ကြောင်း ပြန်ကြားရေးဝန်ကြီးဌာန၏ သတင်းထုတ်ပြန်ချက်အရ သိရသည်။ အဆိုပါဆွေးနွေးပွဲတွင် ရခိုင်ပြည်နယ်ဆိုင်ရာ အကြံပြုချက်များအပေါ် အကောင်အထည်ဖော်ရေးဆိုင်ရာ ကော်မတီဥက္ကဋ္ဌ၊ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာဝင်းမြတ်အေးက “ရခိုင်ပြည်နယ်တွင် ၂၀၁၂ ခုနှစ်ကတည်ရှိခဲ့သော IDP စခန်းများသည် ဘေးဖြစ်စဉ်များကြောင့် ခေတ္တနေထိုင်ရာစခန်းများသာ ဖြစ်သင့်သော်လည်း ယခုအခါငါးနှစ်ကျော်ကြာ တည်ရှိခဲ့ပြီဖြစ်ကြောင်း၊ IDP စခန်းတွင် နေထိုင်ကြရသူများ သွားလာခွင့်နှင့် အသက်မွေးဝမ်းကြောင်းဆိုင်ရာကိစ္စရပ်များကို ဆောင်ရွက်ပေးရန်လိုအပ်ကြောင်း၊ လူသားချင်းစာနာထောက်ထားမှုဆိုင်ရာ ထောက်ပံ့မှုများကို ရေရှည်မှီခိုခြင်းထက် အလုပ်အကိုင်အခွင့်အလမ်းများရရှိခြင်း၊ ပညာရေး၊ ကျန်းမာရေးလက်လှမ်းမီခြင်းသည် ၎င်းတို့အတွက် ပိုမို၍အကျိုးဖြစ်ထွန်းစေမည်ဖြစ်ကြောင်း၊ အကောင်အထည်ဖော်ဆောင်ရွက်ရာတွင် IDP စခန်းတွင် နေထိုင်သူများ၏ ဥပဒေနှင့်အညီ ပူးပေါင်းပါဝင်ရန် တိုက်တွန်းပြောကြားခဲ့ကြောင်း၊ ထို့နောက် ပြည်ထောင်စုဝန်ကြီး၊ ပြည်နယ်ဝန်ကြီးချုပ်၊ ပြည်နယ်ဝန်ကြီးများ၊ ပြည်နယ်အဆင့်ဌာနဆိုင်ရာများနှင့် IDP စခန်းတွင် နေထိုင်သူများက လက်ရှိစခန်းကိုပိတ်သိမ်းပြီး သင့်တော်သော ပြန်လည်နေရာချထားရေးနှင့်ပတ်သက်၍ ညှိနှိုင်းဆွေးနွေးသဘောတူညီချက်များရယူခဲ့ပြီး အသေးစိတ်အချက်အလက်အား ဆက်လက်ဆွေးနွေးမည်ဖြစ်ကြောင်း ဆုံးဖြတ်ခဲ့ကြကြောင်း အဆိုပါသတင်းထုတ်ပြန်ချက်တွင်ပါရှိသည်။
ထို့အပြင် ယင်းနေ့ဆွေးနွေးပွဲတွင် လွတ်လပ်စွာသွားလာခွင့်အတွက် ဥပဒေနှင့်အညီ ဆောင်ရွက်နိုင်ရန် နိုင်ငံသားစိစစ်ခံရမည့်သူ၏ သက်သေခံကတ်ပြား (NV Card) ကိုင်ဆောင်ရန်နှင့် (NV Card) ကတ်ပြားကိုင်ဆောင်ခြင်းဖြင့် ရရှိနိုင်မည့်အခွင့်အရေးများကို ရှင်းလင်းပြောကြားခဲ့ပြီး၊ (NV Card) ကိုင်ဆောင်သူသည် ပြည်ထောင်စုမြန်မာနိုင်ငံအတွင်း နေထိုင်သူအဖြစ် သက်သေခံနိုင်ခြင်း၊ မြန်မာနိုင်ငံသားဥပဒေနှင့်အညီ နိုင်ငံသားစိစစ်မှုခံယူရန် လျှောက်ထားပိုင်ခွင့်ရှိခြင်း၊ မြန်မာနိုင်ငံသားဥပဒေနှင့်အညီ နိုင်ငံသား ဟုတ် မဟုတ် အဆုံးဖြတ်ပေးခံယူနိုင်ပြီး ရရှိသောနိုင်ငံသားအဆင့်အတန်းနှင့်အညီ သတ်မှတ်ထားသော အခွင့်အရေးများရရှိခြင်း၊ (NV Card) ကိုင်ဆောင်သူမိဘများမှ မွေးဖွားလာသော သားသမီးများသည်လည်း မြန်မာနိုင်ငံသားဥပဒေနှင့်အညီ နိုင်ငံသားစိစစ်မှုခံယူရန် လျှောက်ထားပိုင်ခွင့်ရှိခြင်း၊ (NV Card) ကိုင်ဆောင်သူသည် မြန်မာနိုင်ငံအတွင်းရှိ မည်သည့်အရပ်ဒေသကိုမဆို သွားလာလိုပါက သက်ဆိုင်ရာတိုင်းဒေသကြီး/ပြည်နယ်အစိုးရအဖွဲ့မှ ထုတ်ပြန်ထားသော ဒေသန္တရအမိန့်နှင့် ညွှန်ကြားချက်များနှင့် ခရီးသွားလာခွင့်ရှိခြင်း၊ ရခိုင်ပြည်နယ်အတွင်း တရားဝင်ဖွင့်လှစ်ထားသောနယ်စပ် ဝင်/ထွက် ဂိတ်မှတစ်ဆင့် နိုင်ငံဖြတ်ကျော်လက်မှတ်ဖြင့် ဘင်္ဂလားဒေ့ရှ်နိုင်ငံသို့ တရားဝင် ဝင်/ထွက် သွားလာခွင့်ရှိခြင်း၊ ရခိုင်ပြည်နယ်အတွင်းရှိ မိမိနေထိုင်ရာမြို့နယ်အတွင်း ပြည်နယ်အစိုးရက ထုတ်ပြန်ထားသောညွှန်ကြားချက်များနှင့်အညီ လွတ်လပ်စွာခရီးသွားလာခွင့်ရှိခြင်း၊ အပြည်ပြည်ဆိုင်ရာရေပိုင်နက်သို့ ရေလုပ်ငန်းလိုင်စင်ဖြင့် ဥပဒေနှင့်အညီ ထွက်ခွာခွင့်ရှိခြင်း စသည့်အခွင့်အရေးများရရှိမည်ဖြစ်သည်ဟု ရှင်းလင်းပြောကြားခဲ့ကြောင်း ပြန်ကြားရေးဝန်ကြီးဌာန၏ သတင်းထုတ်ပြန်မှုတွင် ပါရှိချက်အရ သိရသည်။
ထို့နောက် ရခိုင်ပြည်နယ်ဝန်ကြီးချုပ် ဦးညီပု၊ ရခိုင်ပြည်နယ်ဝန်ကြီးများ၊ တာဝန်ရှိသူများနှင့် သက္ကေပြင် IDP စခန်းမှ စခန်းစီမံခန့်ခွဲမှုကော်မတီဝင်များက သက္ကေပြင် IDP စခန်း ပြန်လည်နေရာချထားရေးနှင့်ပတ်သက်၍ IDP စခန်း၏ လက်ရှိအခြေအနေ၊ ပြန်လည်နေရာချထားရာတွင် ဆောင်ရွက်ရမည့်လိုအပ်ချက်များနှင့် လွတ်လပ်စွာသွားလာခွင့်ကိစ္စရပ်များကို အပြန်အလှန်ညှိနှိုင်းဆွေးနွေးခဲ့ကြပြီး အဆိုပါအစည်းအဝေးသို့ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ဒုတိယဝန်ကြီး၊ ရခိုင်ပြည်နယ်ဝန်ကြီးများ၊ ပြည်နယ်အဆင့် ဌာနဆိုင်ရာတာဝန်ရှိသူများနှင့် စစ်တွေမြို့ရှိ IDP စခန်းများမှ တာဝန်ရှိသူများ တက်ရောက်ကြကြောင်း အဆိုပါထုတ်ပြန်ချက်အရ သိရသည်။
