ဂျာနယ်လစ်များကို ဖမ်းဆီးထောင်ချခြင်းသည် ဒီမိုကရေစီစနစ်သို့ ကူးပြောင်းမည်ဟု အခိုင်အမာပြောကြားသည့် မြန်မာနိုင်ငံအတွက် လက်သင့်ခံစရာ မကောင်းကြောင်းနှင့် ယင်းလုပ်ရပ်များသည် တရားဥပဒေစိုးမိုးရေးနှင့် မီဒီယာလွတ်လပ်ခွင့်အတွက် ဝေးကွာသွားစေကြောင်း နယ်စည်းမခြားသတင်းထောက်များအဖွဲ့ထုတ်ပြန်

ဂျာနယ်လစ်များကို ဖမ်းဆီးထောင်ချခြင်းသည် ဒီမိုကရေစီစနစ်သို့ ကူးပြောင်းမည် ဟု အခိုင်အမာပြောကြားသည့် မြန်မာနိုင်ငံအတွက် လက်သင့်ခံစရာမကောင်းကြောင်း နှင့် ယင်းလုပ်ရပ်များသည် တရားဥပဒေစိုးမိုးရေးနှင့် မီဒီယာလွတ်လပ်ခွင့်အတွက် ဝေးကွာသွားစေကြောင်း နယ်စည်းမခြားသတင်း ထောက်များအဖွဲ့ (RSF) က ထုတ်ပြန်ခဲ့သည်။

ရန်ကုန်တိုင်းဒေသကြီးအစိုးရက Weekly Eleven အယ်ဒီတာချုပ် အပါအဝင် သုံးဦးအား ပုဒ်မ ၅၀၅ (ခ) ဖြင့် တရားစွဲဆို ဖမ်းဆီးမှုအပြီးတွင် RSF က ယင်းကဲ့သို့ ထုတ်ပြန်ခဲ့ခြင်းဖြစ်ပြီး သတင်းထောက်သုံးဦးအား ချက်ချင်းလွှတ်ပေးရန်လည်း တောင်းဆိုခဲ့သည်။

ဂျာနယ်လစ်များအား ၎င်းတို့၏အလုပ် တာဝန်များ လုပ်ဆောင်မှုနှင့်ဆက်နွှယ်၍  ထောင်ချခြင်းသည် ဒီမိုကရေစီစနစ်သို့ ကူးပြောင်းမည်ဖြစ်ကြောင်း အခိုင်အမာ ပြောကြားခဲ့သော မြန်မာနိုင်ငံတွင် လက်သင့်ခံ စရာမကောင်းကြောင်း၊ ယခုကဲ့သို့ စွက်ဖက်သည့်လုပ်ရပ်သည် မြန်မာနိုင်ငံတွင် တရားဥပဒေစိုးမိုးမှုနှင့် မီဒီယာလွတ်လပ်ခွင့်အတွက် လေးစားမှုမှ နောက်ထပ်ခြေလှမ်းတစ်ရပ် ဝေးကွာသွားခြင်းဖြစ်ကြောင်း RSF ၏ အာရှ-ပစိဖိတ်ဗျူရို၏ ခေါင်းဆောင် Daniel Bastard က ပြောကြားခဲ့သည်။

ယခုနှစ်စကတည်းက မြန်မာနိုင်ငံတွင် လွတ်လပ်စွာ ထုတ်ဖော်ခွင့်ကို ပြင်းပြင်းထန် ထန်ချိုးဖောက်မှုများကြောင့် ကမ္ဘာ့စာနယ် ဇင်းလွတ်လပ်ခွင့်အညွှန်းကိန်းတွင် မြန်မာသည် အဆင့်လျော့ကျနိုင်သည်ဟု နယ်စည်း မခြားသတင်းထောက်များအဖွဲ့(RSF) က အောက်တိုဘာအစောပိုင်းတွင် သတိပေးချက် ထုတ်ပြန်ထားခဲ့သည်။

ဧပြီလက ထုတ်ပြန်သော ၂၀၁၈ အညွှန်းကိန်းတွင် မြန်မာသည် ယခင်တစ်နှစ်ကထက် အဆင့်ခြောက်ဆင့် လျော့ကျခဲ့ပြီး နိုင်ငံ ၁၈၀ တွင် အဆင့် ၁၃၇ ရရှိခဲ့သည်။ လာမည့်နှစ်တွင် မြန်မာ၏အဆင့် သတ်မှတ်ချက်သည် ပို၍ လျော့ကျသွားနိုင်ကြောင်း (RSF) က ဆိုသည်။