မန်ယူအသင်းယာယီနည်းပြ ဆိုးလ်ရှားက သောကြာည (ယနေ့) တွင် FA ဖလားစတုတ္ထအဆင့်ပွဲစဉ်အဖြစ် ရင်ဆိုင်ရမည့် အာဆင်နယ်အသင်းမှာ မန်ယူအသင်း၌ မိမိကစားနေစဉ်အတွင်း အနီးဆုံးပြိုင်ဘက်ဖြစ်ခဲ့ပြီး အောင်မြင်မှုအတွက် အမြဲတမ်း ပြိုင်ဆိုင်ရခဲ့သည့်အသင်းတစ်သင်းဖြစ်ကြောင်း ထုတ်ဖော်ပြောကြားခဲ့သည်။
မန်ယူအသင်းအား ရာနှုန်းပြည့် နိုင်ပွဲရရှိရန် စွမ်းဆောင်ပေးထားသည့် ဆိုးလ်ရှားက ၁၉၉၈-၉၉ ရာသီတွင် အဓိကဆုဖလား (၃)လုံးရယူခဲ့ရာ၌ အာဆင်နယ်အသင်းအား အနိုင်ရခဲ့သည့် FA ဖလားဆီမီးဖိုင်နယ်ပွဲစဉ်မှာ အဓိကအရေးပါခဲ့ကြောင်း ဖွင့်ဟခဲ့သည်။
အဆိုပါပွဲစဉ်တွင် အာဆင်နယ်အသင်းမှာ ပယ်နယ်တီကန်ခွင့်ရရှိခဲ့သော်လည်း ဘားကင့်၏ကန်ချက်ကို ဂိုးသမား ပီတာရှမိုက်ကယ်က လက်စွမ်းပြကာကွယ်နိုင်ခဲ့ပြီး အချိန်ပို၌ ရိုင်ယန်ဂစ်သွင်းယူသောဂိုးဖြင့်အနိုင်ရကာ ဗိုလ်လုပွဲသို့ တက်ရောက်နိုင်ခဲ့ခြင်းဖြစ်သည်။
ဝင်ဘလေကွင်းတွင် ကစားခဲ့သည့် အဆိုပါဗိုလ်လုပွဲ၌ မန်ယူအသင်းသည် နယူးကာဆယ်အား (၂-၀)ဂိုးဖြင့်အနိုင်ယူကာ ချန်ပီယံဖြစ်ခဲ့ပြီး ပရီးမီးယားလိဂ်၊ ချန်ပီယံလိဂ် စသည့် ဆုဖလားများကို ဆက်လက်ရယူနိုင်ခဲ့သည်။
ဆိုးလ်ရှားက "အာဆင်နယ်ဟာ ကျွန်တော်တို့အတွက် အနီးကပ်ဆုံးပြိုင်ဘက် ဖြစ်ခဲ့တယ်။ တစ်ရာသီအတွင်း သူတို့ကဖလား(၂)လုံးယူဖူးပြီး ကျွန်တော်တို့က (၃)လုံးယူနိုင်ခဲ့တယ်" ဟု ဆိုခဲ့သည်။
