ဖီဖာ ကမ္ဘာ့ဖလားဘောလုံးပွဲ ရုပ်သံထုတ်လွှင့်ခွင့် မူပိုင်ခွင့်များ ရယူနိုင်ရန် ထိုင်းအစိုးရအဖွဲ့က ရုပ်သံထုတ်လွှင့်ရေးနှင့် ဆက်သွယ်ရေးကော်မရှင် (NBTC) ထံ ဘတ် ၁ ဒသမ ၃ ဘီလျံ (အမေရိကန်ဒေါ်လာသန်း ၄၀) ခွဲဝေချထားပေးရန် အတည်ပြုလိုက်သည်။
NBTC သည် ရုပ်သံမူပိုင်ခွင့် ရယူရေးလုပ်ငန်းစဉ်များကို ကြီးကြပ်ဆောင်ရွက်သွားမည်ဖြစ်ပြီး ပုဂ္ဂလိကကဏ္ဍမှ မိတ်ဖက်အဖွဲ့အစည်းများနှင့် ပူးပေါင်းကာ ကြော်ငြာထောက်ပံ့မှုများမှတစ်ဆင့် ရန်ပုံငွေရရှိရန် ညှိနှိုင်းဆောင်ရွက်သွားမည်ဖြစ်သည်။
ကမ္ဘာ့ဖလားပြိုင်ပွဲ၏ ဖွင့်ပွဲအခမ်းအနားတွင် ဖျော်ဖြေမည့် အနုပညာရှင်များစာရင်းကို ဖီဖာက ထုတ်ပြန်ကြေညာခဲ့ရာ အဆိုတော်လီဆာလည်း ပါဝင်သည်။
လီဆာက ကမ္ဘာ့ဖလားဖွင့်ပွဲတွင် ပထမဆုံး ဖျော်ဖြေခွင့်ရမည့် ထိုင်းအနုပညာရှင် ဖြစ်လာတော့မည်ဖြစ်သည်။
ဖွင့်ပွဲအခမ်းအနားတွင် လီဆာအပြင် ကေတီပယ်ရီ၊ ရီမာနှင့် တောင်အာဖရိကအဆိုတော် တိုင်လာတို့လည်း ဖျော်ဖြေကြမည်ဖြစ်ကြောင်း ဖီဖာကထုတ်ပြန်သည်။
လီဆာက ဇွန် ၁၂ ရက်တွင် SoFi အားကစားကွင်း၌ ကျင်းပမည့် အမေရိကန်နှင့် ပါရာဂွေးတို့၏ အဖွင့်ပွဲစဉ်တွင် ဖျော်ဖြေတင်ဆက်မည်။ ဖီဖာကမ္ဘာ့ဖလားပြိုင်ပွဲကို အမေရိကန်၊ ကနေဒါနှင့် မက္ကဆီကိုနိုင်ငံတို့က အိမ်ရှင်အဖြစ် ပူးတွဲလက်ခံကျင်းပသွားမည် ဖြစ်သည်။
