တမီးလ်နာဒူပြည်နယ်၏ လက်ရှိရွေးကောက်ပွဲ မဲရေတွက်မှုရလဒ်များအရ ရုပ်ရှင်မင်းသား ဗီဂျေး၏ TVK ပါတီသည် အမတ်နေရာအများဆုံးရရှိသည့်ပါတီအဖြစ် ရှေ့ပြေးဖြစ်နေပြီး နယ်မြေအတော်များများတွင် DMK နှင့် AIADMK ပါတီကြီးနှစ်ခုလုံးကို သိသိသာသာ ဖိအားပေးထားနိုင်ကြောင်း တွေ့ရသည်။

ရွေးကောက်ပွဲကော်မရှင်၏ နောက်ဆုံးထုတ်ပြန်ချက်အရ TVK ပါတီသည် အမတ်နေရာ ၉၆ နေရာတွင် အနိုင်ရရှိထားပြီး နောက်ထပ် ၁၁ နေရာတွင်လည်း မဲအသာဖြင့် ဦးဆောင်နေကြောင်း သိရသည်။

TVK ပါတီ၏ ခြေစွမ်းပြနိုင်မှုက အံ့မခန်းဖြစ်နေသဖြင့် အိန္ဒိယဝန်ကြီးချုပ် နာရင်ဒရာမိုဒီကိုယ်တိုင် ဗီဂျေး၏ ပါတီကို ဂုဏ်ပြုစကားဆိုခဲ့သည်။

မင်းသားဘဝမှ နိုင်ငံရေးလောကထဲသို့ ခြေစုံပစ်ဝင်လာသူ စီ ဂျိုးဇက် ဗီဂျေးနှင့် ၎င်း၏ TVK ပါတီတို့သည် မည်သည့်ပါတီနှင့်မှ မဟာမိတ်မဖွဲ့ဘဲ လွှတ်တော်မဲဆန္ဒနယ် ၂၃၄ ခုလုံးတွင် တစ်ကိုယ်တော် ဝင်ရောက်ယှဉ်ပြိုင်ရန် ဆုံးဖြတ်ခဲ့သည်။ ယခုနှစ် ပြည်နယ်လွှတ်တော်ရွေးကောက်ပွဲသည် TVK ၊ DMK နှင့် ဝန်ကြီးချုပ်မိုဒီ၏ BJP ပါတီတို့ကြား သုံးပွင့်ဆိုင် အကြိတ်အနယ် ယှဉ်ပြိုင်ရသည့် တိုက်ပွဲတစ်ခုဖြစ်သည်။

TVK နှင့် BJP ပါတီတို့ မဟာမိတ်ဖွဲ့မည်ဆိုသည့် ကောလာဟလများ ထွက်လာသော်လည်း BJP နှင့် လုံးဝပူးပေါင်းမည်မဟုတ်ကြောင်း TVK ဘက်က အခိုင်အမာ ငြင်းဆိုထားသည်။

ထို့ပြင် ပါတီတစ်ခုက ဗီဂျေးကို ပြည်နယ်ဝန်ကြီးချုပ် ရာထူးအပြင် လွှတ်တော်အမတ်နေရာ ၅၀ ရာခိုင်နှုန်းပေးမည်ဟု ကမ်းလှမ်းထားပြီး ဗီဂျေးက ထိုကမ်းလှမ်းမှုကို လက်မခံကြောင်း TVK အတွင်းရေးမှူးချုပ်က ပြောသည်။

အသက် ၅၁ နှစ်အရွယ် ဗီဂျေးသည် တမီးလ်ရုပ်ရှင်နယ်ပယ်၏ ထိပ်တန်းမင်းသားတစ်လက်ဖြစ်ပြီး ၂၀၂၄ ခုနှစ်တွင် နိုင်ငံရေးပါတီ ထူထောင်လိုက်သည်။ ပြီးခဲ့သည့်နှစ် စက်တင်ဘာ ၂၇ ရက်က တမီးလ်နာဒူပြည်နယ်တွင် ဗီဂျေး၏ မဲဆွယ်စည်းရုံးပွဲအတွင်း လူတိုးကြိတ်မှုများဖြစ်ကာ လူ ၄၀ သေဆုံးခဲ့သည့်အတွက် စီနီယာပါတီအဖွဲ့ဝင်သုံးဦး ဖမ်းဆီးခံခဲ့ရသည်။

Ref: Hindustan Times