အိန္ဒိယနိုင်ငံ၊ Visakhapatnam မြို့၌ ဖေဖော်ဝါရီ ၁၅ ရက်မှ ၂၅ ရက်အထိ ကပြုလုပ်သော နိုင်ငံတကာစစ်ရေယာဉ်များတွေ့ဆုံပွဲ International Fleet Review-2026 (IFR-2026)နှင့် နိုင်ငံပေါင်းစုံရေတပ်လေ့ကျင့်ခန်း(MILAN-2026) များသို့ မြန်မာတပ်မတော်(ရေ)မှ အဖွဲ့ ခေါင်းဆောင် ဗိုလ်မှူးချုပ် ကျော်စွာထက် ဦးဆောင်သော စစ်ရေယာဉ်(အောင်ဇေယျ) ပါဝင်တက်ရောက် လေ့ကျင့်ခဲ့ကြောင်း သိရသည်။
အဆိုပါ နိုင်ငံတကာစစ်ရေယာဉ်များတွေ့ဆုံပွဲ (IFR-2026) နှင့် နိုင်ငံပေါင်းစုံရေတပ်လေ့ကျင့်ခန်း (MILAN-2026) များသို့တက်ရောက်ရန် စစ်ရေယာဉ်(အောင်ဇေယျ)သည် ဖေဖော်ဝါရီ ၁၁ ရက်တွင် ရန်ကုန်မြို့မှစတင်ထွက်ခွာခဲ့ပြီး အိန္ဒိယနိုင်ငံ၊ Visakhapatnam မြို့သို့ ဖေဖော်ဝါရီ ၁၄ ရက်တွင် ရောက်ရှိခဲ့ကြောင်း သိရသည်။
နိုင်ငံတကာစစ်ရေယာဉ်များတွေ့ဆုံပွဲ (IFR-2026) အခမ်းအနားသို့ အိန္ဒိယသမ္မတ ဒရူပါဒီမာမူ (Droupadi Murmu) တက်ရောက်ခဲ့ပြီး မြန်မာတပ်မတော်(ရေ)မှအဖွဲ့ ခေါင်းဆောင်အဖြစ် စစ်ဦးစီးအရာရှိချုပ်(ရေ) ဒုတိယဗိုလ်ချုပ်ကြီးအေးမင်းထွေး ဦးဆောင်သော ကိုယ်စားလှယ်အဖွဲ့ပါဝင် တက်ရောက်ခဲ့ကြောင်း သိရသည်။
ယင်းအခမ်းအနားသို့ နိုင်ငံပေါင်း ၇၄ နိုင်ငံမှ အဆင့်မြင့်ရေတပ်အရာရှိကြီးများ၊ နိုင်ငံတကာ ရေတပ်များ၊ ဒေသတွင်းရေတပ်များနှင့်အိမ်နီးချင်းရေတပ်များမှစစ်ရေယာဉ်များ စုပေါင်းတက်ရောက်ခဲ့ပြီး အဆိုပါအခမ်းအနားများနှင့် တစ်ဆက်တစ်စပ်တည်းပြုလုပ်သည့် အိန္ဒိယ သမုဒ္ဒရာရေတပ်ဆိုင်ရာ စာတမ်းဖတ်ပွဲနှင့် ဂိုအာပင်လယ်ရေကြောင်းဆိုင်ရာသီးသန့်ဆွေးနွေးပွဲများသို့လည်း တပ်မတော် (ရေ)မှ စစ်ဦးစီးအရာရှိချုပ်(ရေ) ဦးဆောင်သောကိုယ်စားလှယ်အဖွဲ့ မှ ပါဝင် တက်ရောက်ခဲ့ကြောင်း သိရသည်။
ဖရီဂိတ်စစ်ရေယာဉ်(အောင်ဇေယျ)သည် ဖေဖော်ဝါရီ ၁၈ ရက်တွင်ပြုလုပ်သော နိုင်ငံတကာ စစ်ရေယာဉ်များတွေ့ဆုံပွဲ (IFR-2026)တွင် ပါဝင်ဆောင်ရွက်ခြင်း၊ ဖေဖော်ဝါရီ ၁၉ ရက်မှ ၂၅ ရက်အထိ ပြုလုပ်သော နိုင်ငံပေါင်းစုံရေတပ်လေ့ကျင့်ခန်း (MILAN-2026) ၏ ဖွင့်ပွဲအခမ်းအနားသို့တက်ရောက်ခြင်း၊ ဆိပ်ကမ်းအခြေပြုစဉ် International Maritime Seminar သို့ နိုင်ငံပေါင်း၇၄ နိုင်ငံနှင့်အတူ တက်ရောက်ခြင်း၊ စစ်ရေယာဉ်များပေါ်သို့ အပြန်အလှန်လေ့လာလည်ပတ်ခြင်း၊ ဘာသာရပ်ဆိုင်ရာကျွမ်းကျင်သူများ တွေ့ဆုံဆွေးနွေးပွဲသို့တက်ရောက်ခြင်း၊ ရေအောက်နစ်မြုပ်မှု ရှာဖွေရေးရေယာဉ်စနစ် သရုပ်ပြမှုအား သွားရောက်လေ့လာခြင်း၊ မြို့တွင်းလေ့လာရေးခရီးသွား ရောက်ခြင်း၊ နိုင်ငံတကာတပ်ဖွဲ့ဝင်များနှင့်အတူ စစ်ရေးပြအခမ်းအနားတွင်ပါဝင်ဆောင်ရွက်ခြင်း၊ အရာ ရှိငယ်များ အပြန်အလှန်ပူးပေါင်းဆောင်ရွက်ခြင်း၊ ချစ်ကြည်ရေးအားကစားပြိုင်ပွဲများ၌ ပါဝင်ဆင်နွှဲခြင်း၊ Agra မြို့နှင့် ဗုဒ္ဓဂါယာသို့ သွားရောက်ဖူးမြော်လေ့လာခြင်း၊ ညစာစားပွဲအခမ်းအနားတွင် ရိုးရာ ယဉ်ကျေးမှုအကပဒေသာများဖြင့် ကပြဖျော်ဖြေရာတွင် ပါဝင်ဆင်နွှဲခြင်းများဆောင်ရွက်ခဲ့ကြပြီး နိုင်ငံတကာစစ်ရေယာဉ်များနှင့်ပူးပေါင်း၍ ပင်လယ်ပြင်လက်တွေ့လေ့ကျင့်ခန်းများတွင် ပါဝင်လေ့ကျင့်ခဲ့ကြောင်း သိရသည်။
စစ်ရေယာဉ်(အောင်ဇေယျ)သည် အိန္ဒိယနိုင်ငံမှ ယနေ့ (ဖေဖော်ဝါရီ ၂၈ ရက်)နံနက်ပိုင်းတွင် ရန်ကုန်မြို့၊ အမှတ်(၄)ရေတပ်ဆိပ်ခံတံတား(သီလဝါ)သို့ ပြန်လည်ရောက်ရှိရာ နယ်မြေခံရေတပ်ကွပ်ကဲမှုဌာနချုပ်မှူး ဗိုလ်ချုပ် သိန်းထူးနှင့် တပ်မတော်(ရေ)မှ အရာရှိ၊ စစ်သည်၊ မိသားစုများက ကြိုဆိုနှုတ်ဆက်ခဲ့ကြောင်း သိရသည်။
နိုင်ငံတကာစစ်ရေယာဉ်များတွေ့ဆုံပွဲ (IFR-2026) နှင့် နိုင်ငံပေါင်းစုံရေတပ်လေ့ကျင့်ခန်း (MILAN-2026) သို့တက်ရောက်ခဲ့သည့် စစ်ရေယာဉ်(အောင်ဇေယျ)၏ ရန်ကုန်-အိန္ဒိယ-ရန်ကုန် ခရီးစဉ်နှင့် ပင်လယ်ပြင်လက် တွေ့ လေ့ကျင့်ခန်းများတွင် မောင်းနှင်ခဲ့သည့် စုစုပေါင်းရေမိုင်မှာ ၂၃၇၇ ဒသမ ၄ မိုင်ရှိကြောင်း သိရသည်။
