ရီးယဲလ်မက်ဒရစ်အသင်းရဲ့ ဘရာဇီးလ်တိုက်စစ်မှူး အန်းဒရစ်ဟာ လာမယ့် ဇန်နဝါရီအပြောင်းအရွှေ့မှာ လိုင်ယွန်အသင်းကို အငှားနဲ့ ပြောင်းရွှေ့ကစားဖို့ နီးစပ်နေပြီဖြစ်ကြောင်း သိရပါတယ်။

အန်းဒရစ်က လိုင်ယွန်အသင်းမှာ သွားရောက်ကစားဖို့ ဆန္ဒရှိနေသလို၊ အသင်းနှစ်သင်းကလည်း ညှိနှိုင်းမှုတွေ အဆင်ပြေတာကြောင့် အန်းဒရစ်ကို ပြင်သစ်လိဂ်မှာ မြင်တွေ့ရတော့မှာဖြစ်ပြီး အပြီးသတ်ခေါ်ယူခွင့်မပါဝင်တဲ့ အငှားသက်သက်သာဖြစ်ကြောင်း နာမည်ကျော်ဂျာနယ်လစ် ဖာဘရီဇီယိုရိုမာနိုက ဖော်ပြခဲ့ပါတယ်။

အသက်(၁၉)နှစ်သာရှိသေးတဲ့ အန်းဒရစ်ဟာ ဒီရာသီမှာ ရီးယဲလ်အသင်းအတွက် (၁၁)မိနစ်သာ ကစားခွင့်ရသေးတဲ့အတွက် ၂၀၂၆ ကမ္ဘာ့ဖလားအခွင့်အရေးအတွက် ပွဲကစားခွင့်ရမယ့်အသင်းဆီ အငှားပြောင်းရွှေ့ဖို့ စီစဉ်ခြင်းဖြစ်ကြောင်း သိရပါတယ်။

အန်းဒရစ်ဟာ ၂၀၂၄ နွေရာသီမှာ ပါးလ်မီးရပ်စ်ကနေ ရီးယဲလ်အသင်းကို ယူရို(၇၂)သန်းနဲ့ ရောက်ရှိခဲ့သူဖြစ်ပြီး ပြီးခဲ့တဲ့ရာသီက ပြိုင်ပွဲစုံ(၃၇)ပွဲ ကစားခွင့်ရခဲ့ပေမဲ့ နည်းပြသစ် အလွန်ဆိုလက်ထက်မှာ နေရာပျောက်နေခဲ့တာပါ။

လိုင်ယွန်အသင်းဟာ အန်းဒရစ်ကို အငှားခေါ်ယူမှုအတွက် ငှားရမ်းခ ပေးချေရမှာမဟုတ်ဘဲ လစာကိုသာ အပြည့်အဝပေးချေသွားရမယ်လို့ သိရပါတယ်။