ရန်ကုန်မြို့၊ သိမ်ဖြူလမ်းရှိ ဝန်ကြီးများရုံး The Secretariat အဆောက်အဦးတွင် ‘မဲခေါင်-ဂင်္ဂါ’ အိန္ဒိယ-မြန်မာအစားအစာ ယဉ်ကျေးမှုပွဲတော်ကို ဖေဖော်ဝါရီ ၂၃ ရက်၊ ညနေ ၅ နာရီက ပြုလုပ်ခဲ့ကြောင်း သိရသည်။
‘မဲခေါင်-ဂင်္ဂါ’ အိန္ဒိယ-မြန်မာ အစား အစာ ယဉ်ကျေးမှုပွဲတော်ကို ရန်ကုန်မြို့၊ အိန္ဒိယသံရုံးသည် ရန်ကုန်မြို့ရှိ အိန္ဒိယနွယ်ဖွား အမျိုး သမီးများအသင်းနှင့် မြန်မာစီးပွားရေးလုပ်ငန်း ရှင်အမျိုးသမီးများကွန်ရက်တို့နှင့် ပူးပေါင်းပြု လုပ်ခြင်းဖြစ်သည်။
အဆိုပါပွဲတော်သို့ ဟိုတယ်နှင့်ခရီးသွားလာရေးဝန်ကြီးဌာန ပြည်ထောင်စုဝန်ကြီး ဦးကျော်စိုးဝင်း၊ အိန္ဒိယသံအမတ်ကြီး H.E.Mr.Abhay Thakur၊ ရန်ကုန်တိုင်းဒေသကြီး အစိုးရအဖွဲ့မှ တာဝန်ရှိသူများ ၊ နိုင်ငံခြားသံရုံးများမှ သံအမတ်ကြီးများ၊ သံတမန်များ၊ ရန်ကုန်မြို့ အိန္ဒိယနွယ်ဖွားအမျိုးသမီးများအသင်းနှင့် မြန်မာစီးပွားရေးလုပ်ငန်းရှင်အမျိုး သမီးများကွန်ရက်မှ တာဝန်ရှိသူများ တက်ရောက်ခဲ့ကြသည်။
ယင်းယဉ်ကျေးမှုပွဲတော်တွင် မြန်မာအစားအစာပြခန်းများ၊ အိန္ဒိယအစားအစာပြခန်းများနှင့် အမှတ်တရလက်ဆောင်ပစ္စည်းပြခန်းများ၊ လက်မှုပစ္စည်းနှင့် အဝတ်အထည်ပြခန်းများအပါအဝင် စုစုပေါင်း ၄၆ ခန်းပါဝင်ပြသခဲ့ကြောင်း သိရသည်။
ထို့ပြင် အိန္ဒိယ-မြန်မာအစားအစာယဉ် ကျေးမှုပွဲတော်သို့ လာရောက်သူများကို အိန္ဒိယယဉ်ကျေးမှုအသင်းအဖွဲ့များက အိန္ဒိယရိုးရာအကများ၊ တေးသီချင်းများ၊ မြန်မာယဉ် ကျေးမှုအသင်းအဖွဲ့များက ရုပ်သေးအကများ၊ မင်္ဂလာပါသီချင်းဖြင့် ယဉ်ကျေးမှုအကများဖြင့် ကပြ ဖျော်ဖြေတက်ဆက်ခဲ့ကြသည်။
ဟိုတယ်နှင့်ခရီးသွားလာရေးဝန်ကြီးဌာန ပြည်ထောင်စုဝန်ကြီး ဦးကျော်စိုးဝင်းက ယနေ့ အစားအစာပွဲတော်အခမ်းအနားသည် မြန်မာ-အိန္ဒိယနှစ်နိုင်ငံ ခရီးသွားလုပ်ငန်းဖွံ့ဖြိုးတိုးတက်ရန်အတွက် ကောင်းမွန်သောဆောင်ရွက်ချက်တစ်ခုဖြစ်ကြောင်း၊ ဝန်ကြီးဌာနအနေဖြင့် ခရီးသွားလုပ်ငန်းမြှင့်တင်နိုင်ရေးအတွက် မြန်မာနိုင်ငံတွင် အာဆီယံအစားအစာပွဲတော်ကဲ့သို့ ခရီးသွားမြှင့်တင်ရေးဆိုင်ရာအစီအစဉ်များကို အစိုးရ-ပုဂ္ဂလိက ပူးပေါင်း ဆောင်ရွက်မှုဖြင့် အကောင်အထည်ဖော်ဆောင်ရွက်လျက်ရှိကြောင်း၊ ယနေ့ပွဲတော်မှတစ်ဆင့် နှစ်နိုင်ငံဆက်ဆံရေးကို ပိုမိုခိုင်မာစေပြီး ယဉ်ကျေးမှုဖလှယ်ရေးနှင့် ခရီးသွားလုပ်ငန်းဖွံ့ဖြိုးတိုးတက်မှုအတွက် အခွင့်အလမ်းအသစ်များ ဖန်တီးပေးနိုင်မည်ဟု ယုံကြည်ကြောင်း ယင်းပွဲတော်တွင် ပြောကြားခဲ့ကြောင်း သိရသည်။
