အာတီတာက အသေးစိတ်အချက်အလက်လေးကအစ ဂရုစိုက်တဲ့ မန်နေဂျာအဖြစ် နာမည်ကြီးတယ်။ ဒါပေမဲ့ အခွင့်အရေးတွေ ရခဲ့ပါရက်နဲ့ အားနည်းချက်မပြင်ခဲ့တာကြောင့် နောက်တစ်ရာသီဖလားလက်မဲ့အဖြစ်မျိုးနဲ့ အာဆင်နယ်အသင်း ရင်ဆိုင်နေရပါပြီ။ လိဂ်ဖလားဆီမီးဖိုင်နယ် ပထမအကျော့ အိမ်ကွင်းမှာ နယူးကာဆယ်ကို (၀-၂)ဂိုးနဲ့ ရှုံးတယ်။ အဲဒီနောက် အိမ်ကွင်းမှာပဲ မန်ယူအသင်းကို ပယ်နယ်တီအဆုံးအဖြတ်နဲ့ ရှုံးနိမ့်ပြီး FA ဖလား တတိယအဆင့်ကနေ ထွက်လိုက်ရတာက အာဆင်နယ်အတွက် နာကျင်စရာကောင်းတယ်။ ပရီးမီးယားလိဂ်မှာ ပွဲကျန်တစ်ပွဲကစားဖို့ ကျန်ရှိနေတဲ့ အမှတ်ပေးဇယားထိပ်က လီဗာပူးလ်နဲ့ (၆)မှတ်ကွာနေတယ်။ အာဆင်နယ် ဘာလို့ဒီလိုဖြစ်တာလဲဆိုရင် အာတီတာနဲ့ အသင်းရဲ့အပြောင်းအရွှေ့ နည်းဗျူဟာကြောင့်ပါပဲ။