စပိန်ထိပ်သီးကလပ် ရီးယဲလ်မက်ဒရစ်အသင်းသည် ဗီလာရီးယဲလ်အသင်းအား (၂-၀)ဂိုးဖြင့် အနိုင်ရခဲ့သည့် ၂၀၂၄-၂၅ ရာသီ စပိန်လာလီဂါပွဲစဉ် (၉)အပြီးတွင် အသင်း၏ လာလီဂါရှုံးပွဲမရှိမှတ်တမ်းမှာ (၄၁)ပွဲဆက်တိုက်အထိရှိလာခဲ့ပြီး မဟာပြိုင်ဘက် ဘာစီလိုနာအသင်း၏ လာလီဂါသမိုုင်းတစ်လျှောက် အရှည်ကြာဆုံးပွဲဆက်ရှုံးပွဲမရှိစံချိန် (၄၃)ပွဲကိုလိုက်မီရန် (၂)ပွဲသာလိုအပ်တော့ကြောင်း သိရသည်။
လာလီဂါပြိုင်ပွဲ၏ လက်ရှိချန်ပီယံ ရီးယဲလ်မက်ဒရစ်အသင်း နောက်ဆုံးရှုံးနိမ့်ခဲ့သော လာလီဂါပွဲစဉ်မှာ ပြီးခဲ့သည့် ၂၀၂၃ ခုနှစ် စက်တင်ဘာ (၂၅)ရက်နေ့တွင် ယှဉ်ပြိုင်ကစားခဲ့သည့် ၂၀၂၃-၂၄ ရာသီ စပိန်လာလီဂါပွဲစဉ် (၆) အက်သလက်တီကို (၃-၁)ရီးယဲလ်မက်ဒရစ်ပွဲစဉ်ဖြစ်ပြီး ယင်းနောက်ပိုင်းကစားခဲ့သည့် လာလီဂါပွဲစဉ် (၄၁)ပွဲဆက်တိုက် ရှုံးပွဲမရှိအောင်ကစားနိုင်ခဲ့ခြင်းဖြစ်သည်။
ရီးယဲလ်မက်ဒရစ်အသင်းသည် ရှုံးပွဲမရှိခဲ့သည့် လာလီဂါပွဲစဉ် (၄၁)ပွဲတွင် (၃၀)ပွဲအထိအနို်င်ရရှိခဲ့ပြီး သရေ (၁၁)ပွဲနှင့် Clean Sheet (၂၃)ပွဲအထိရရှိကာ ဂိုးမသွင်းနိုင်သည့်ပွဲ (၂)ပွဲသာ ရှိခဲ့ကြောင်းသိရသည်။
ယခုကဲ့သို့ (၄၁)ပွဲဆက်တိုက် ရှုံးပွဲမရှိမှတ်တမ်းနှင့်အတူ ရီးယဲလ်မက်ဒရစ်အသင်းသည် ပြီးခဲ့သည့် ၂၀၂၃-၂၄ ရာသီလာလီဂါချန်ပီယံဆုကိုရယူနိုင်ခဲ့သလို၊ ယခုရာသီတွင်လည်း ပွဲစဉ် (၉)အပြီးတွင် အမှတ်ပေးဇယားထိပ်ဆုံးနေရာမှ ဘာစီလိုနာကိုကျော်ဖြတ်ကာ ချန်ပီယံဆုအတွက် ရေပန်းစားနေကြောင်း သိရသည်။
လာလီဂါပြိုင်ပွဲသမိုင်းတစ်လျှောက် ပွဲဆက်အများဆုံး ရှုံးပွဲမရှိစံချိန်တင်ထားသည့် ဘာစီလိုနာအသင်းမှာ နည်းပြဟောင်း အန်နရီကေးနှင့် ဗယ်လ်ဗာဒီတို့လက်ထက် ၂၀၁၆-၁၇ ရာသီ (၇ ပွဲ)နှင့် ၂၀၁၇-၁၈ ရာသီ (၃၆ ပွဲ)တို့တွင် (၄၃)ပွဲဆက်တိုက် ရှုံးပွဲမရှိကစားကာ စံချိန်တင်နိုင်ခဲ့ခြင်းဖြစ်သည်။
ထို့ကြောင့် ရီးယဲလ်မက်ဒရစ်အသင်းအနေဖြင့် ဘာစီလိုနာအသင်း၏ ပွဲဆက်အများဆုံးရှုံးပွဲမရှိစံချိန်အား လိုက်မီရန် (၂)ပွဲနှင့် ကျော်ဖြတ်နိုင်ရန် (၃)ပွဲသာလိုအပ်တော့ပြီး အောက်တိုဘာ (၂၇) ရက်နေ့တွင် ယှဉ်ပြိုင်ကစားမည့် ဘာစီလိုနာနှင့် လာလီဂါပွဲစဉ်မှာ ရီးယဲလ်အတွက် ဘာစီလိုနာ၏စံချိန်အား လိုက်မီနိုင်ခြင်းရှိ၊ မရှိကို အဆုံးအဖြတ်ပေးသွားမည်ဖြစ်ကြောင်း စပိန်မီဒီယာများက ဖော်ပြခဲ့ကြသည်။
