နည်းပညာအသုံးပြုပြီး ဆက်သွယ်ရေးကွန်ယက်မှတစ်ဆင့် ငွေကြေးလိမ်လည်မှုများကို ကာကွယ်ရန် နိုင်ငံသားစိစစ်ရေးကတ် အတုနှင့် ဘဏ်ငွေစာရင်း၊ Mobile Pay များ ဖွင့်လှစ်ခြင်းမရှိစေဖို့ စိစစ်ကြပ်မတ်ရ မည်ဖြစ်ကြောင်း ဒုတိယဝန်ကြီးချုပ်နှင့် စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးဝင်းရှိန်က ပြောကြားသည်။
ဇန်နဝါရီ ၂၂ ရက် နေပြည်တော်တွင် ပြုလုပ်သည့် မိုဘိုင်းငွေပေးချေမှုလမ်းကြောင်းများမှတစ်ဆင့် ငွေကြေး လိမ်လည်မှု တားဆီးရေးအသိပညာပေးဆွေးနွေးပွဲ အဖွင့်အမှာစကားပြောကြားရာတွင် ဒုတိယဝန်ကြီးချုပ်နှင့် ပြည်ထောင်စုဝန်ကြီး ဦးဝင်းရှိန်က အထက်ပါအတိုင်း ထည့်သွင်းပြောကြားခဲ့ခြင်းဖြစ်သည်။
“နည်းပညာအသုံးပြုပြီး ဆက်သွယ်ရေးကွန်ယက်မှတစ်ဆင့် ငွေကြေးလိမ်လည်မှုများကို ကာကွယ်ဖို့၊ လူမှုကွန်ယက်၊ Software၊ Website များ အသုံးပြုပြီး ဆက်သွယ်ရေးကွန်ယက်မှ ငွေကြေးလိမ်လည်သူများကို စောင့်ကြည့်သတင်းရယူခြင်း၊ အသွင်ယူ စုံစမ်းထောက်လှမ်းခြင်းများကို ပြည်ထဲရေးဝန်ကြီးဌာနနဲ့ ပို့ဆောင်ဆက်သွယ်ရေးဝန်ကြီးဌာနတို့က ပူးတွဲညှိနှိုင်းဆောင်ရွက်ကြဖို့ လိုအပ်ပါတယ်။ ဒါ့အပြင် နိုင်ငံသားစိစစ်ရေးကတ်အတုနဲ့ ဘဏ်ငွေစာရင်း၊ ဒါမှမဟုတ် Mobile Pay တွေ၊ စာရင်းတွေ ဖွင့်လှစ်ခြင်း မရှိစေဖို့ ပြည်ထဲရေးဝန်ကြီးဌာန၊ ပို့ဆောင်ရေးနှင့် ဆက်သွယ်ရေးဝန်ကြီးဌာန၊ မြန်မာနိုင်ငံတော်ဗဟိုဘဏ်၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနတို့က စိစစ်ကြပ်မတ်ရမှာ ဖြစ်ပြီးတော့ ဆက်သွယ်ရေးကွန်ယက်ကို အသုံးပြုတဲ့ ငွေကြေးလိမ်လည်မှုဖြစ်စဉ်ကနေတဆင့် တရားခံ ဖော်ထုတ်ဖမ်းဆီးရာမှာ ပြစ်မှုကျူးလွန်သူရဲ့ သတင်းအချက်အလက်တွေ အချိန်နှင့်တပြေးညီ ရရှိရေးအတွက် သတင်းဖလှယ် ပူးပေါင်းဆောင်ရွက်သွားကြရန် အထူးလိုအပ်ပါတယ်” ဟု ပြည်ထောင်စုဝန်ကြီးက ပြောကြားသည်။
နည်းပညာအသုံးပြုပြီး ဆက်သွယ်ရေးကွန်ယက်မှတဆင့် ငွေကြေးလိမ်လည်မှုများနှင့်ပတ်သက်၍ မြန်မာနိုင်ငံရဲတပ်ဖွဲ့၊ မှုခင်းရဲတပ်ဖွဲ့တိုမှ စုံစမ်းစစ်ဆေးမှုများ ဆောင်ရွက်ခဲ့ရာတွင် ယင်းလိမ်လည်မှုများတွင် အသုံးပြုသည့် အချို့သောဖုန်းနံပတ်များ၊ ကိုယ်ရေးအချက်အလက်များနှင့် မှတ်ပုံတင်များသည် အတုများကို အသုံးပြုထားသည်ကို တွေ့ရှိရကြောင်းနှင့် အွန်လိုင်းလိမ်လည်မှုများကို ပူးပေါင်းဆောင်ရွက်မှု၊ ပေါင်းစပ်ညှိနှိုင်းမှု၊ အသိပညာပေးခြင်း နည်းလမ်းများနှင့် ညှိနှိုင်းပူးပေါင်း အဖြေရှာဆောင်ရွက်ရွက်ရန် လိုအပ်နေသည်ကို တွေ့ရှိရကြောင်းလည်း ပြည်ထောင်စုဝန်ကြီးက ပြောကြားသည်။
ပြည်ထောင်စုဝန်ကြီးက “နိုင်ငံတော်စီမံအုပ်ချုပ်ရေးကောင်စီက ဆက်သွယ်ရေးကွန်ယက်မှတဆင့် ငွေကြေးလိမ်လည်မှုများနဲ့ စပ်လျဉ်းပြီး တားဆီးကာကွယ်ဖို့၊ သတင်းအချက်အလက် ရယူခြင်းနဲ့ စစ်ဆေးဖော်ထုတ်ခြင်းဆိုင်ရာ လုပ်ထုံးလုပ်နည်းများကို ၂၀၂၃ ခုနှစ် အောက်တိုဘာလမှာ ထုတ်ပြန်ခဲ့ပါတယ်” ဟု ပြောကြားသည်။
လူမှုကွန်ယက် Software Website များ အသုံးပြုပြီး ဆက်သွယ်ရေးကွန်ယက်၌ ငွေကြေလိမ်လည်မှုများကို စောင့်ကြည့်သတင်းရယူခြင်း၊ အသွင်ယူစုံစမ်းခြင်း၊ စုံစမ်းထောက်လှမ်းခြင်းများကိုလည်း လုပ်ဆောင်နေကြောင်း ပြည်ထောင်စုဝန်ကြီးက ပြောကြားသည်။
“ဒီ Cyber မှုခင်းများအပေါ် ရာဇသတ်ကြီး ဥပဒေ၊ အီလက်ထရောနစ် ဆက်သွယ်ဆောင်ရွက်ရေးဥပဒေ ၂၀၀၄ နဲ့ ဆက်သွယ်ရေးဥပဒေ ၂၀၁၃ တို့နှင့် အရေးယူဆောင်ရွက်လျက်ရှိသည့်အပြင် ဆိုက်ဘာလုံခြုံရေးဥပဒေကိုလည်း ရေးဆွဲလျက်ရှိပြီးတော့ အခုအချိန်မှာ မူကြမ်းအဆင့်ကနေ အတည်ပြုနိုင်ရေးလည်း ဆောင်ရွက်လျက်ရှိပါတယ်” ဟု ပြည်ထောင်စုဝန်ကြီးက ပြောကြားသည်။
Mobile ငွေပေးချေမှု လမ်းကြောင်းများမှ ငွေကြေးလိမ်လည်မှု မှုခင်းများ ဖြေရှင်းဆောင်ရွက်ရာတွင် Anti-Scam Center (လိမ်လည်မှုတိုက်ဖျက်ရေးစင်တာ) များ ဖွင့်လှစ်နိုင်မှုမရှိသေးသည့်အတွက် ယင်းမှုခင်းများကို ထိရောက်စွာ ကိုင်တွယ်ဖြေရှင်းနိုင်မှု မရှိသေးသည်ကို တွေ့ရကြောင်း ပြည်ထောင်စုဝန်ကြီးက ပြောကြားသည်။
မြန်မာနိုင်ငံတွင် အွန်လိုင်းလိမ်လည်မှု ဖြစ်ပွားမှုအနေဖြင့် ၂၀၂၁ ခုနှစ်တွင် အမှုပေါင်း ၉၀ မှု၊ ၂၀၂၂ ခုနှစ်တွင် အမှုပေါင်း ၁၆၁ မှု၊ ၂၀၂၃ ခုနှစ်တွင် အမှုပေါင်း ၂၂၁ မှုနှင့် ၂၀၂၄ ခုနှစ် လက်ရှိကာလအတွင်း အမှုပေါင်း ၁၀ မှု ဖြစ်ပွားခဲ့ပြီး တရားခံပေါင်း ၄၂၉ ဦးကို အရေးယူဆောင်ရွက်ခဲ့ကြောင်း၊ ထို့အတူ အွန်လိုင်းလောင်းကစားနှင့်ပတ်သက်နေသည့် တယ်လီဖုန်း ဆင်းကတ်များကို ပိတ်သိမ်းလျက်ရှိရာ လက်ရှိ အချိန်အထိ ဆင်းကတ်ပေါင်း ၈၈၀ ကျော်ကို ပိတ်သိမ်းခဲ့ပြီးဖြစ်ကြောင်း သိရသည်။
