ပြည်ပမှ မြန်မာနိုင်ငံသို့ငွေကြေးကို ဟွန်ဒီဖြင့် ပေးပို့ခြင်းနှင့် ပြည်တွင်းတွင်ငွေကြေးကို ဟွန်ဒီဖြင့်ထုတ်ပေးနေသူ ၂၀ ဦးအား အရေးယူဆောင်ရွက်လျက်ရှိကြောင်း မြန်မာနိုင်ငံတော်ဗဟိုဘဏ်က ထုတ်ပြန်ထားသည်။

 မြန်မာနိုင်ငံတော်ဗဟိုဘဏ်သည် ဟွန်ဒီလုပ်ငန်းဆောင်ရွက်နေမှု များနှင့် ပတ်သက်၍ ငွေကြေးခဝါချမှုနှင့်အကြမ်းဖက်မှုကို ငွေကြေး ထောက်ပံ့မှုတိုက်ဖျက်ရေးလုပ်ငန်းအဖွဲ့ဝင်များ ဖြစ်သည့် အထွေထွေ အုပ်ချုပ်ရေးဦးစီးဌာန၊ အထူးစုံစမ်း စစ်ဆေးရေးဦးစီးဌာနနှင့် ငွေကြေးဆိုင်ရာ စုံစမ်းထောက်လှမ်းရေးအဖွဲ့တုုိ့နှင့် ပူးပေါင်းဆောင်ရွက်ပြီး တရားမဝင် ဟွန်ဒီလုပ်ငန်း လုပ်ကိုင်သူများအား ဖော်ထုတ်ခြင်း၊ အသိပညာပေးလုပ်ငန်းများဆောင်ရွက်ခြင်း၊ တရားဥပဒေအရ တားမြစ်ထားကြောင်းနှင့် အရေးယူခံရမည်ဖြစ်ကြောင်း ရှင်းလင်းပြောကြားခြင်း၊ ငွေကြေးခဝါချမှုနှင့် အကြမ်းဖက်မှုကို ငွေကြေးထောက်ပံ့မှုတိုက်ဖျက်ရေးဆိုင်ရာ လိုက်နာဆောင်ရွက်ရေး သင်တန်းများတက်ရောက်စေခြင်း၊ တရားဝင် ပြည်ပငွေလွှဲလုပ်ငန်းလိုင်စင်လျှောက်ထားရန်  လိုအပ်သည်များ အသိပေးခြင်းတို့ကို ဆောင်ရွက်လျက်ရှိကြောင်း ထုတ်ပြန်မှုအရသိရသည်။

မြန်မာနိုင်ငံတော်ဗဟိုဘဏ်အနေဖြင့် တရားမဝင် ဟွန်ဒီလုပ်ငန်းလုပ်ကိုင်သူများ လျော့နည်းပပျောက်ရေးအတွက် အထက်ပါအတိုင်း ဆောင်ရွက်လျက်ရှိသော်လည်း တရားမဝင် ငွေလွှဲလုပ်ငန်း ဆက်လက်ဆောင်ရွက်နေကြောင်း စိစစ်တွေ့ရှိရပါက ဥပဒေပြဋ္ဌာန်းချက်များနှင့် အညီ အရေးယူပေးပါရန် ပြည်ထဲရေးဝန်ကြီးဌာနနှင့် တရားဥပဒေစိုးမိုးရေးအဖွဲ့အစည်းများထံသို့ အချိန်နှင့်တစ်ပြေးညီ ပေးပို့အကြောင်းကြားလျက်ရှိကြောင်း ထုတ်ပြန်သည်။

ထို့ပြင်ရွှေနှင့်ငွေကြေးဈေးကွက် စောင့်ကြည့်ထိန်းသိမ်း ကြပ်မတ်ရေးလုပ်ငန်းကော်မတီ၏ ဦးဆောင်မှုဖြင့် ပြည်ထဲရေးဝန်ကြီးဌာန၊ တရားဥပဒေ စိုးမိုးရေးအဖွဲ့အစည်းများနှင့် ပူးပေါင်းပြီး စီးပွားရေးလုပ်ငန်းရှင်များအနက် ဟွန်ဒီလုပ်ငန်း လုပ်ကိုင်ကြောင်း ကျော်စောသတင်း ပေါ်ပေါက်သူများကို စစ်ဆေးမေးမြန်းခြင်းနှင့် ယင်းကျော်စောသူများ၏ ဘဏ်စာရင်းများနှင့် ဘဏ်စနစ်ကိုအသုံးပြုပြီး ငွေလွှဲပြောင်းခြင်းများအားစိစစ်၍ မြန်မာနိုင်ငံတော်ဗဟိုဘဏ်၏ သတင်းနှင့်လုံခြုံရေးဌာနခွဲက တင်ပြလာသော သတင်းပေးပို့ ချက်များအရ လူပုဂ္ဂိုလ်/ ကုမ္ပဏီ တစ်ခုသည် တရားမဝင်ငွေလွှဲလုပ်ငန်းဆောင်ရွက်နေကြောင်း စိစစ်တွေ့ရှိရပါက ဥပဒေပြဋ္ဌာန်းချက်များနှင့်အညီ အရေးယူပေးပါရန် ပြည်ထဲရေးဝန်ကြီး ဌာနနှင့် တရားဥပဒေစိုးမိုးရေးအဖွဲ့ အစည်းများထံသို့ ဆက်လက်အကြောင်းကြားခြင်းများ ဆောင်ရွက်ခဲ့ကြောင်းသိရသည်။

ထိုသို့ တရားမဝင် ဟွန်ဒီလုပ်ငန်းဆောင်ရွက်နေမှုများကို အထွေထွေအုပ်ချုပ်ရေးဦးစီးဌာန၊ အထူးစုံစမ်း စစ်ဆေးရေးဦးစီးဌာနနှင့် ငွေကြေး ဆိုင်ရာ စုံစမ်းထောက်လှမ်းရေးအဖွဲ့တို့နှင့် ပူးပေါင်းဆောင်ရွက်ပြီး စုံစမ်းစစ်ဆေးဖော်ထုတ်ခြင်းနှင့် သက်ဆိုင်ရာဥပဒေများနှင့်အညီ တရားစွဲဆို အရေးယူဆောင်ရွက်လျက်ရှိကြောင်း၊ သံသယဖြစ်ဖွယ် ငွေလွှဲ/ငွေလဲလှယ်သည့် လုပ်ငန်းလုပ်ကိုင်သူ ၉၉ ဦးနှင့်ပတ်သက်၍ စိစစ်ဆောင်ရွက်ခဲ့ရာ မြန်မာနိုင်ငံရဲတပ်ဖွဲ့က လူပုဂ္ဂိုလ်၂၀ ဦးကို အမှုဖွင့် အရေးယူထားပြီးဖြစ်သကဲ့သို့ တရားမဝင်ငွေလွှဲ/ ငွေလဲလှယ်သည့်လုပ်ငန်းလုပ်ကိုင်သူ  ၂၀ ဦးအား သက်ဆိုင်ရာဥပဒေများနှင့်အညီ သက်ဆိုင်ရာ မြို့နယ်တရားရုံးများသို့ တရားစွဲဆိုတင်ပို့ထားပြီး ဆက်လက်အရေးယူ ဆောင်ရွက်လျက်ရှိကြောင်းသိရသည်။

အထက်ပါ သက်ဆိုင်ရာမြို့နယ်တရားရုံးများ၌ အမှုဖွင့်အရေးယူ ထားခြင်းခံရသူများတွင် တရားဝင်လုပ်ငန်း လိုင်စင်ရ ယူထားခြင်းမရှိဘဲ ထိုင်းနိုင်ငံ၊ တရုတ်နိုင်ငံနှင့် မလေးရှားနိုင်ငံများရှိ မြန်မာအလုပ်သမားလစာငွေများအား တရားမဝင် လွှဲပြောင်းထုတ်ပေးသူကိုးဦး၊ ကုန်ပစ္စည်း ဝယ်ယူခြင်းများအတွက် တရားမဝင်ငွေလွှဲပြောင်းပေးချေပေးသူသုံးဦးနှင့် နိုင်ငံခြားငွေမှ မြန်မာကျပ်ငွေသို့လဲလှယ်ပြီး ပြည်တွင်း၌ ငွေလွှဲ ပြောင်းထုတ်ပေးသူ ရှစ်ဦးတို့ပါဝင်ပြီး ယင်းတို့အား သက်ဆိုင်ရာ ဥပဒေပြဋ္ဌာန်းချက်များနှင့်အညီ ထောင်ဒဏ်နှင့် ငွေဒဏ်များ အမိန့်ချမှတ် အရေးယူဆောင်ရွက်လျက်ရှိကြောင်းသိရသည်။