ဆေးသုတ်လုပ်သားများ ပါလာသည့် Light Truck ယာဉ် ​ပြင်ဦးလွင်-မန္တလေးအဆင်းလမ်းတွင် ချောက်ထဲသို့ ထိုးကျတိမ်း​မှောက်ပြီး သုံးဦးသေဆုံးမှု နိုဝင်ဘာ ၂၄ ရက် နံနက် ၈ နာရီခန့်က ဖြစ်ပွားခဲ့ကြောင်း သိရသည်။

ပြင်ဦးလွင်မြို့နယ်၊ မန္တလေး-လာရှိုးလမ်းမကြီး၊ မိုင်တိုင်အမှတ်(၁၈/၄)မိုင်၊ ပြင်ဦးလွင်-မန္တလေးအဆင်းလမ်းတွင် Light Truck ယာဉ်တစ်စီးသည် အဆင်းလမ်းညာဘက်ခြမ်းတွင် ရပ်ထားသော Saloon KIA Cerato (အနီရောင်)ယာဉ်အား နောက်မှ ဝင်ရောက်တိုက်မိခဲ့​ပြီးနောက် ချောက်ထဲသို့ ထိုးကျသိမ်းမှောက်မှု ဖြစ်ပွားခဲ့ခြင်းဖြစ်သည်။

ယာဉ်တိမ်းမှောက်မှုကြောင့် ယာဉ်ပေါ်ပါ အမျိုးသား ခြောက်ဦးနှင့် အမျိုးသမီးတစ်ဦး စုစုပေါင်းခုနစ်ဦးအနက် အမျိုးသားသုံးဦးသေဆုံးခဲ့ကာ အမျိုးသမီး တစ်ဦး(စိုးရိမ်ရ)နှင့် အမျိုးသား သုံးဦး ဒဏ်ရာရရှိခဲ့သည်။

တိုက်​ဆေးသုတ်လုပ်သားများ လိုက်ပါလာ​သော light truck အမျိုးအစားယာဉ်သည် ​တောင်အဆင်း မောင်းနှင်နေချိန် အရှိန်မထိန်းနိုင်ပဲ လားရာတူ​မောင်းနှင်​နေသည့် ယာဉ်ငယ်တစ်စီးနှင့် လမ်း​ဘေးရှိကာရံထား​သော အတားအဆီးများကို တိုက်မိပြီး လမ်း​​ဘေးရှိ​ ချောက်အထဲသို့ ထိုးကျတိမ်း​မှောက်ခဲ့ကြောင်း၊ လူနာ အမျိုးသားတစ်ဦးသည် ​ကျောက်တုံးများအကြား ညှပ်မိ​နေခဲ့​သော​ကြောင့် ခက်ခဲစွာ ထုတ်ယူခဲ့ကြောင်း စေတနာမွန်လူမှုကူညီအသင်း-အုန်းချောထံမှ သိရသည်။

အဆိုပါဖြစ်စဉ်သို့ ဗဟိုမီးသတ်သင်တန်းကျောင်းနှင့် ရတနာပုံမြို့သစ်နယ်မြေမီးသတ်စခန်းတို့မှ သန္ဓေမီးသတ်တပ်ဖွဲ့ဝင်များဖြင့် ရှာဖွေကယ်ဆယ်ရေးလုပ်ငန်းများ သွားရောက်ဆောင်ရွက်ခဲ့ကြောင်း၊ အဆိုပါသေဆုံးသူနှင့် ဒဏ်ရာရရှိသူတို့ကို စေတနာမွန်လူမှုကူညီရေးအသင်း-အုန်းချောမှ သူနာတင်ယာဉ်ဖြင့် ပြင်ဦးလွင်မြို့နယ် ပြည်သူဆေးရုံနှင့် မန္တလေးပြည်သူ့ဆေးရုံကြီးသို့ ကူညီပို့ဆောင်ပေးခဲ့ကြောင်း၊ ကူညီရေးဖြစ်စဉ်တွင် ပြည်သူများနှင့် Myanmar Rescue mdy အဖွဲ့လာ​ရောက်ကူညီ​ဆောင်ရွက်​ပေးခဲ့ကြကြောင်း သိရသည်။