မွန်ပြည်နယ် ပေါင်မြို့နယ် ရန်ကုန် - မော်လမြိုင် ကားလမ်းပေါ်ရှိ ပေါင်မြို့ဝင်ကြေး ကောက်ခံသည့်ဂိတ်တွင် မော်တော်ဆိုင်ကယ်စီးနင်းလာသည့် အမျိုးသားတစ်ဦးထံမှ လက်နက်ခဲယမ်းများ ဖမ်းဆီး ရမိခဲ့ကြောင်း သတင်းရရှိသည်။
ဖြစ်စဉ်မှာ ယနေ့ (အောက်တိုဘာ ၂၈ ရက်) နံနက် ၇ နာရီ ၄၅ မိနစ်ခန့်က အဆိုပါ ပေါင်မြို့ဝင်ကြေး ကောက်ခံသည့်ဂိတ်တွင် လုံခြုံရေးတပ်ဖွဲ့ဝင်များက ယာဉ်များအား စစ်ဆေးနေစဉ် မော်လမြိုင်ဘက်မှ သထုံဘက်သို့ အသက် ၂၁ နှစ်အရွယ် ထွန်းနိုင် ဆိုသူ မောင်းနှင်စီးနင်လာသည့် Wave - S 125 ဆိုင်ကယ်အား ရပ်တန့်စစ်ဆေးခဲ့ရာ ၎င်း၏ ခါးကြားတွင်ထိုးထာသည့် USA နိုင်ငံလုပ် 9mm ပစ္စတို (၁) လက် နှင့်အတူ ဆိုင်ကယ် Toolbox အတွင်းမှ ကျည်အိမ် နှစ် ခု၊ ကျည် (၂၉) တောင့် ကိုလည်း တွေ့ရှိသိမ်းဆည်းရမိခဲ့ကြောင်း သိရသည်။
"သေနတ်နဲ့အတူ ဖမ်းဆီးရမိခဲ့တဲ့ ထွန်းနိုင် ဆိုသူက မော်လမြိုင်မြို့၊ လှိုင်ရပ်ကွက်၊ အုတ်ဖိုလမ်းမှာနေထိုင်သူလို့ သိရတယ်။ သူ့ကို လုံခြုံရေးတပ်ဖွဲ့တွေက ဖမ်းဆီးထားပြီး စစ်ဆေးမှုတွေလုပ်ဆောင်နေတယ်လို့ သိရပါတယ်" ဟု လုံခြုံရေးတပ်ဖွဲ့နှင့် နီးစပ်သူတစ်ဦးကပြောကြားသည်။
