မြန်မာနိုင်ငံတွင် ပြည်ပစတော့အိတ်ချိန်း အမည်ခံကာ ငွေကြေး မြန်မာငွေ ကျပ်သန်းပေါင်း ၁၆၀၀ ခန့် (ဒေါ်လာ ၁ ဒသမ ၄၈ သန်း) လိမ်လည်မှုစတင် ဖြစ်ပေါ်လာပြီး လက်ရှိဈေးကွက် အတွင်း၌လည်း အလားတူ ကုမ္ပဏီများစွာ ရှိနေသဖြင့် ဥပဒေဖြင့် တင်းကျပ်စွာ ချုပ်ကိုင်ရန် လိုအပ်လာကြောင်း ငွေကြေးဈေးကွက် ကျွမ်းကျင်သူအချို့က သုံးသပ်သည်။
ရန်ကုန်မြို့ ဆာကူရာတာဝါတွင် တရုတ်တိုင်ပေအခြေစိုက် စတော့ရှယ်ယာကုမ္ပဏီဟုဆိုကာ  ရုံးခန်းဖွင့်လှစ်ထားသည့် ကုမ္ပဏီမှ တာဝန်ရှိသူ နိုင်ငံခြားသားများက အစုရှယ်ယာ ဝင်ထားသူများ၏ ငွေကြေးများကို လိမ်လည်ကာ ပြည်ပသို့ထွက်ပြေး တိမ်းရှောင်သွားပြီဖြစ်သည်။
Global Group ဟု ခေါ်သည့် အဆိုပါ ကုမ္ပဏီသည် ဗဟိုဘဏ်မှ ထုတ်ပေးထားသော ငွေလဲလှယ်ရေး ကောင်တာ လိုင်စင်ရယူထားပြီး နိုင်ငံတကာတွင် နာမည်ကြီးသည့် Standard Bullion ၏ ရုံးခွဲဟုဆိုကာ လွန်ခဲ့သည့် နှစ်နှစ်ခန့်မှစတင်၍ ဆာကူရာတာဝါတွင် ရုံးခန်းဖွင့်လှစ် ခဲ့ခြင်းဖြစ်ကြောင်း 7Days သတင်းစာက ဖော်ပြခဲ့သည်။
ရွှေ၊ ရေနံ၊ ငွေကြေး၊ ကုန်စည် စသည့်ဈေးကွက်များပေါ်တွင် ရင်းနှီးမြှုပ်နှံကစားရသည့် နိုင်ငံခြားစတော့ အိတ်ချိန်းများမှ Future Exchange များကို ဝန်ဆောင်မှုပေးသည့် ပွဲစားကုမ္ပဏီများ၊ အမည်ခံကုမ္ပဏီခွဲများ မြန်မာ့ ဈေးကွက်အတွင်းသို့ ဝင်ရောက်လျှက်ရှိနေပြီး ၎င်းတို့မှာ လိုင်စင်မရှိသလို အာမခံချက်လည်း မရှိကြောင်း သိရသည်။
မြန်မာနိုင်ငံအတွင်းသို့ လာရောက် လုပ်ကိုင်နေသော ကုမ္ပဏီများမှာ ဟောင်ကောင်၊ နယူးဇီလန်၊ အင်ဒိုနီးရှား၊ စင်ကာပူ၊ တရုတ် စသည့်နိုင်ငံများမှ စတော့အိတ်ချိန်းများတွင် ဝန်ဆောင်မှု ပေးနေသည်ဟုဆိုကာ အကြိုငွေ Deposit တင်ခိုင်းပြီး ကော်မရှင်စားအဖြစ် လုပ်ကိုင်နေကြခြင်း ဖြစ်သည်။
အဆိုပါ ကုမ္ပဏီများက တောင်းသော အကြိုငွေမှာ ဒေါ်လာ ၁၀၀၀၀ မှ ဒေါ်လာ ၅၀၀ အထိ အမျိုးမျိုးရှိနေပြီး လုပ်ငန်းလုပ်ကိုင်ခွင့် လိုင်စင်မရှိသော်လည်း ဥပဒေစည်းကြပ်မှု အားနည်းနေသဖြင့် နယ်မြို့များအထိ ပါဆင်းကာ ဈေးကွက်ချဲ့ထွင် နေလျက်ရှိကြောင်း အဆိုပါဈေးကွက်များ အတွင်းမှ သိရသည်။
မြန်မာနိုင်ငံ ငွေချေးသက်သေခံလက်မှတ် လဲလှယ်ရောင်းဝယ်ရေး ဥပဒေတွင်လည်း ထိုသို့စတော့အိတ်ချိန်းနှင့် အလားသဏ္ဌန်တူသည့် လုပ်ငန်းများကို ခွင့်ပြုချက်မဲ့ လုပ်ကိုင်ခွင့်ပြုထားခြင်းမရှိဘဲ လုပ်ဆောင်ပါက ရဲအရေးပိုင်သည့် ပြစ်မှုအဖြစ် သတ်မှတ်ရမည်ဖြစ်ကြောင်း ဖော်ပြပါရှိသော်လည်း အရေးယူမှု အားနည်းနေသဖြင့် Facebook မှပင် ကြောညာကာလူစုနေသော ကုမ္ပဏီများပင် ရှိလာနေသည်။
လက်ရှိအချိန်တွင် မြန်မာနိုင်ငံငွေချေး သက်သေခံလက်မှတ်လုပ်ငန်း ကြီးကြပ်ရေး ကော်မရှင် (SECM) က မည်သည့်ငွေကြေး ဝန်ဆောင်မှုလုပ်ငန်းကိုမှ လိုင်စင်ပေးထားခြင်း မရှိကြောင်း၊ ပြည်ပစတော့အိတ်ချိန်းများတွင် အရောင်းအဝယ် လုပ်နေခြင်းမှာ ဥပဒေနှင့် မညီသဖြင့် အရင်းအနှီးများ ဆုံးရှုံးနိုင်ခြေရှိပြီး မရှင်းလင်းသည်များကို သိရှိလိုပါက (SECM) သို့ ဆက်သွယ်မေးမြန်းနိုင်ကြောင်း အဆိုပါ ကော်မရှင်ဥက္ကဋ္ဌ ဒေါက်တာမောင်မောင်သိမ်းက မကြာမီလပိုင်းအတွင်းက ပြောကြားထားပြီးဖြစ်သည်။
“အစောကြီးကတည်းက သတိပေးတယ်လေ။ မရှင်းလင်းတာတွေ၊ သိချင်တာတွေရှိရင် SECM မေးပါလို့တောင် ပြောထားသေးတယ်” ဟု Eleven Media ၏ ဆက်သွယ်မေးမြန်းမှုကို ဖြေကြားခဲ့သည်။
အဆိုပါ ကုမ္ပဏီများ၏ တရားမဝင်မှုကို တာဝန်ရှိသူများက သတိပေးတားမြစ် ထားသော်လည်း ပြည်သူလူထုအကြား အသိပညာ ပျံ့နှံ့မှုအားနည်းနေသဖြင့် ထိရောက်သည့် သတိပေးမှုများ၊ ဥပဒေပိုင်းအရ စည်းကြပ်မှုများ တိုးမြှင့်လုပ်ဆောင်ရန် လိုအပ်နေကြောင်း ငွေကြေးဈေးကွက် ကျွမ်းကျင်သူများက သုံးသပ်လျက်ရှိသည်။