မြန်မာနိုင်ငံသို့ ရန်ကုန်အပြည်ပြည်ဆိုင်ရာလေဆိပ်မှ နိုင်ငံခြားသား ခရီးသည်များ e-Visa ဖြင့် ဝင်ရောက်မှုမှာ ဖေဖော်ဝါရီလကုန်အထိ နိုင်ငံစုံမှ ခရီးသွား ၅၉၉၁၇ ဦးအထိရှိပြီး၊ အမေရိကန်နိုင်ငံမှ အများဆုံး ဝင်ရောက်ခဲ့ကြောင်း ရန်ကုန်အပြည်ပြည်ဆိုင်ရာလေဆိပ်၊ လူဝင်မှုကြီးကြပ်ရေးဌာနမှ သတင်းရရှိသည်။“e-Visa စနစ် စတင်ခဲ့တဲ့ စက်တင်ဘာ ၁ ရက်ကနေ ဖေဖော်ဝါရီလကုန်အထိ နိုင်ငံပေါင်းစုံကနေ ခရီးသွား ၅၉၉၁၇ ဦး ဝင်ရောက်ခဲ့တာမှာ အမေရိကန်နိုင်ငံက အများဆုံး ဖြစ်ပါတယ်” ဟု ရန်ကုန်အပြည်ပြည်ဆိုင်ရာလေဆိပ်၊ လူဝင်မှုကြီးကြပ်ရေးဌာနမှ တာဝန်ရှိသူတစ်ဦးက ဆိုသည်။အွန်လိုင်းဗီဇာစနစ်ဖြစ်သည့် e-Visa စနစ်အား ၂ဝ၁၄ ခုနှစ် စက်တင်ဘာ ၁ ရက်နေ့မှ စတင်ကာ အရှေ့တောင်အာရှနိုင်ငံများ အပါအဝင် နိုင်ငံပေါင်း ၄၁ နိုင်ငံအား စတင်ခွင့်ပြုခဲ့ပြီး၊ အဆိုပါနိုင်ငံ ၄၁ နိုင်ငံတွင် မြန်မာနိုင်ငံသို့ ခရီးသွားအဝင်များသည့် အီးယူနိုင်ငံအချို့ ပါဝင်ခြင်း မရှိသည့်အတွက် ခရီးသွား ကုမ္ပဏီများ၏ တောင်းဆိုမှုအရ ၂ဝ၁၄ ခုနှစ်၊ အောက်တိုဘာ ၂ ရက်၌ အီးယူနိုင်ငံ အများစု ပါဝင်သည့် နိုင်ငံပေါင်း ၂၄ နိုင်ငံမှ ခရီးသွားများအား e-Visa စနစ်အား ထပ်မံခွင့်ပြုပေးခဲ့သည်။ယင်းပြင် ၂ဝ၁၅ ခုနှစ်၊ ဇန်နဝါရီ ၂ ရက်မှ စတင်ကာ နိုင်ငံပေါင်း ၃၂ နိုင်ငံအား ထပ်မံခွင့်ပြုခဲ့ပြီး၊ e-Visa လျှောက်ထားခွင့်ပြုသည့် နိုင်ငံပေါင်း ၁ဝဝ အထိ ရှိပြီဖြစ်သည်။မြန်မာနိုင်ငံသို့ နိုင်ငံခြားသားခရီးသည်များ e-Visa ဖြင့် ဝင်ရောက်မှုတွင် အမေရိကန်နိုင်ငံမှ အများဆုံးဖြစ်ပြီး၊ ပြင်သစ်၊ ဂျာမနီနှင့် ဗြိတိန်နိုင်ငံတို့မှ ဒုတိယအများဆုံး ဝင်ရောက်ကြောင်း ရန်ကုန်အပြည်ပြည်ဆိုင်ရာလေဆိပ်၊ လူဝင်မှုကြီးကြပ်ရေးဌာနမှ သတင်းရရှိသည်။အဆိုပါ E-Visa စနစ်သည် မြန်မာနိုင်ငံသို့ လာရောက်လည်ပတ်မည့် ကမ္ဘာလှည့်ခရီးသည်များသာ လျှောက်ထားနိုင်မည်ဖြစ်ပြီး အခြားစီးပွားရေး၊ လူမှုရေးကိစ္စများဖြင့် မြန်မာနိုင်ငံသို့ လာရောက်မည့် ခရီးသည်များအတွက် ပါဝင်ခြင်း မရှိသေးကြောင်း သိရသည်။ကမ္ဘာလှည့် ခရီးသည်များအတွက် e-Visa စနစ် အဆင်ပြေစွာ လည်ပတ်နိုင်ပြီးမှသာ အခြားစီးပွားရေးနှင့် လူမှုရေး ဗီဇာများအား ထပ်မံခွင့်ပြုပေးသွားရန် စီစဉ်ထားကြောင်း သိရသည်။ဗီဇာသက်တမ်းမှာ စတင်ခွင့်ပြုချိန်မှ သုံးလအတွင်း မြန်မာနိုင်ငံသို့ တစ်ကြိမ် ဝင်ရောက်ခွင့် ရရှိမည်ဖြစ်ကာ၊ မြန်မာနိုင်ငံတွင် နေထိုင်ခွင့်ရရှိမည့် ရက်ပေါင်းမှာ ၂၈ ရက်ဖြစ်သည်ဟု သိရသည်။ ဗီဇာကြေးအား ဒေါ်လာ ၅ဝ သတ်မှတ်ထားကြောင်း သိရသည်။