ဘာသာရေး ပုတ်ခတ်စော်ကားမှုဥပဒေများကို အလျှံအပယ်အသုံးပြုပြီး နိုင်ငံရေးအကြမ်းဖက်မှုများ ဖြစ်ပွားနေကျ ပါကစ္စတန်နိုင်ငံတွင် ကာတွန်းဆရာများသည် ကြိုးမျှင်တန်းပေါ် လမ်းလျှောက်နေရသည့်အဖြစ်နှင့် ရင်ဆိုင်နေရသည်။ သို့သော် ဘာသာရေးအစွန်းရောက်များအပါအဝင် အင်အားကောင်းသူများကို သရော်လှောင်ပြောင်ရန် နည်းလမ်းကောင်းများကို ကာတွန်းဆရာများက ရှာဖွေနေမြဲဖြစ်သည်။လူဦးရေ သန်း ၂၀၀ နေထိုင်သည့် ရှေးရိုးစွဲအယူဝါဒလွှမ်းမိုးသည့် ပါကစ္စတန်နိုင်ငံသည် ကမ္ဘာပေါ်တွင် ဂျာနယ်လစ်များအတွက် အန္တရာယ်အကြီးမားဆုံးနိုင်ငံအဖြစ်  ရပ်တည်နေဆဲဖြစ်သည်။ သတင်းထောက်များသည် အင်အားကြီးလှသော သူလျှိုအေဂျင်စီများနှင့် အစ္စလာမ္မစ်စစ်သွေးကြွများအကြား၌ ပိတ်မိနေသည်။တမန်တော် မိုဟာမက်ကို သရုပ်ဖော်မှုများကြောင့် ယခုတစ်ပတ်အတွင်း အသတ်ခံလိုက်ရသည့် Charlie Hebdo မဂ္ဂဇင်းမှ သရော်စာရေးကာတွန်းဆရာများ၏ စိတ်ကူးစိတ်သန်းများအားလုံးကို ဖော်ပြခြင်းမပြုသော်လည်း ပါကစ္စတန်၏ ကယ်ရီကေးချားရေးသူများသည် လွတ်လပ်စွာဖော်ထုတ်ပြခွင့်ကို တွန်းအားပေးခဲ့သည့် ဆယ်စုနှစ်အတန်ကြာခဲ့ပြီဖြစ်သည့် အစဉ်အလာကို ဂုဏ်ယူစွာထိန်းသိမ်းထားနိုင်ခဲ့သည်။“လူတိုင်း အန္တရာယ်ရှိနေတာပဲ။ ကျွန်တော် အကြမ်းဖက်မှုနဲ့ အကြမ်းဖက်သမားတွေကို ဆန့်ကျင်တဲ့ ကာတွန်းတွေရေးနိုင်ပါတယ်။ ဒါပေမဲ့ တမန်တော်မိုဟာမက် အကြောင်းတော့မရေးပါဘူး”ဟု ကလောင်အမည် Feica ဟူသော အမည်ဖြင့် ပါကစ္စတန်ကာတွန်းဆရာများအကြား ဂန္ထဝင်တစ်ဦးအဖြစ် သတ်မှတ်ခံထားရသူ ရာဖစ်အာမက် က ပြောကြားခဲ့သည်။“တစ်ယူသန်တွေ၊ အစွဲအလမ်းကြီးသူတွေနဲ့ ဘာသာရေးအစွန်းရောက်တွေကို သရော်တဲ့ကာတွန်းတွေအများကြီး ကျွန်တော်ဆွဲခဲ့ပါတယ်”ဟုလည်း ရာဖစ်အာမက် က ပြောကြားခဲ့သည်။အာမက်သည် စိစစ်ရေးအလွန်ပြင်းထန်ခဲ့သည့် အစ္စလာမ္မစ်ဝါဒီ ဗိုလ်ချုပ်ကြီး ဇီယာအူဟတ်၏ တင်းကျပ်သော အုပ်စိုးမှုအတွင်း အသက် ၇၀ ပြည့်ခါနီးခါမှ ကာတွန်းဆရာဘဝသို့ ကူးပြောင်းလာသူဖြစ်သည်။ပါကစ္စတန်တွင် အလွန်အငြင်းပွားဖွယ်ကောင်းသော ဘာသာရေးပုတ်ခတ်စော်ကားမှု ဥပဒေရှိပြီး တမန်တော်မိုဟာမက်ကို စော်ကားမှုအတွက် သေဒဏ်ချမှတ်ထားသည်။ယခုလက်ရှိတွင် သေဒဏ်ကျခံရမည့် အဆိုပါအမှုဖြင့် စွဲဆိုခံထားရသူ ၁၄ ဦးရှိသည်။ တစ်ခါတစ်ရံတွင် ဆူပူသောင်းကျန်းသောလူအုပ်ကြီးကလည်း ဘာသာရေးပုတ်ခတ်စော်ကားမှုအတွက် ၎င်းတို့၏ကိုယ်ပိုင်ဥပဒေဖြင့် ၎င်းတို့ဘာသာ စီရင်လိုက်ကြသည်လည်း ရှိသည်။ လွန်ခဲ့သည့် နိုဝင်ဘာလအတွင်းကပင် ခရစ်ယာန်ဘာသာဝင် စုံတွဲတစ်တွဲကို ဘာသာရေးပုတ်ခတ်စော်ကားမှုဖြင့် လူအုပ်ကြီးက အုတ်ဖိုကြီးအတွင်းသို့ထည့်ကာ မီးရှို့သတ်ဖြတ်ပစ်ခဲ့ကြသည်။ပါကစ္စတန်တွင် လွတ်လပ်စွာဖော်ထုတ်ပြခွင့်ကို ဖွဲ့စည်းပုံအခြေခံဥပဒေက အာမခံချက်များပေးထားသော်လည်း ယင်းသည် အကန့်အသတ်များရှိနေသည်။ အစ္စလာမ်ဘာသာကို ညှိုးနွမ်းစေမှုနှင့် နိုင်ငံတော်လုံခြုံရေးကို ထိခိုက်စေမှုတို့အား တင်းကျပ်စွာ တားမြစ်ထားသည်။“ကိုယ့်ဘာသာ ဆင်ဆာဖြတ်ရတာမျိုးကတော့ နေရာတိုင်းမှာရှိပါတယ်”ဟု ရာဖစ်အာမက်က ပြောကြားခဲ့သည်။ပါကစ္စတန်သမိုင်းတွင် အာဏာသိမ်းမှု သုံးကြိမ်ပြုလုပ်ခဲ့သည့် အင်အားကြီးသော စစ်တပ်နှင့် သူပုန်ထမှုများ ပြုလုပ်နေသည်မှာ ၁၀ နှစ်ကျော်ကြာခဲ့ပြီဖြစ်သည့် အစ္စလာမ္မစ်အစွန်းရောက်များအကြား ပိတ်မိနေသော ကာတွန်းဆရာများသည် ပုဂ္ဂိုလ်ရေးမဆန်လွန်းစေဘဲ သရော်လှောင်ပြောင်မှုများကို သတိထားရေးဆွဲနေရသည်။“စစ်သွေးကြွတွေ၊ အစွန်းရောက်တွေနဲ့ တာလီဘန်တွေကို ပစ်မှတ်ထားမယ်ဆိုရင် အိုကေပါပဲ။ ဒါပေမဲ့ လူတစ်ဦးတစ်ယောက်ကို ပစ်မှတ်ထားမယ်ဆိုရင်တော့ ပုဂ္ဂိုလ်ရေးဆန်တဲ့ကိစ္စဖြစ်လာပြီး ခင်ဗျားအဖို့ တိုက်ခိုက်ခံရနိုင်ခြေ မြင့်မားလာပါလိမ့်မယ်”ဟု ဝါရင့်ကာတွန်းဆရာ ဆာဘာနာဇာက ပြောကြားခဲ့သည်။လွန်ခဲ့သည့်နှစ်အနည်းငယ်က နာဇာသည် အစ္စလာမ္မာဘတ်ရှိ ဘာသာရေးအစွန်းရောက်သော Red Mosque ကို ကယ်ရီကေး ချားရေးဆွဲခဲ့သောကြောင့် ခြိမ်းခြောက်မှုများ ခံခဲ့ရသည်။ပါကစ္စတန်လူဦးရေ၏ ရာခိုင်နှုန်းသည် စာမတတ်သူများဖြစ်ကြသည်။ အင်္ဂလိပ်ဘာသာဖြင့်ထုတ်ဝေသော စာနယ်ဇင်းများကို မြို့နေပညာတတ်လူနည်းစုကသာ ဖတ်ကြပြီး အူရဒူဘာသာစကားဖြင့် ထုတ်ဝေသော သတင်းစာများမှာမူ နေ့စဉ်သိန်းနှင့်ချီလျက် ရောင်းချနေရသည်။ကာတွန်းများသည်လည်း ပရိသတ်များပေါ်၌သာ အမှီပြုရသည်။ အူရဒူဘာသာစကားဖြင့်ထုတ်ဝေသော ဘာသာစကားများသည် ပို၍ အမျိုးသားရေးဝါဒီဆန်ခြင်း၊ ဘာသာစွဲကြီးခြင်းနှင့် ရှေးရိုးအစဉ်အလာထိန်းသိမ်းခြင်းတို့ရှိပြီး အင်္ဂလိပ်ဘာသာဖြင့် ထုတ်ဝေသော စာနယ်ဇင်းများထက်လည်းပို၍ လူကြိုက်များသောကြောင့် ကာတွန်းဆရာများအနေဖြင့် ညီမျှသော လွတ်လပ်ခွင့်အဆင့်ကို ရရှိကြခြင်းမရှိပေ။“ကျွန်တော့်ရဲ့ ကျင့်ဝတ်ကတော့ အလွန်တင်းကျပ်ပါတယ်။ ဘာသာရေးနဲ့ လိင်ပိုင်းဆိုင်ရာကိစ္စလိုမျိုး အကြောင်းအရာတွေကို လုံး၀ မတို့ထိပါဘူး။ ဒီအကြောင်းအရာနှစ်ခုဟာ ကျွန်တော်တို့ တို့ထိလို့မရတဲ့ အရာတွေပါ။ ဒီတိုင်းပြည်မှာ သာမန်လူတစ်ယောက်အတွက် ပြဿနာတွေအများကြီးရှိပါတယ်။ ကျွန်တော်က အဲဒီလိုသာမန်လူအပေါ်မှာပဲ အမြဲတမ်းအာရုံပြုထားပါတယ်”ဟု ပါကစ္စတန်နိုင်ငံ၏ စာဖတ်ပရိသတ်အများဆုံး Jang နေ့စဉ်ထုတ်သတင်းစာ၏ ကာတွန်းဆရာ ဂျာဝပ်အီဘောက ပြောကြားခဲ့သည်။