ကန့်ကွက်မှုများစွာနှင့် ရင်ဆိုင်ခဲ့ရပြီး တစ်ခန်းရပ်ခဲ့ရ သော ဥရောပစူပါလိဂ်ပြိုင်ပွဲကို ပြန်လည်အသက်သွင်းရန် စီ စဉ်နေရာ ကြာသပတေးနေ့က အဆိုပြုမှုအသစ် ထပ်မံထွက် ပေါ်လာခဲ့ကြောင်း သိရသည်။
ဥရောပစူပါလိဂ်သည် ၂၀၂၁ ခုနှစ် ဧပြီလတွင် စတင်ပေါ်ထွက်လာခဲ့ခြင်းဖြစ်ပြီး ရီးယဲလ်မက်ဒရစ်၊ ဘာစီလိုနာ၊ ဂျူဗင်တပ်စ်အသင်းတို့၏ ဦးဆောင်မှုနှင့်အတူ ဥရောပထိပ်သီးကလပ်အသင်း (၁၂)သင်းက ပါဝင်ယှဉ်ပြိုင်မည်ဟု ကြေညာခဲ့ခြင်းဖြစ်သည်။
သို့သော် ပရိသတ်များ၊ နိုင်ငံအလိုက်ဘောလုံးအဖွဲ့ချုပ်များ၊ ကစားသမားများ၏ကန့်ကွက်မှုကြောင့် (၄၈) နာရီအတွင်းမှာပင် အစီအစဉ်ပျက်ခဲ့ရပြီး မန်ယူ၊ လီဗာပူးလ်၊ မန်စီးတီး၊ ချယ်လ်ဆီး၊ စပါး၊ အာဆင်နယ်၊ အေစီမီလန်၊ အင်တာမီလန်နှင့် အက်သလက်တီကိုအသင်းတို့က ပြန်လည်နုတ်ထွက်ခဲ့ကြသည်။ ရီးယဲလ်၊ ဘာစီလိုနာနှင့် ဂျူဗင်တပ်စ်တို့မှာမူ စူပါလိဂ်ကို အကောင်အထည်ဖော်နိုင်ရန် ဆက်လက်ကြိုးပမ်းနေခဲ့ပြီး A22 ဟူသည့် အားကစားစီမံခန့်ခွဲမှုကုမ္ပဏီကိုထူထောင်ကာ နောက်တစ်ကြိမ် ခြေလှမ်းသစ် စတင်လိုက်ခြင်းဖြစ်သည်။
A22 ၏ အမှုဆောင်ချုပ်ဖြစ်သူ ဘားနတ်ဒ်ရိုင်ချတ်ဒ်က စူပါလိဂ်အတွက် အဆိုပြုမှုအသစ်ကို ထုတ်ပြန်လိုက်ခြင်းဖြစ်ပြီး အဓိကအချက်များမှာ ပြိုင်ပွဲဝင်အသင်း(၈၀) အထိ ရှိမည်ဖြစ်ကြောင်း၊ အတန်းများ ခွဲခြားယှဉ်ပြိုင်သွားမည်ဖြစ်ကြောင်း၊ ပုံသေယှဉ်ပြိုင်ခွင့်ရမည့်အသင်းမရှိဘဲ စွမ်းဆောင်ရည်အပေါ်သာ အခြေပြုဆုံးဖြတ်သွားမည်ဖြစ်ကြောင်း၊ ကလပ်အသင်းများအနေဖြင့် တစ်ရာသီလျှင် အနည်းဆုံး (၁၄)ပွဲ ယှဉ်ပြိုင်ကစားရမည်ဖြစ်ကြောင်း သိရသည်။
ဥရောပစူပါလိဂ်သည် UEFA ၏ ချန်ပီယံလိဂ်ပြိုင်ပွဲ နေရာတွင် အစားဝင်နိုင်ရန် ရည်ရွယ်ခြင်းဖြစ်ပြီး ကလပ်အသင်းများအနေဖြင့် အကျိုးအမြတ်များ ပိုမိုရရှိစေရန် ရည်ရွယ်ခြင်းဖြစ်ကြောင်းလည်း သိရသည်။
ထို့ပြင် အပြောင်းအရွှေ့စျေးကွက်၌ ပရီးမီးယားလိဂ်နှင့် အခြားလိဂ်များအကြား ငွေကြေးသုံးစွဲနိုင်မှု ဟန်ချက်မညီဖြစ်လာသည့် အခြေအနေကို အမြန်ဆုံးထိန်းသိမ်းနိုင်ရန် ရည်ရွယ်ထားကြောင်းလည်း သိရသည်။
ဘားနတ်ဒ်ရိုင်ချတ်ဒ်က ဥရောပဘောလုံးလောကသည် ပြိုလဲသွားနိုုင်သည့်အန္တရာယ်ရှိနေပြီး အပြောင်းအလဲပြုလုပ်ရမည့်အချိန် ရောက်နေပြီဖြစ်သောကြောင့် စူပါလိဂ်ကို အသက်သွင်းရန် ကြိုးပမ်းနေခြင်းဖြစ်ကြောင်း ပြောကြားခဲ့သည်။
