၀ိုင်ဖိုင်၊ ဖိုင်ဘာအင်တာနက်လိုင်းများနှင့် MPT အင်တာနက်လိုင်းများ နှေးကွေးပြတ်တောက်နေ ကြောင်း သုံးစွဲသူများထံမှ သိရသည်။
သြဂုတ် ၁၀ ရက် ညပိုင်းမှ စတင်ကာ အင်တာနက်လိုင်းများ နှေးကွေးပြတ်တောက်လျက်ရှိပြီး သြဂုတ် ၁၁ ရက် နံနက်ပိုင်းတွင်လည်း ဆက်လက်ဖြစ်ပွားလျက်ရှိကြောင်း သုံးစွဲသူများကပြောကြားသည်။
“ အခုက အိမ်မှာတပ်ထားတဲ့ အင်တာနက်လိုင်းတွေက မတက်တော့ဘူး။ MPT မိုဘိုင်းဒေတာက လည်း မတက်တော့ တယ်လီနောနဲ့ ပြောင်းသုံးနေရတယ်။ တယ်လီနောကတော့ လိုင်းမပြတ်သေးဘူး။ လိုင်း လည်းတက်တယ်။ ပုံမှန်အတိုင်းပဲ သုံးလို့ရနေတယ်” ဟု ရန်ကုန်မြို့တွင် အင်တာနက်သုံးစွဲသူတစ်ဦးက ပြော ကြားသည်။
ထို့ပြင် ရန်ကုန်တိုင်းအတွင်း သုံးစွဲနေသည့် ပုဂလိက ၀ိုင်ဖိုင်အင်တာနက်လိုင်းများ၊ ဖိုင်ဘာအင်တာ နက်လိုင်းများမှာလည်း နှေးကွေးပြတ်တောက်မှုများဖြစ်နေသဖြင့် သုံးစွဲသူများ အခက်တွေ့လျက်ရှိကြောင်း သိရသည်။
“ ဖိုင်ဘာလိုင်းတွေပါ မရတော့ဘူး။ ဒီနေ့မနက်မှာ သုံးရတာအဆင်မပြောတော့ဘူး” ဟု ဖိုင်ဘာအင် တာနက် သုံးစွဲသူတစ်ဦးက ပြောကြားသည်။
သို့သော် Atom၊ အော်ရီဒူး၊ MyTel စသည့် မိုဘိုင်းလ်ဒေတာများမှာ ပြတ်တောက်မှုမရှိသေးကြောင်း၊ အနည်းငယ်နှေးကွေးသည့် အခြေအနေမှအပ ပုံမှန်အတိုင်း သုံးစွဲနိုင်သေးကြောင်း သုံးစွဲသူများ၏ ပြောကြား ချက်အရ သိရသည်။
လက်ရှိတွင် အင်တာနက်ဝန်ဆောင်မှုပေးနေသည့် ကုမ္ပဏီများမှ အင်တာနက်လိုင်းများအခက်တွေ့ နေသည့်အခြေအနေများကို သုံးစွဲသူများအား အသိပေးအကြောင်းကြားထားသည်ကို တွေ့ရသည်။
“ မနေ့က ညနေပိုင်းအချိန်မှစ၍ တနိုင်ငံလုံး အတိုင်းအတာအနေဖြင့် Sea-Me-We-5 fiber fail down ဖြစ်နေပါသဖြင့် လိုင်းများနှေးကွေးခြင်း၊အင်တာနက် မရတော့ခြင်းများ ဖြစ်နိုင်ပါသည်။ လက်ရှိမှာ လိုင်းများ ပြန်လည်ကောင်းမွန်အောင်အမြန်ဆုံး ဆောင်ရွက်နေပါသည်။ ယခုလိုဖြစ်ပွားမှုအတွက် MPTမှ သုံးစွဲသူ မိဘပြည်သူများကို အနူးအညွတ်တောင်းပန်အပ်ပါသည်ခင်ဗျာ” ဟု MPT Fiber Internet Services က ထုတ်ပြန်ထားသည်။
အလားတူ Unilink Myanmar ကလည်း “Unilink Myanmar အသုံးပြုသူများခင်ဗျ ယခုအခါ နေရာအချို့တွင် Backbone Fiber Issue ဖြစ်ပေါ်နေပါသောကြောင့် Internet အသုံးပြုရာတွင် အဆင်မပြေ မှုများ ကြုံတွေ့ရနိုင်ပါတယ်ခင်ဗျာ။ အထက်ပါဖြစ်ပွားလျက်ရှိသော Issue ကို သက်ဆိုင်ရာ Service Team များမှ အမြန်ဆုံးပြန်လည်ပြုပြင်လျက်ရှိပါကြောင်း အသိပေးအကြောင်းကြားအပ်ပါတယ်ခင်ဗျာ။ အဆင်မပြေမှု များ ဖြစ်ပေါ်သွားသည့်အတွက်လည်း အနူးအညွတ်တောင်းပန်အပ်ပါတယ်ခင်ဗျာ” ဟု ရေးသားထားသည်။
စင်ကာပူမှတစ်ဆင့် ဥရောပသို့ ချိတ်ဆက်ထားပြီး မြန်မာနိုင်ငံကလည်း ချိတ်ဆက်ထားသည့် ပင်လယ် ရေအောက်အင်တာနက်လိုင်းမှာ အပြစ်ဖြစ်ပေါ်နေပြီး အရန်ချိတ်ဆက်ထားသည့် အင်တာနက်လိုင်းမှ တစ်ဆင့် ပြန်လည်ဖြန့်ဝေနေရသဖြင့် အင်တာနက်လိုင်းများ နှေးကွေးပြတ်တောက်မှုဖြစ်ပေါ်နေခြင်းဖြစ် ကြောင်း၊ ပြတ်တောက်နေသည့် အင်တာနက်လိုင်းအား ပြန်လည်ပြုပြင်နေသည်ဟု ဆက်သွယ်ရေးညွန်ကြားမှု ဦးစီးဌာနမှ တာဝန်ရှိသူတစ်ဦးက မီဒီယာအချို့ကို ဖြေကြားထားသည်။
