တိုင်းပြုပြည်ပြုပုဂ္ဂိုလ်တစ်ဦးဟူသည် နိုင်လိုမင်းထက်ပြုမူသူတစ်ဦး သို့မဟုတ် အာဏာရှင်တစ်ဦး မဟုတ်ပါ။ သူသည် လွတ်လပ်သောပြည်သူများ၏ လွတ်လပ်သော ခေါင်းဆောင်တစ်ဦးဖြစ်ပြီး အဓိကအရည်အသွေး လေးရပ်ရှိရသည်။
အခြေခံသဘောတရားခိုင်မာမှု - တိုင်းပြုပြည်ပြုပုဂ္ဂိုလ်တစ်ဦးသည် သူ၏ ပလက်ဖောင်းကို ခိုင်မာသော၊ အပြောင်းအလဲမရှိသော၊ အခြေခံကျသော အမှန်တရားများပေါ်၌ တည်ဆောက်သည်။ ယင်းအမှန်တရားများသည် သူ၏အဓိကမဏ္ဍိုင်ဖြစ်သော ဆက်စပ်လွှမ်းခြုံထားသော အတွေးအခေါ်အပေါ်၌ သူယုံကြည်ထားသည့် အရာများဖြစ်သည်။ ယင်းတို့သည် မုန်တိုင်းတို့၏ ပြင်းထန်စွာ ရိုက်ပုတ်ခြင်းခံရသော အိမ်တစ်လုံး၏ အခြေခံအုတ်မြစ်ကဲ့သို့ပင်ဖြစ်သည်။ အတိုက်အခံပြုမှုများနှင့် စိန်ခေါ်မှုများသည် ပေါ်ပေါက်၍ လာမည်ဖြစ်ပြီး အချိန်များသာ ပြောင်းလဲသွားသော်လည်း အခြေခံအုတ်မြစ်သည် မယိမ်းမယိုင်ဘဲ ကျန်ရစ်မြဲဖြစ်ရသည်။ တိုင်းပြုပြည်ပြုပုဂ္ဂိုလ်တစ်ဦးသည် သူ၏မူဝါဒအသေးစိတ်အချက်များနှင့် ယင်းမူဝါဒများကို ရယူရန် နည်းလမ်းများ ပြောင်းလဲနိုင်သော်လည်း အခြေခံသဘောတရားများမှာမူ မပြောင်းမလဲ ကျန်ရစ်မြဲသာဖြစ်သည်။
ကိုယ်ကျင့်တရားဆိုင်ရာအတိုင်းအတာ - စစ်မှန်သော တိုင်းပြုပြည်ပြုပုဂ္ဂိုလ်တစ်ဦးသည် သူ၏ ကိုယ်ပိုင်ကိုယ်ကျင့်တရားဆိုင်ရာ အတိုင်းအတာဖြင့်သာ ဆုံးဖြတ်ချက်များကို ချမှတ်တတ်သူဖြစ်သည်။ သူသည် မီးစင်ကြည့်ကနေသူတစ်ဦးမဟုတ်ဘဲ လုံးဝမှန်ကန်သည့် အမှန်တရားများကိုသာ ယုံကြည်သူဖြစ်သောကြောင့် သူ၏ ကိုယ်ကျင့်တရားဆိုင်ရာ အတိုင်းအတာသည် ဓမ္မနှင့် အဓမ္မတရားကို သိရှိခြင်းအပေါ်၌သာ အခြေပြုသည်။ တစ်စုံတစ်ရာသည် မှားယွင်းနေပါက သူသည် မှားယွင်းသည်ဟုသာ ရိုးရှင်းစွာဆိုပြီး သူအင်အားရှိသမျှ အရာရာဖြင့် အဓမ္မတရားကို ဆန့်ကျင်မည်ဖြစ်သည်။ တစ်စုံတစ်ရာသည် မှန်ကန်သည်ဟုဆိုပါက ယင်းဓမ္မတရားကို ထိန်းသိမ်းရေးနှင့် ဖြန့်ချိရေးတို့အတွက် အတိုက်အခံမှန်သမျှကို ကျော်လွှားရန်ဆန္ဒရှိသူဖြစ်သည်။ တိုင်းပြုပြည်ပြုပုဂ္ဂိုလ်တစ်ဦးသည် ရည်မှန်းချက်ကြီးသူဖြစ်ပြီး အာဏာရှိသည့် အနေအထားတစ်ရပ်ကို ရယူရမည်ဖြစ်သည်။ သို့သော် ၎င်းအနေဖြင့် ထိပ်ပိုင်းသို့ ရောက်ရေးအတွက် လုပ်သင့်သည့်အရာများနှင့် မလုပ်သင့်သည့် အရာများကို ကိုယ်ကျင့်တရားအရ ကွဲကွဲပြားပြားနားလည်သူဖြစ်သည်။ သူသည် သမာဓိရှိသူဖြစ်ပြီး အမှန်တရားကိုသာ ပြောဆို၏။ သူသည် ကိုယ်ကျင့်တရားအရရရှိသော အာဏာဖြင့်သာ ဦးဆောင်ပြီး သူ၏နိုင်ငံသားအားလုံးကို ကိုယ်စားပြုသူဖြစ်သည်။
အမြော်အမြင် - တိုင်းပြုပြည်ပြုပုဂ္ဂိုလ်တစ်ဦးသည် သူ၏နိုင်ငံနှင့် သူ၏ပြည်သူများ ဖြစ်လာနိုင်သည်များနှင့်ပတ်သက်၍ ရှင်းလင်းသော အမြော်အမြင်ရှိသူူဖြစ်သည်။ သူသည် ပြည်သူပြည်သားများကို ခေါ်ဆောင်ပေးလိုသော နေရာနှင့် ယင်းနေရာသို့ ရောက်ရှိရန် လုပ်ဆောင်ရမည့်အရာများကို သိရှိသူဖြစ်သည်။ သူသည် လောက၌ရှိသော ပြဿနာများကို သိမြင်နိုင်စွမ်းရှိသူဖြစ်ပြီး ရေတိုသာမက ရေရှည်အတွက်ပါ ကောင်းမွန်သည့် ဖြေရှင်းမှုများဖြင့် ကျော်လွှားနိုင်စွမ်းရှိသူဖြစ်သည်။ သူသည် ယခုမျက်မှောက်ကာလတစ်ခုတည်းကိုသာ ကြည့်သူမဟုတ်ဘဲ အနာဂတ်မျိုးဆက်များ ဆက်ခံရမည့် လောကကိုပါ ရှုမြင်သူဖြစ်သည်။
အမြော်အမြင်အတိုင်းရယူရန် အများသဘောတူညီချက်တစ်ရပ်ကို တည်ဆောက်နိုင်စွမ်း - နိုင်ငံရေးသမားတစ်ဦးသည် မူဝါဒခိုင်မာမှု၊ ကိုယ်ကျင့်တရား အတိုင်းအတာတစ်ရပ်နှင့် အမြော်အမြင်တစ်ရပ် ရှိနိုင်သည်။ သို့သော်အမြော်အမြင်အတိုင်းရယူရန် အများသဘောတူညီချက်တစ်ရပ်ကို တည်ဆောက်နိုင်စွမ်း မရှိပါက မူဝါဒများ၊ ဥပဒေများနှင့် သမိုင်းလမ်းကြောင်းများကို ပြောင်းလဲရန် သူ၏အားထုတ်မှုများသည် အချည်းနှီးသာဖြစ်လိမ့်မည်။ တိုင်းပြုပြည်ပြုပုဂ္ဂိုလ်တစ်ဦး၏ အောင်မြင်မှုသည် သူ၏အတွေးအခေါ်နှင့် ပတ်သက်သည့် ကောင်းမွန်မှုကို သူ၏နိုင်ငံသားများ ယုံကြည်အောင် ပြုလုပ်နိုင်စွမ်းပေါ်၌ မူတည်နေသည်။
မည်သို့ပင်ဆိုစေကာမူ နိုင်ငံတစ်နိုင်ငံအား တည်ဆောက်ရာတွင် အမှန်တကယ် လိုအပ်သည်မှာ မရေရာသည့် စကားများကိုသာ ပြောတတ်သည့် နိုင်ငံရေးသမားများမဟုတ်ဘဲ စစ်မှန်သည့် တိုင်းပြုပြည်ပြုပုဂ္ဂိုလ်များသာ ဖြစ်ပါကြောင်း The Daily Eleven သတင်းစာက ရေးသားအပ်ပါသည်။
သြဂုတ် ၉ ရက် ထုတ် The Daily Eleven သတင်းစာ အယ်ဒီတာ့ အာဘော်
