ပြီးခဲ့သည့်ဒီဇင်ဘာလက နှလုံးရောဂါပြဿနာကြောင့် ကစားသမားဘဝမှ အနားယူခဲ့ရသည့် အာဂျင်တီးနားတိုက်စစ်မှူးဟောင်း အဂွဲရိုးသည် အမေရိကန်ကုမ္ပဏီကြီးများဖြစ်သည့် Disney၊ ESPN တို့နှင့် အကျိုးတူပူး ပေါင်းဆောင်ရွက်သွားမည်ဟု အတည်ပြုကြေညာခဲ့သည်။
အဂွဲရိုးသည် ယင်းကုမ္ပဏီများနှင့်အတူ အစီအစဉ်အမျိုးမျိုး၏ Streaming Service ပိုင်းတွင် လက်တွဲ လုပ်ဆောင်သွားရန် ကာလရှည်သဘောတူစာချုပ် ချုပ်ဆိုခဲ့ခြင်းလည်း ဖြစ်သည်။ "Disney၊ ESPN၊ Disney+နဲ့ Star+က အစီအစဉ် အားလုံးက စိတ်လှုပ်ရှားစရာ အရမ်းကောင်းတယ်လို့ ကျွန်တော်တို့ ယူဆပါတယ်။ ကျွန်တော်အရမ်းနှစ်သက်တဲ့ Kru Esports အသင်းအပါအဝင် ပလက်ဖောင်းများစွာမှာ လက်တွဲလုပ်ဆောင်သွားမှာပါ။ ဒီသဘောတူညီမှုအတွက် ကျွန်တော် အရမ်းစိတ်လှုပ်ရှားနေပြီး အသင့်လည်း ဖြစ်နေပါပြီ" ဟု အဂွဲရိုးက ပြောကြားခဲ့သည်။
အသက်(၃၃)နှစ်အရွယ်ရှိပြီဖြစ်သူ အဂွဲရိုးသည် ကစားသမားဘဝမှ အနားယူပြီးကတည်းက အမေရိကန်နာမည်ကြီး Live Streaming Service တစ်ခုဖြစ်သည့် Twich ၌ Streaming Service တွင် ပြုလုပ်နေလျက်ရှိကာ Follower အရေအတွက်မှာလည်း (၃.၉)သန်းနီးပါးအထိ ရှိလာခဲ့ကြောင်း သိရသည်။
အဂွဲရိုးသည် ပရီးမီးယားလိဂ်ထိပ်သီးကလပ် မန်စီးတီးအသင်းတွင် ဆယ်စုနှစ်တစ်ခုကြာ ကစားပြီးနောက် ပြီးခဲ့သည့်နှစ်နွေရာသီကမှ ဘာစီလိုနာအသင်းသို့ ပြောင်းရွှေ့ခဲ့သော်လည်း လအနည်းငယ်အကြာတွင် ဘောလုံးလောကကို ကျောခိုင်းခဲ့ရခြင်းဖြစ်သည်။
