ပြီးခဲ့သည့် စနေနေ့က ကစားခဲ့သော ပရီးမီးယားလိဂ်ပွဲစဉ် လီဗာပူးလ်-ဆောက်သမ်တန်ပွဲတွင် (၄-၀)ဂိုးဖြင့် အနိုင်ရရှိပြီးနောက် ယခုရာသီပရီးမီးယားလိဂ်ပြိုင်ပွဲတွင် လီဗာပူးလ်အသင်း၏သွင်းဂိုးအရေအတွက် စုစုပေါင်းမှာ(၃၉)ဂိုး အထိ ရှိလာခဲ့ပြီဖြစ်သည်။
ယင်းအရေအတွက်မှာ ယခုရာသီ ပရီးမီးယားလိဂ်ပြိုင်ပွဲဝင်အသင်း(၂၀)အနက် အများဆုံးအရေအတွက်ဖြစ်သလို၊ လီဗာပူးလ်အသင်း၏အင်္ဂလန်အမှတ်ပေးပြိုင်ပွဲ(ထိပ်တန်းလိဂ်)သမိုင်းတစ်လျှောက်၌လည်း ပွဲစဉ်(၁၃)အပြီးတွင် အများဆုံးအရေအတွက်အဖြစ် စံချိန်တင်ခဲ့ကြောင်း သိရသည်။
လီဗာပူးလ်အသင်းအနေဖြင့် ယခုရာသီ ပရီးမီးယားလိဂ်ပြိုင်ပွဲတွင် တစ်ပွဲပျမ်းမျှ(၃)ဂိုးနှုန်း သွင်းယူထားခြင်းဖြစ်ပြီး ယင်းဂိုး(၃၉)ဂိုးကို အသင်းရှိ ကစားသမား(၁၃)ဦးက သွင်းယူခဲ့ခြင်းဖြစ်သည်။
ယခုရာသီတွင် လီဗာပူးလ်အသင်းအတွက် ဂိုးအများဆုံးအဖြစ် အီဂျစ်တိုက်စစ်မှူး ဆာလာက သွင်းယူထားပြီး ပရီးမီးယားလိဂ်ဂိုး(၁၁)ဂိုးအပါအဝင် ပြိုင်ပွဲစုံ(၁၇) ဂိုး သွင်းယူထားသည်။
ဆာလာသည် ယခုရာသီ၌ လီဗာပူးလ်အသင်းအတွက် ဂိုးဖန်တီးပေးပို့မှု(၈)ကြိမ်ကိုလည်း ပြုလုပ်ထားနိုင်ခဲ့ရာ ၎င်း၏ယခုရာသီ ဂိုးပါဝင်ပတ်သက်မှု(ဂိုးသွင်း+ ဂိုးဖန်တီးပေးပို့မှု)မှာ (၂၅)ကြိမ်အထိရှိနေပြီဖြစ်သည်။
ယင်းမှာ (နိုဝင်ဘာ ၂၇ ရက်နေ့ပွဲများအပြီးမှတ်တမ်းများအရ) ပရီးမီးယားလိဂ်ကစားသမားများထဲတွင် အခြားမည်သည့်ကစားသမားထက်မဆို (၂)ဆမက များပြားသောပမာဏဖြစ်ကြောင်း ဘောလုံးအချက်အလက်ဝက်ဘ်ဆိုက်ဖြစ်သည့် Opta Joe က ဖော်ပြခဲ့သည်။
ထို့ပြင် ဆာလာအနေဖြင့် ပရီးမီးယားလိဂ်ပြိုင်ပွဲ၌ ဂိုးပါဝင်ပတ်သက်မှုစုစုပေါင်းမှာ(၁၅၀)ဂိုး (၁၀၈ ဂိုးသွင်း+ ၄၂ ဂိုး ဖန်တီးပေးပို့)အထိ ရှိသွားခဲ့ပြီဖြစ်ရာ ပရီးမီးယားလိဂ်ပြိုင်ပွဲသမိုင်းတစ်လျှောက် ကစားသမားများထဲတွင် ယင်းမှတ်တမ်းကို တတိယပွဲအနည်းဆုံးဖြင့်ရယူနိုင်သည့် ကစားသမားအဖြစ် မှတ်တမ်းဝင်ခဲ့ကြောင်း သိရသည်။
နယူးကာဆယ်ဂန္ထဝင်ကစားသမား အလန်ရှီးယားက ဂိုးပါဝင်ပတ်သက်မှု(၁၅၀)ဂိုးကို ပွဲအရေအတွက်(၁၄၈)ပွဲဖြင့်လည်းကောင်း၊ အာဆင်နယ်ဂန္ထဝင်ကစားသမား အွန်နရီက ပွဲအရေအတွက်(၁၆၃)ပွဲ ဖြင့်လည်းကောင်း ရယူနိုင်ခဲ့ပြီး ယခုဆာလာက ပွဲအရေ အတွက် (၁၇၁)ပွဲဖြင့် ယင်းမှတ်တမ်းကို ရယူနိုင်ခဲ့ခြင်းဖြစ်သည်။
