နေပြည်တော်အဝင်အထွက်ဂိတ်များတွင် ကျန်းမာရေးစစ်ဆေးမှုများပြလုပ်နေသလို Stay at Home မြို့နယ်များမှလာရောက်သူများကို Quarantine ထားရှိပြီး ဓာတ်ခွဲနမူနာရယူစစ်ဆေးလျက်ရှိကြောင်း နိုင်ငံတော်စီမံအုပ်ချုပ်ရေးကောင်စီ သတင်းထုတ်ပြန်ရေးအဖွဲ့က ပြောကြားသည်။
“ကျန်းမာရေးနှင့် အားကစားဝန်ကြီးဌာနအနေနဲ့ COVID-19 ရောဂါစောင့်ကြပ်ကြည့်ရှုခြင်း၊ ကာကွယ်ထိန်းချုပ်ခြင်းနှင့် တုံ့ပြန်ရေးလုပ်ငန်းများကို COVID-19 ရောဂါကာကွယ်၊ ထိန်းချုပ်၊ ကုသရေးဗဟိုကော်မတီ၏ လမ်းညွှန်ချက်နဲ့အညီစဉ်ဆက်မပြတ် ဆောင်ရွက်လျက်ရှိရာမှာ နေပြည်တော်ကောင်စီနယ်မြေမှာလည်း အထက်ပါလုပ်ငန်းများကို အထူးဦးစားပေးဆောင်ရွက်လျက်ရှိပါတယ်။ ယခုလက်ရှိအနေနဲ့ နေပြည်တော် ပြည်သူ့ကျန်းမာရေး/ကုသရေး ဦးစီးဌာနအနေနဲ့ နေပြည်တော်အဝင်အထွက် ဂိတ်များမှာ ကျန်းမာရေးဝန်ထမ်းများက ခရီးသွားများအား ကိုယ်အပူချိန်တိုင်းတာခြင်း၊ နေရပ်လိပ်စာရယူခြင်းနဲ့ Stay at Home မြို့နယ်များမှ လာရောက်သူများအား နေပြည်တော်စည်ပင် တည်းခိုဆောင်များမှာ စနစ်တကျ Quarantine ထားရှိပြီး ဓာတ်ခွဲနမူနာရယူစစ်ဆေးလျက်ရှိပါတယ်” ဟု သတင်းထုတ်ပြန်ရေးအဖွဲ့က ပြောကြားသည်။
နေပြည်တော်ကောင်စီနယ်မြေအတွင်း၌ ခရီးသွားများမှတစ်ဆင့် COVID-19 ကူးစက်ပျံ့နှံ့မှုမရှိစေရေးအတွက် ကျန်းမာရေးနှင့် အားကစားဝန်ကြီးဌာနအနေဖြင့် နေပြည်တော်ကောင်စီနှင့်ညှိနှိုင်း၍ ကျန်းမာရေးစစ်ဆေးခြင်းလုပ်ငန်းများ ဆောင်ရွက်မည့်နေရာများကို သတ်မှတ်မည်ဟု သိရသည်။
“COVID-19 ရောဂါကာကွယ်ထိန်းချုပ်ရေး လုပ်ငန်းလမ်းညွှန်များအား ပြန်လည်သုံးသပ်ကာ ဝင်ထွက်ဂိတ်များမှာ ပိုမိုအားဖြည့်ဆောင်ရွက်သွားမည့် လုပ်ငန်းများကတော့ နေပြည်တော်သို့ အခြားတိုင်းဒေသကြီး/ပြည်နယ်များမှ ခရီးသွားပြည်သူများ လာရောက်ပါက ကိုယ်အပူချိန်တိုင်းတာခြင်း လုပ်ငန်းလမ်းညွှန်အတိုင်း ဆောင်ရွက်ပြီး ကိုယ်အပူချိန်မြင့်လာပါကလည်းကောင်း၊ သံသယလက္ခဏာ တွေ့ရှိရပါကလည်းကောင်း၊ လက်ချောင်းထိပ်တွင် Pulse Oximeters ဖြင့် သွေးတွင်းအောက်ဆီဂျင် (SpO2) တိုင်းတာခြင်းများအား ဆောင်ရွက်ပြီး SpO2 ၉၂ ရာခိုင်နှုန်းအောက်ရှိသော ခရီးသွားများအား ခေတ္တနားနေစေ၍ ပြန်လည်တိုင်းတာရန်နှင့် ပြန်လည်တိုင်းတာရာတွင် သွေးတွင်းအောက်ဆီဂျင် ၉၂ ရာခိုင်နှုန်းအောက်ရှိပါကလည်းကောင်း၊ RDT ဖြင့် စစ်ဆေးဆောင်ရွက်မှာ ဖြစ်ပါတယ်။ RDT နဲ့ စစ်ဆေးဖို့ လိုအပ်ပါက ဆေးစစ်ကုန်ကျစရိတ်ကို သကာယကံရှင်များက ပေးဆောင်ရပါမည်” ဟု သတင်းထုတ်ပြန်ရေးအဖွဲ့က ပြောကြားထားသည်။
Stay at Home သတ်မှတ်ထားသော မြို့နယ်များမှ နေပြည်တော်သို့ ဝင်ရောက်လာသူများကို အသွားအလာကန့်သတ်မှု ၁၀ ရက် ထားရှိမည်ဖြစ်ပြီး သုံးရက်မြောက်နေ့တွင် ပထမအကြိမ် RDT Test Kit ဖြင့် စစ်ဆေးခြင်းနှင့် ခုနစ်ရက်မြောက်နေ့တွင် ဒုတိယအကြိမ် RT_PCR ဖြင့် စစ်ဆေးခြင်းများကို ဆောင်ရွက်မည်ဖြစ်ကြောင်း၊ ထို့ပြင် COVID-19 ရောဂါဖြစ်ပွားမှု အခြေအနေများအား စဉ်ဆက်မပြတ်သုံးသပ်ပြီး လိုအပ်သည့် ကာကွယ်ထိန်းချုပ်ရေး လုပ်ငန်းစဉ်များကို ဆက်လက်ဆောင်ရွက်သွားမည်ဖြစ်ကြောင်း သိရသည်။
