ပြီးခဲ့သည့် စနေနေ့က ကစားခဲ့သော ပရီးမီးယားလိဂ်ပွဲစဉ် မန်ယူ (၃-၃) အဲဗာတန်ပွဲအပြီးတွင် မန်ယူအသင်းနည်းပြ ဆိုးလ်ရှားက မိမိတို့အသင်းအနေဖြင့် ချန်ပီယံဆုကို ပစ်မှတ်ထားနိုင်ခြင်းမရှိတော့ဟု ပြောကြားခဲ့ရာ ယင်းစကားကို ရုပ်သံဘောလုံးဝေဖန်သူ ဂျေမီရက်နက်ပ်က ဝေဖန်ခဲ့ပြီး မန်ယူအသင်းအနေဖြင့် ယခုရာသီတွင် ချန်ပီယံဖြစ်မည်ဟု မိမိကိုယ်မိမိယုံကြည်ချက် ထားရှိသင့်ကြောင်း သုံးသပ်ပြောကြားခဲ့သည်။
ယင်းပွဲအပြီးတွင် ဆိုးလ်ရှားက Sky Sports သတင်းဌာနနှင့်တွေ့ဆုံရာ၌ ''ကျွန်တော်တို့အနေနဲ့ အမှတ်ပေးချန်ပီယံဆုကို ရယူနိုင်တယ်လို့ ပြောမနေပါဘူး။ လက်ရှိအချိန်မှာ ကျွန်တော်တို့ဟာ အလှမ်းကွာဝေးနေပါတယ်။ ကျွန်တော်တို့ ချန်ပီယံဆုကို မစဉ်းစားသင့့်ပါဘူး''ဟု ပြောကြားခဲ့ခြင်းဖြစ်သည်။ ဂျေမီရက်နက်ပ်က မန်ယူအသင်းအနေဖြင့် ယခုရာသီကို ထူးခြားသောရာသီတစ်ခုအဖြစ် သတ်မှတ်ပြီး ကြိုးစားကစားသင့်ကြောင်း၊ COVID-19 ကပ်ရောဂါကြောင့် အသင်းတော်တော်များများ အနေအထားပျက်ယွင်းပြီး မတည်မငြိမ်ဖြစ်နေချိန်တွင် ၎င်းတို့အနေဖြင့် ချန်ပီယံဆုကို ရယူနိုင်မည်ဟု ယုံကြည်ချက်ထားရှိသင့်ကြောင်း သုံးသပ်ပြောကြားခဲ့သည်။
ဂျေမီရက်နက်ပ်က ''သူတို့ (မန်ယူအသင်း)အနေနဲ့ အမှတ်ပေးချန်ပီယံဆုကို ပစ်မှတ်ထားသင့်ပါတယ်။ ဒီနှစ်က ထူးခြားတဲ့နှစ်တစ်နှစ်ပါ။ ဒီလိုမျိုး အခွင့်အရေးကောင်းကို နောက်ထပ်ရဖို့မလွယ်ပါဘူး။ လီဗာပူးလ်အသင်းဆိုရင်လည်း ကစားသမားတွေကို ဒဏ် ရာကြောင့် ဆုံးရှုံးနေရတာပါ။ ဒါကြောင့် မန်ယူအသင်းဟာ ယုံကြည်ချက်အပြည့်ထားပြီး ရှေ့ကို ချီတက်သင့်ပါ တယ်။ ဒီနှစ်ဟာ ဘာမဆိုဖြစ်နိုင်တဲ့နှစ်တစ်နှစ်ပါ။ သူတို့အသင်းက ကလေးတွေနဲ့ ဖွဲ့စည်းထားတဲ့အသင်း မဟုတ်ပါဘူး။ သူတို့က အတွေ့အကြုံပြည့်ဝတဲ့အသင်းတစ်သင်းပါ။ ဒါကြောင့် ဆိုးလ်ရှားအနေနဲ့ သူတို့အသင်းဟာ ချန်ပီယံဆုကို ရယူနိုင်တယ်လို့ပဲ ပြောသင့်ပါတယ်''ဟု ပြောကြားခဲ့သည်။ မန်ယူအသင်းသည် ၂၀၁၂-၁၃ ဘောလုံးရာသီတွင် (ဖာဂူဆန်နောက်ဆုံးကိုင်တွယ်သည့်ရာသီ) ပရီးမီးယား လိဂ်ချန်ပီယံဆုကို နောက်ဆုံးရရှိခဲ့ခြင်းဖြစ်ပြီး ယင်းဆု နှင့် (၈)နှစ်ကြာ ဝေးကွာလျက်ရှိသည်။
