ကုလသမဂ္ဂ၏ ၇၅ ကြိမ်မြောက် အထွေထွေညီလာခံတွင် မြန်မာနိုင်ငံ၏ လူ့အခွင့်အရေးအခြေအနေနှင့် ဘင်္ဂါလီ (မူရင်း၌ ရိုဟင်ဂျာဟု ဖော်ပြ) အရေးကိစ္စများနှင့် စပ်လျဉ်းသည့် အဆိုပြုချက်တစ်ရပ်ကို မဲခွဲဆုံးဖြတ်ခဲ့ရာ၌ တရုတ်နှင့် ရုရှားနိုင်ငံတို့က မြန်မာနိုင်ငံဘက်က ရပ်တည်ခဲ့ကြပြီး အိန္ဒိယနိုင်ငံကမူ မဲမပေးဘဲ ကြားနေခဲ့သည်။
၂၀၂၀ ပြည့်နှစ်၏ နောက်ဆုံးရက်ဖြစ်သည့် ဒီဇင်ဘာ ၃၁ ရက်တွင် ၇၅ ကြိမ်မြောက် ကုလအထွေထွေညီလာခံ၏ ၄၈ ကြိမ်မြောက် အစည်းအဝေးအတွင်း ယင်းအဆိုပြုချက်ကို မဲခွဲခဲ့ခြင်းဖြစ်သည်။
ကချင်၊ ရခိုင်၊ ချင်းနှင့် ရှမ်းပြည်နယ်တို့တွင် မြန်မာတပ်မတော်နှင့် အခြားလုံခြုံရေး တပ်ဖွဲ့များ၏ လူ့အခွင့်အရေး ချိုးဖောက်မှု စွဲချက်များနှင့်ပတ်သက်သည့် အချက် ၂၅ ချက် ပါဝင်သည့် ယင်းအဆိုပြုချက်ကို အစည်းအဝေးအတွင်း ဆွေးနွေးခဲ့ကြသည်။
ယင်းမဲခွဲဆုံးဖြတ်မှုတွင် ယခင်က မြန်မာနိုင်ငံကို ထောက်ခံမဲပေးခဲ့ကြသည့် ကိုးနိုင်ငံ အပါအဝင် နိုင်ငံပေါင်း ၁၃၀ က မြန်မာကို ဆန့်ကျင်မဲပေးခဲ့ကြပြီး အိန္ဒိယ၊ ဘူတန်၊ ဂျပန်၊ သီရိလင်္ကာ၊ စင်ကာပူတို့အပါအဝင် ၂၆ နိုင်ငံ က မဲမပေးဘဲ ကြားနေခဲ့ကြသည်။
တရုတ်၊ ရုရှား၊ ဘီလာရုစ်၊ ကမ္ဘောဒီးယား၊ လာအို၊ ဖိလစ်ပိုင်၊ ဗီယက်နမ်နှင့် ဇင်ဘာဘွေ နိုင်ငံတို့ကမူ မြန်မာနိုင်ငံကို ထောက်ခံမဲပေးခဲ့ကြသည်။
လူ့အခွင့်အရေးသည် မြန်မာနိုင်ငံကို ဆန့်ကျင်ရာတွင် အသုံးပြုနေသည့် နိုင်ငံရေး အကြောင်းကိစ္စ ဖြစ်နေသည်ဟု ယင်းအစည်းအဝေးကိုတက်ရောက်သည့် မြန်မာကိုယ်စားလှယ်က ပြောကြားခဲ့ပြီး ယခုဆွေးနွေးနေသည့် အကြောင်းကိစ္စများသည် မြန်မာနိုင်ငံ၏ ပြည်တွင်းရေးသာဖြစ်သည်ဟု ထပ်လောင်းပြောကြားခဲ့သည်။
မြန်မာနိုင်ငံ၏ အသစ်ရွေးကောက်တင်မြှောက်ခံခဲ့ရသည့် အစိုးရသည် လူ့အခွင့်အရေး ချိုးဖောက်မှုများကို ဆန့်ကျင်နေပြီး နိုင်ငံအတွင်း ယင်းအခြေအနေများကို အဆုံးသတ်ရန် လုပ်ဆောင်နေသည်ဟု ယင်းကိုယ်စားလှယ်က ပြောကြားခဲ့သည်။
မြန်မာအစိုးရသည် နိုင်ငံအတွင်းရှိ ဘင်္ဂါလီ (မူရင်း၌ ရိုဟင်ဂျာဟု ဖော်ပြ) နှင့် အခြားလူနည်းစု အသိုင်းအဝိုင်းများနှင့် ပတ်သက်ပြီး ဆွေးနွေးရန် စိတ်ဝင်စားမှုရှိသည်ဟုလည်း ၎င်းက ထပ်လောင်းပြောကြားခဲ့သည်။
