နီဗားဒါးပြည်နယ်၊ ဖက်ဒရယ်တရားရုံးချုပ်တွင် နာမည်ကျော်ဘောလုံးသမား စီရော်နယ်လ်ဒိုနှင့် ၎င်းကို မုဒိမ်းမှုအတွက် စွပ်စွဲထားသည့် မာယော်ဂါတို့၏အမှုကို ကြားနာစစ်ဆေးသွားမည်ဖြစ်ကြောင်း AP သတင်းဋ္ဌာန၏ ဂျာနယ် လစ်တစ်ဦးဖြစ်သူ ကန်ရစ်တာ၏ အဆိုအရ သိရှိရသည်။
ကက်သရင်းမာယော်ဂါ၏ အမည်ရသည့် အမေရိကန် အမျိုးသမီးတစ်ဦးက စီရော်နယ်လ်ဒိုသည် ၂၀၀၉ ခုနှစ်အတွင်းက သူ့အားလက်စ်ဗီးဂတ်စ်မြို့ရှိ ဟိုတယ်တစ်ခုတွင် မုဒိမ်းကျင့်ခဲ့သည်ဟု စွပ်စွဲခဲ့သည်။
စီရော်နယ်လ်ဒိုနှင့် မာယော်ဂါတို့သည် နိုက်ကလပ်တစ်ခုတွင် တွေ့ဆုံခဲ့ကြပြီးနောက် ဟိုတယ်သို့ အတူသွားရောက်ခဲ့ကြပြီး၊ နောက်ပိုင်းတွင် မာယော်ဂါက လိင်ကိစ္စကို ငြင်းဆန်သည့်ကြားမှ စီရော်နယ်လ်ဒိုက အတင်းအကျပ်ကျူးလွန်ခဲ့သည်ဟု ၂၀၁၈ ခုနှစ်က စွပ်စွဲခဲ့သည့် မှတ်တမ်းဟောင်းများအရ သိရှိရသည်။
၂၀၁၀ ခုနှစ်တွင် မာယော်ဂါသည် တိုင်ကြားရန် စီစဉ်ခဲ့သော်လည်း စီရော်နယ်လ်ဒိုနှင့် သူ၏ ရှေ့နေအဖွဲ့သည် ပေါင် (၃၇၅၀၀၀)ပေးကာ တရားရုံးတွင် တရားစွဲဆို ခြင်းမပြုရန် သဘောတူညီမှုရယူခဲ့သည်ဟုလည်း သိရှိရသည်။
မာယော်ဂါ၏ ရှေ့နေဖြစ်သူ လက်စတီမာ့ခ်စတို ဗယ်လ်က "အဲဒီအချိန်တုန်းက စီရော်နယ်လ်ဒိုရဲ့ရှေ့နေတွေက ဖိအားပေးတာရော၊ တရားစီရင်ရေးမှာ အားနည်းချက်တွေရှိမှာရော စိုးရိမ်စိတ်တွေနဲ့ သူကသဘောတူခဲ့တာပါ"ဟု ပြောကြားခဲ့ကြောင်း ကန်ရစ်တာက ပြန်လည်ဖော်ပြခဲ့ပြီး ၂၀၁၈ ခုနှစ်က တရားစွဲဆိုရန် ကြိုးပမ်းမှုမှာလည်း မအောင်မြင်ခဲ့ချေ။
ယင်းအတွက်ကြောင့် ယခုအချိန်တွင် နီဗားဒါးပြည်နယ်ဖက်ဒရယ်တရားရုံးချုပ်တွင် ထပ်မံကြိုးပမ်းနေခြင်းဖြစ်ပြီး ကြားနာမှုများကို စီရော်နယ်လ်ဒိုနှင့် မာယော်ဂါတို့ ကိုယ်တိုင်တက်ရောက်ရလိမ့်မည်ဖြစ်ကြောင်းလည်း သိရှိရသည်။
