မန်ယူနောက်ခံလူ တဲလက်စ်က မိမိမှာ စွယ်စုံရကစားသမားတစ်ဦးဖြစ်ပြီး အသင်းကို အစွမ်းကုန်ကူညီပေးသွားမည်ဖြစ်ကြောင်း ပြောကြားခဲ့သည်။
မန်ယူအသင်းသည် ပေါ်တိုအသင်းမှ ဘရာဇီးလ်နောက်ခံလူ တဲလက်စ်ကို ပေါင် (၁၅.၄)သန်းဖြင့် ခေါ်ယူခဲ့ပြီး ၂၀၂၄ ခုနှစ်အထိ သက်တမ်းရှိစာချုပ်တစ်ရပ် ချုပ်ဆိုခဲ့သည်။
အသက် (၂၇)နှစ်အရွယ်ရှိ တဲလက်စ်သည် ပြီးခဲ့သည့် ၂၀၁၉-၂၀ ရာသီက ပေါ်တိုအသင်းတွင် ပြိုင်ပွဲစုံ (၁၃)ဂိုးအထိ သွင်းယူခဲ့ပြီး ဂိုးဖန်တီးမှု (၁၂)ကြိမ်အထိ ပြုလုပ်ပေးနိုင်ခဲ့သည်။
တဲလက်စ်က "ကျွန်တော်ဟာ set-piece စပါယ်ရှယ်လစ်တစ်ဦးဖြစ်ပြီး အမြဲတမ်းဂိုးသွင်းခွင့်တွေ ဖန်တီးနိုင်ဖို့ ရှာဖွေနေသူပါ။ ကျွန်တော့်အနေနဲ့ စွယ်စုံရကစားသမားအဖြစ် ကစားခဲ့တာကြောင့် ပရီးမီးယားလိဂ်မှာ ပြိုင်ဘက်တွေနဲ့ ရင်ဆိုင်ဖို့လည်း အသင့်ပါပဲ။ ကျွန်တော့်အနေနဲ့ အသင်းအတွက် အကောင်းဆုံးစွမ်းဆောင်နိုင်ဖို့ မျှော်လင့်ပါတယ်"ဟု ပြောကြားခဲ့သည်။
ထို့ပြင် တဲလက်စ်က မိမိအနေဖြင့် ပေါ်တိုအသင်းမှာကဲ့သို့ မန်ယူအသင်းတွင်လည်း ဆုဖလားများ ရယူသွားလိုကြောင်း ပြောကြားခဲ့သည်။
"မန်ယူလို ဂုဏ်သိက္ခာကြီးမားတဲ့ အသင်းကို ပြောင်းရွှေ့ခွင့်ရတာ ဂုဏ်ယူစရာပါ။ ကျွန်တော့်အနေနဲ့ အသင်းအတွက် အစွမ်းကုန်ပေးဆပ်သွားမယ်လို့ ကတိပေးပါတယ်။ ပေါ်တိုအသင်းနဲ့အတူ ဆုဖလားတွေများစွာ ရရှိခဲ့ပြီး မန်ယူအသင်းမှာလည်း အဲဒီလိုလုပ်ချင်ပါတယ်"ဟု တဲလက်စ်က ပြောကြားခဲ့သည်။
