စပါးအသင်း၏နည်းပြ မော်ရင်ဟိုက မိမိအနေဖြင့် လိဂ်ဖလားပြိုင်ပွဲကို တန်ဖိုးထားသော်လည်း ပွဲစဉ်အနေအထားအရ အားထည့်ကစားနိုင်မည်မဟုတ်ဟု ပြောကြားခဲ့ပြီး ပြိုင်ဘက် ချယ်လ်ဆီးအသင်း၏နည်းပြ လမ်းပတ်က အခြားအ သင်းများလည်း စပါးထက် အခွင့်အရေးပိုမရဟု တုံ့ပြန်ခဲ့ ကြောင်း သိရသည်။
လိဂ်ဖလားပြိုင်ပွဲ စတုတ္ထအဆင့်ကို ယခုတစ်ပတ်ကြားရက်တွင် ယှဉ်ပြိုင်ကစားသွားမည်ဖြစ်ပြီး စပါးနှင့် ချယ်လ်ဆီးတို့ ထိပ်တိုက်ဆုံတွေ့နေသည်။
ထို့ကြောင့် ပြိုင်ပွဲအကြိုကာလတွင် နည်းပြနှစ်ဦး စကားစစ်ထိုးပွဲပုံစံ ဖြစ်ပေါ်ခဲ့ခြင်းလည်းဖြစ်သည်။
ပွဲစဉ်များ ဆက်တိုက်ယှဉ်ပြိုင်နေရခြင်းနှင့်ပတ်သက်၍ အစောပိုင်းကတည်းက ဝေဖန်ပြစ်တင်ခဲ့သော မော်ရင်ဟိုက ''ကျွန်တော် လိဂ်ဖလားအောင်ပွဲအတွက် တိုက်ပွဲဝင်သွားချင်ပါတယ်။ ဒါပေမဲ့ လုပ်နိုင်မယ် မထင်ပါဘူး။ ကြာသပတေး နေ့မှာ ကစားရမယ့်ပွဲကို ကျွန်တော်တို့ လက်မလွှတ်နိုင်ပါဘူး။ ယူရိုပါလိဂ်အုပ်စုအဆင့်ရောက်ရင် ရရှိမယ့်ဆုကြေးက ကျွန်တော်တို့လိုအသင်းအတွက် အလွန်အရေးကြီးပါတယ်။ ကျွန်တော်တို့ ဒီလိုဆုံးဖြတ်ရအောင် EFL(အင်္ဂလန်ဘောလုံးလိဂ်) က လုပ်ဆောင်ခဲ့တာလို့ပဲ ထင်ပါတယ်''ဟု ပြောကြားခဲ့သည်။
စပါးအသင်းသည် တနင်္ဂနွေနေ့တွင် ပရီးမီးယားလိဂ်ပွဲစဉ်ကစားခဲ့ရပြီး အင်္ဂါနေ့၌ လိဂ်ဖလား၊ ကြာသပတေးနေ့၌ ယူရိုပါလိဂ်ပွဲစဉ်များ ကစားရမည်ဖြစ်၍ မော်ရင်ဟိုက ဝေဖန်ခဲ့ခြင်း လည်းဖြစ်သည်။
သို့သော် ချယ်လ်ဆီးနည်းပြ လမ်းပတ်ကမူ ''ယူရိုပါလိဂ်ကြောင့် ဟိုဆေး(မော်ရင်ဟို) ပွဲတွေဆက်နေတာ ကျွန်တော် နားလည်ပါတယ်။ ဒါပေမဲ့ အားလုံးအတူတူပါပဲ။ ပြီးခဲ့တဲ့ကြား ရက်တုန်းက သူတို့ အနားရခဲ့ပါသေးတယ်။ ကျွန်တော်တို့ မရခဲ့ပါဘူး။ ပြီးတော့ ဘယ်ကစားသမားကိုပဲသုံးသုံး ဟိုဆေးရဲ့ လူစာရင်းက တောင့်တင်းပါတယ်။ ကျွန်တော်တို့လို ချန်ပီယံလိဂ်ဝင်ခွင့်အတွက် စိန်ခေါ်နိုင်တဲ့အသင်းပါ။ ကျွန်တော်တို့ကတော့ ပြိုင်ပွဲတိုင်းကို လေးလေးစားစားနဲ့ အနိုင်ရအောင် ယှဉ်ပြိုင်သွားမှာပါ''ဟု ပြောကြားခဲ့သည်။
