လီဗာပူးလ်အသင်းနည်းပြ ယာဂန်ကလော့ပ်က မိမိတို့အနေဖြင့် လာမည့်ရာသီတွင် ပရီးမီးယားလိဂ် ချန်ပီယံဆုကို ကာကွယ်နိုင်ရန် ကြိုးပမ်းမည်မဟုတ်ဘဲ နောက်တစ်ကြိမ် ထပ်မံရယူရန် တိုက်ပွဲဝင်သွားမည် ဖြစ်ကြောင်း ကြုံးဝါးပြောဆိုခဲ့သည်။

ယာဂန်ကလော့ပ်သည် လီဗာပူးလ်အသင်းအား နှစ် ၃၀ ကြာဝေးကွာနေသည့် အမှတ်ပေးချန်ပီယံဆု ပြန်လည်ရရှိစေရန် စွမ်းဆောင်ပေးထားပြီး အသင်းသမိုင်းတစ်လျှောက် စံချိန်တင်ရမှတ် ၉၉ မှတ်အပြင် မန်စီးတီးအသင်း၏ နိုင်ပွဲအများဆုံး ၃၂ ပွဲစံချိန်ကိုပါ အမီလိုက်နိုင်ခဲ့သည်။ 

လီဗာပူးလ်အသင်းသည် လာမည့်ရာသီတွင်လည်း ပရီးမီးယားလိဂ်ချန်ပီယံဆု ကာကွယ်နိုင်ရန် ရေပန်းစားနေပြီး အလေးပေးမှု ၂/၁ ဖြင့် မန်စီးတီးအသင်း (၈/၁၁) ၏ နောက်တွင် ရပ်တည်လျက်ရှိသည်။ သို့သော် သတင်းစာရှင်းလင်းပွဲတွင် ယာဂန်ကလော့ပ်က လာမည့်ရာသီမျှော်မှန်းချက်နှင့်ပတ်သက်၍ သတင်းထောက်များက မေးမြန်းစဉ် ယခုလို ဖြေကြားခဲ့ခြင်းဖြစ်သည်။

"ချန်ပီယံဆုကိုကာကွယ်နိုင်ဖို့ ကျွန်တော်တို့ ကြိုးစားသွားမှာမဟုတ်ပါဘူး။ နောက်ထပ်တစ်ကြိမ်ရယူနိုင်ဖို့ ရင်ဆိုင်တိုက်ခိုက်သွားမှာပါ။ အဲဒါက အမှန်တရားပါ။ ချဉ်းကပ်ပုံကို  ပြောင်းလဲလိုက်မှာ မဟုတ်ပါဘူး။ ဒါက ကျွန်တော်တို့ အမြဲတမ်းလုပ်နေကျဖြစ်ပြီး ပြောင်းလဲပစ်လိုက်ဖို့ အကြောင်းပြချက်လည်း မရှိပါဘူး။ စိတ်ဓာတ်လှုံ့ဆော်မှုက ကျွန်တော်တို့အတွက် ပြဿနာဖြစ်လာမှာ မဟုတ်ပါဘူး။ ဒီအသင်းက ကြိုးစားအားထုတ်မှုကို ရပ်တန့်ပစ်လိုက်မှာ မဟုတ်ဘူးဆိုတာ ကျွန်တော်သိပါတယ်။ ကျွန်တော်က ကိုယ့်အတွက် အရာအားလုံးဖြစ်လာဖို့ မမျှော်မှန်းထားပါဘူး။ အဲဒီလိုလည်း ဘယ်တုန်းကမှ မမျှော်လင့်ပါဘူး။ ဒါပေမဲ့ ကိုယ့်ဘက်က အရာအားလုံးပေးဆပ်ဖို့တော့ မျှော်မှန်းထားပါတယ်။ ကျွန်တော့်ချာတိတ်တွေကလည်း အဲဒီလိုပဲလုပ်မယ်လို့ မျှော်လင့်ပါတယ်" ဟု ၎င်းက ပြောကြားခဲ့သည်။