BT Sport တွင် ဘောလုံးဝေဖန်သူအဖြစ် လုပ်ကိုင်နေသည့် မန်ယူနှင့် မန်စီးတီးကွင်းလယ်လူဟောင်း အိုဝင်ဟားဂရေ့ဗ်က အဂွဲရိုး၏နေရာတွင် အစားထိုးရန်အတွက် လော်တာရိုမာတီနက်ဇ်အား ခေါ်ယူရန် မန်စီးတီးအသင်းကို တိုက်တွန်းခဲ့သည်။ 

အသက်(၃၂)နှစ်အရွယ်ရှိ အာဂျင်တီးနားတိုက်စစ်မှူး အဂွဲရိုးသည် မန်စီးတီးအသင်းနှင့် စာချုပ်သက်တမ်း တစ်နှစ်သာကျန်ရှိတော့ပြီး စာချုပ်သက်တမ်းကုန်ဆုံးချိန်တွင် မွေးရပ်မြေ အာဂျင်တီးနားကလပ်အသင်းများသို့ ပြောင်းရွှေ့ကစားဖွယ်ရှိနေကြောင်း မီဒီယာများက ဖော်ပြနေကြသည်။ 

ထို့ကြောင့် မန်စီးတီးအသင်းအနေဖြင့် အဂွဲရိုး၏နေရာတွင် အစားထိုးရန် တိုက်စစ်မှူး ရှာဖွေနေပြီး အိုဝင်ဟားဂရေ့ဗ်က လော်တာရိုမာတီနက်ဇ်မှာ အသင့်တော်ဆုံးဖြစ်ကြောင်း ပြောကြားခဲ့ခြင်းဖြစ်သည်။ 

အိုဝင်ဟားဂရေ့ဗ်က "မန်စီးတီးအသင်းဟာ အဂွဲရိုးရဲ့ နေရာမှာ အစားထိုးဖို့ တိုက်စစ်မှူး ရှာဖွေနေတယ်လို့ သိရပါတယ်။ လော်တာရိုမာတီနက်ဇ်က အဂွဲရိုးရဲ့နေရာမှာ အစားထိုးဖို့ အသင့်တော်ဆုံးလို့ ကျွန်တော် မြင်ပါတယ်။ လော်တာရိုမာတီနက်ဇ်မှာ တိုက်စစ်မှူးတစ်ဦးမှာ ရှိရမယ့် အရည်အသွေးအားလုံးရှိပါတယ်။ သူဟာ နည်းစနစ်ပိုင်း ကျွမ်းကျင်သလို၊ အဆုံးသတ်လည်း သေချာသူပါ။ သူက အသက် (၂၂)နှစ်သာ ရှိသေးပြီး ပိုကောင်းလာဦးမယ် ကစားသမားလည်းဖြစ်ပါတယ်။ လော်တာရိုမာတီနက်ဇ်ရဲ့ ကစားပုံက မန်စီးတီး၊ ဘာစီလိုနာတို့လို အသင်းတွေနဲ့ အရမ်းကိုက်ညီပါလိမ့်မယ်"ဟု ပြောကြားခဲ့သည်။ 

အသက် (၂၂)နှစ်အရွယ်ရှိ အာဂျင်တီးနားတိုက်စစ်မှူး လော်တာရိုမာတီနက်ဇ်သည် ယခုရာသီတွင် အင်တာမီလန်အသင်းအတွက် ခြေစွမ်းပြပြီး ပြိုင်ပွဲစုံ (၄၈)ပွဲတွင် (၂၁)ဂိုး သွင်းယူထားသည်။ 

လော်တာရိုမာတီနက်ဇ်အား ခေါ်ယူရန် ဘာစီလိုနာအသင်းကလည်း စိတ်ဝင်စားနေကြောင်း သိရသည်။