မန်ယူအသင်းအား VAR က မျက်နှာ သာပေးသဖြင့် ပယ်နယ်တီမပေးရအောင် ကစားရန် ချယ်လ်ဆီးအသင်းနည်းပြ လမ်းပတ်က ကစားသမားများအား သတိပေးပြောကြားခဲ့သည်။

ချယ်လ်ဆီးနှင့် မန်ယူအသင်းသည် FA ဖလား ဆီမီးဖိုင်နယ်အဖြစ် ဇူလိုင် ၁၉ ရက် (ယနေ့) တွင် လန်ဒန်မြို့ရှိ ဝင်ဘလေကွင်း၌ ယှဉ်ပြိုင်ကစားရမည်ဖြစ်ပြီး ပွဲကြိုသတင်းစာရှင်းလင်းပွဲတွင် လမ်းပတ်က ယင်းကဲ့သို့ သတိပေးခဲ့ခြင်းဖြစ်သည်။ မန်ယူအသင်းသည် ကြာသပတေးနေ့က ပဲလေ့စ်အသင်းနှင့်ကစားသည့်ပွဲတွင် ဇာဟာအား လင်ဒီလော့ဖ် ဆွဲလှဲသော်လည်း ပယ်နယ်တီမပေးရသလို ဂျော်ဒန်အာယူး၏ သွင်းဂိုးမှာလည်း ခြေဖျားမျှသာ ကျော်နေသည်ကို VAR က လူကျွံအဖြစ် ဆုံးဖြတ်ခဲ့သောကြောင့် ဝေဖန်မှုများစွာထွက်ပေါ်လျက်ရှိသည်။ 

ထို့ပြင် ဖေဖော်ဝါရီလအတွင်း စတမ်းဖို့ဒ်ဘရစ်ချ်၌ ချယ်လ်ဆီးနှင့် မန်ယူ အသင်းတို့ကစားသည့်ပွဲတွင် ဇူးမား၏သွင်းဂိုး ကို VAR က ငြင်းပယ်ခဲ့သလို ဘတ်ရှူအာယီအား ခြေထောက်ဖြင့်ကန်ခဲ့သည့် မက်ဂွိုင်းရားကိုမူ အနီကတ်ပြသခဲ့ခြင်းမရှိကြောင်း သိရသည်။ 

သို့ဖြစ်ရာ လမ်းပတ်က "အသင်း ကြီးတွေက မျက်နှာသာပေးခံရနိုင်တယ်လို့ လူတွေက ပြောကြတယ်။ အဲဒါဘာဖြစ်လို့လဲဆိုတော့ ဖိအား ဒါမှမဟုတ် ပရိသတ်တွေရဲ့ လွှမ်းမိုးမှုကြောင့်ပါ။ VAR က အပြောင်းအလဲ တွေလုပ်ဖို့ ရောက်လာတာပါ။ အသင်းတွေကို မျက်နှာသာမပေးဖို့အပြင် မှန်ကန်တဲ့ ဆုံးဖြတ်ချက်တွေ ချနိုင်ဖို့ပါ။ ဒါပေမဲ့ VAR မှာလည်း လူသားတွေက အရေးပါတဲ့နေရာမှာ ရှိနေဆဲ ဖြစ်ပြီး သူတို့တွေက ဆုံးဖြတ်ချက်ချနေတာပါ။ စိတ်ရှုပ်စရာအများကြီးထဲက တစ်ခုကတော့ ကြာသပတေးနေ့က ဖြစ်ရပ်ပါပဲ။ အဲဒီနေ့က ဆုံးဖြတ်ချက်တွေ မှားယွင်းတယ်ဆိုတာ လုံးဝသေချာပါတယ်။ VAR ဆိုတာ အဆင့်ပိုမြင့်တယ်လို့ ကျွန်တော်ယုံချင်ပါတယ်။ တချို့ဟာ တွေက ကိုယ့်ကိုတိုက်ရိုက်ထိခိုက်တာမျိုးရှိသလို မထိခိုက်တာလည်း ရှိပါတယ်။ ဒါပေမဲ့ ဒီကာလတစ်လျှောက်မှာတော့ မန်ချက်စတာယူနိုက်တက်က နည်းနည်းပိုပြီး မျက်နှာသာပေးခံရတယ်ဆိုတာ ကျွန်တော်တို့ မြင်နေရပါတယ်။ VAR က ကျွန်တော်တို့ကို မျက်နှာသာ ပေးမယ်ဆိုရင်တော့ ကောင်းတာပေါ့။ မန်ချက်စတာယူနိုက်တက် တိုက်စစ်ကစားသမားတွေရဲ့ပြေးအားက အရမ်းမြန်လို့ ကျွန်တော့်ကစားသမားတွေ သတိထားဖို့လိုပါတယ်။ ခြေထောက်ကို မြန်မြန်ရွေ့လျားဖို့လိုသလို သူတို့ အပေါ်ကို လဲမကျမိစေဖို့လည်း လိုပါတယ်" ဟု သတိပေးပြောကြားခဲ့သည်။

မန်ယူအသင်းသည် ယခုရာသီ ပရီးမီးယားလိဂ်တွင် ပယ်နယ်တီ ၁၃ ကြိမ်ဖြင့် အများဆုံးရရှိထားပြီး ပြိုင်ဘက်များ၏သွင်းဂိုးကို VAR ဖြင့် ပယ်ဖျက်မှုမှာလည်း ခုနစ်ဂိုးဖြင့် အများဆုံးဖြစ်ကြောင်း Opta ၏ ထုတ်ပြန်မှုအရ သိရသည်။ ဘရိုက်တန်နှင့် ဆောက်သမ်တန်အသင်းတို့မှာလည်း မန်ယူနှင့်အတူ ပြိုင်ဘက်၏သွင်းဂိုးကို VAR ဖြင့် ပယ်ဖျက်မှု ခုနစ်ဂိုးဖြင့် ပူးတွဲရပ်တည်နေသည်။