အဲဗာတန်နည်းပြ အန်ဆယ်လော့တီက အသင်း၏ အဓိကဂိုးသမား ပစ်ဖို့ဒ်အနေဖြင့် လက်စွမ်းတိုးတက်ရန် လိုအပ်နေသေးသည်ဟု သုံးသပ်ခဲ့သည်။
အင်္ဂလန်လက်ရွေးစင်ဂိုးသမား ပစ်ဖို့ဒ်သည် ပြီးခဲ့သည့်ရာသီအစက စတွက်လျှင် ဂိုးပေးရသည့်အမှား (၇)ကြိမ်အထိ ပြုလုပ်ထားပြီး ဝုလ်ဗ်အား ဂိုးပြတ်ရှုံးနိမ့်သည့်ပွဲတွင်လည်း စွမ်းဆောင်ရည်ကျဆင်းခဲ့သည်။
အန်ဆယ်လော့တီက "သူ လက်စွမ်းကျနေတာ ကျွန်တော် သိတယ်။ သူ့ကိုလည်း ပြောထားတယ်။ သူ ကိုယ့်ကိုယ်ကိုယ် အာရုံစိုက်ရပါမယ်။ တစ်နေ့ပြီးတစ်နေ့ ပိုကောင်းဖို့ကြိုးစားရပါမယ်။ သူက အရည်အသွေးရှိသူပါ"ဟု ပြောကြားခဲ့သည်။
အသက် (၂၆)နှစ်အရွယ်ရှိ ပစ်ဖို့ဒ်သည် ပြီးခဲ့သည့် ၂၀၁၈ ကမ္ဘာ့ဖလားပြိုင်ပွဲတွင် အင်္ဂလန်အသင်း၏ အဓိကဂိုးသမား လက်စွမ်းပြခဲ့သူ ဖြစ်သည်။
သို့သော် ပစ်ဖို့ဒ် ယခုရာသီတွင် လက်စွမ်းကျဆင်းနေပြီး အဲဗာတန်အသင်း၏ ပရီးမီးယားလိဂ်ပွဲစဉ် (၃၆)ပွဲစလုံးတွင် ပါဝင်ခွင့်ရခဲ့သော်လည်း (၅၃)ဂိုးအထိ ပေးထားခဲ့ရသည်။
