ထားဝယ်-ရေး လမ်းပိုင်း မီးရထားသံလမ်းနံဘေးက အသက်မဲ့သွားသော ပန်းရောင်အိမ်ကလေး

ထားဝယ်-ရေး မီးရထားလမ်းပိုင်းတွင် သုံးလောင်းပြိုင်လူသတ်မှု ဖြစ်ပွားခဲ့သော ပန်းရောင်အိမ်ကလေးနှင့် အသတ်ခံရသည့် မိသားစုသုံးဦးပါ ဗီနိုင်းကို တွေ့ရစဉ်

Published 21 June 2020

ဖြိုးဇင်(ထားဝယ်)

တနင်္သာရီတိုင်းဒေသကြီး ထားဝယ်ခရိုင် ရေဖြူမြို့နယ်အတွင်းရှိ ထားဝယ်-ရေး ပြည်ထောင်စုလမ်းမကြီးပေါ်က မိုင်တိုင်အမှတ် ၂၃ မိုင် ၄ ဖာလုံတွင် ဖြစ်သည်။ မီးရထားလမ်းနှင့် ကားလမ်းဖြတ်သည့်နေရာ ဖြစ်သောကြောင့် မီးရထားဖြတ်ပါက ကားလမ်းကို ခေတ္တပိတ်ရန် မောင်းတံနှစ်ခုက မီးရထားသံလမ်း၏တစ်ဖက်တစ်ချက်စီတွင် ရှိနေသည်။ ကားလမ်းနှင့် မီးရထားလမ်းဆုံရာမှ ပေ ၃၀ ခန့်အကွာတွင် အိမ်ရှေ့မျက်နှာစာကို ပန်းရောင်ဆေးသုတ်ထားသည့် မီးရထားသံလမ်းဂိတ်စောင့် ဝန်ထမ်းနေထိုင်သော ၁၅ ပေ _ ၁၀ ပေခန့်ရှိ ပန်းရောင်အိမ်လေး တစ်လုံးရှိသည်။ အိမ်၏အရှေ့ဘက်တွင် မီးရထားသံလမ်းရှိပြီး အနောက်ဘက်တွင် စမ်းချောင်းလေးတစ်ခုက တသွင်သွင်စီးဆင်းနေသည်။ စိမ်းစိုနေသည့် တောင်တန်းနှင့် သစ်ပင်များရှိသည့် ဝန်းကျင်တွင် မီးရထားလမ်းနှင့် ကားလမ်းနံဘေးရှိ အဆိုပါပန်းရောင်အိမ်ကလေးက နေချင့်စဖွယ်အနေအထားဖြင့် တည်ရှိနေသည်။

လွန်ခဲ့သည့် သုံးနှစ်ခန့်မှစ၍ အဆိုပါအိမ်ကလေးကို မီးရထားသံလမ်း ဂိတ်စောင့်တာဝန်ဖြင့်ကို အောင်ကျော်ထွန်းတို့ မိသားစုရောက်လာခဲ့သည်။ ရေနံချေးသုတ်ထားသော ယင်းအိမ်ကလေး၏အိမ်ရှေ့ မျက်နှာစာကို ပန်းရောင်သင်္ဘော ဆေးသုတ်ပြီး ပန်းရောင်အိမ်ကလေးအဖြစ် အသက်သွင်းခဲ့သည်။ ၎င်းတို့ စတင်ရောက်ရှိချိန်က သားဦးလေးမှာ နှစ်နှစ်သားအရွယ်သာ ရှိသေးသည်။ တစ်နှစ်ကျော်ခန့်အကြာတွင်နောက်ထပ်သားတစ်ဦး မွေးသည်။ သားဦးလေးမှာ မွေးရာပါဦးခေါင်းခွံမပါဘဲ အရည်အိတ်အနေအထားဖြင့်မွေးဖွားလာ၍ အကြိမ်ကြိမ်ဆေးကုခဲ့ရသည်။ ဉာဏ်ရည်ချို့တဲ့သည့် သားဦးလေးကို ဇာတိဖြစ်သည့် ထားဝယ်မြို့ ကျောက်မော်ရပ်ကွက်ရှိ အဘွားဖြစ်သူဆီတွင် ထားသည်။ တစ်ခါတစ်ရံ ပန်းရောင်အိမ်ကလေးသို ့ခေါ်သွားတတ်သည်။ ပန်းရောင်အိမ်ကလေးမှ လေးဖာလုံခန့်အကွာတွင် ဥဿရံကျေးရွာရှိသည်။ ကိုအောင်ကျော်ထွန်းအနေဖြင့် မီးရထားသံလမ်းဂိတ်စောင့် ဖြစ်သောကြောင့် ရထားဖြတ်သန်းချိန်တွင် ကားလမ်းနှင့် မီးရထားလမ်းဆုံကို ခေတ္တဂိတ်ပိတ်ပေးရသည့်တာဝန်ကို ဆောင်ရွက်ရသည်။ မီးရထား ဖြတ်သန်းပြီးပါက ၎င်း၏တာဝန်ပြီးဆုံးပြီဖြစ်သည်။ အလုပ်တာဝန်ပြီးဆုံး၍အားလပ်နေသည့်အချိန်တွင် အနီးအနားရှိ ရွာများဖြစ်သော ဥဿရံကျေးရွာနှင့် သက်ကယ်ကွက်ကျေးရွာတို့တွင် သစ်ပင်တက်၊ ရေတွင်းတူး စသောကျပန်းအလုပ်များလည်း လုပ်သည်။ ၎င်းအားစေခိုင်းသည့်အလုပ်မှန်သမျှ မညည်းမညူ လုပ်ပေးတတ်ပြီး စိတ်စေတနာကောင်းမွန်သည့် လူငယ်ဖြစ်ကြောင်း ရွာသားများက ဆိုသည်။ ထို့ပြင် ကိုအောင်ကျော်ထွန်းမှာ ၎င်းအားလပ်သည့်အချိန်၌ ဇာတိဖြစ်သည့် ထားဝယ်မြို့ရှိ ပွဲလမ်းသဘင်များ၌ ဆင်အကလည်း လိုက်ကတတ်သေးသည်။ တရုတ်ဘုံကျောင်း၌ တိုးနယားအကလည်း ကသည်ဟုဆိုသည်။ အရက်၊ ဆေးလိပ်၊ ကွမ်းယာနှင့် မူးယစ်ဆေးဝါးများ မသုံးစွဲတတ်သည့်အပြင် ဇာတိဖြစ်သည့်ရပ်ကွက်အတွင်းနေထိုင်စဉ်ကလည်း နာမည်ပျက်မရှိသူ၊ ကူညီတတ်သူ၊ အနေအေးသူဖြစ်သည်ဟု ရပ်ကွက်အတွင်း နေထိုင်သူအချို့က ဆိုသည်။ ဘာသာရေးပွဲတော်များတွင်လည်း ရှေ့ဆုံးက ပါဝင်တတ်သေးသည်ဟု သိရသည်။

မီးရထားဖြတ်ချိန်တွင် သံလမ်းဂိတ်တံခါးမောင်းတံကို ပိတ်၍ မီးရထားဖြတ်ပြီးချိန်တွင် တံခါးပြန်ဖွင့်ပေးပြီးပါက ၎င်း၏တစ်နေ့တာ တာဝန် ပြီးဆုံးပြီဖြစ်သည်။ အားလပ်သည့်အချိန်တွင် ကျပန်းအလုပ်လုပ်ပြီး အလုပ်မရှိသည့်အချိန်တွင် ရထားသံလမ်းနံဘေးရှိ ပန်းရောင်အိမ်ကလေးအတွင်း မိသားစုနှင့်အတူ အချိန်ကုန်ဆုံးလေ့ ရှိသည်။ သားငယ်လေး၏ ဆော့ကစားသံရယ်မောသံများဖြင့် မိသားစုသုံးဦးနေထိုင်သော ပန်းရောင်အိမ်ကလေးက သာယာနေပျော်ဖွယ်အတိဖြင့် အသက်ဝင်နေသည်။ ဇွန် ၁၃ ရက်နေ ့ထားဝယ်မိုးဖွဲဖွဲရွာနေသည့် စနေနေ့ ညနေပိုင်းတွင် ပန်းရောင်အိမ်ကလေးသို့ ကံကြမ္မာဆိုးကျရောက်လာသည်။ ပန်းရောင်အိမ်ကလေးကို အသက်သွင်းခဲ့သူ ကိုအောင်ကျော်ထွန်းနှင့် ၎င်း၏ဇနီးဖြစ်သူအပြင် တစ်နှစ်ကျော်အရွယ်သားငယ်လေးပါ နေအိမ်အတွင်း၌ ဓားအချက်ပေါင်းများစွာဖြင့် ရက်ရက်စက်စက်အသတ်ခံခဲ့ရသည်။ ကိုအောင်ကျော်ထွန်း၏ မိခင်ဖြစ်သူမှာ ၎င်း၏သားသမီးများကို ညစဉ်ဖုန်းဆက်လေ့ရှိသူဖြစ်သည်။ ထိုနေ ့ ညပိုင်းတွင် ကိုအောင်ကျော်ထွန်း၏ မိခင်ဖြစ်သူက သားဖြစ်သူထံ ဖုန်းဆက်ရာ ဖုန်းစက်ပိတ်ထားသဖြင့် ချွေးမဖြစ်သူ၏ဖုန်းကို ဆက်သွယ်ရာတွင်လည်း ဖုန်းမကိုင်ဟု ဆိုသည်။ ထို့ကြောင့်မိခင်ဖြစ်သူက စိုးရိမ်တကြီးဖြင့် ထားဝယ်မြို့မှနေ၍ သားဖြစ်သူ နေထိုင်ရာဆီသို့ လိုက်လာပြီး ကြည့်တော့မှ သားဖြစ်သူ တစ်မိသားစုလုံး အသတ်ခံထားရသည်ကို စတင်တွေ့ရှိခဲ့ရခြင်းဖြစ်သည်။

“သူ့အမေလည်း စီးပွားရေး ဘာမှမရှိဘူး။ ဗယာကြော်လေးကြော် ေရာင်းလိုက်၊ ရာသီပေါ်မုန့်လုပ်ရောင်းလိုက်၊ ကြံရည်ရောင်းလိုက်နဲ့ မြေငှားပြီး ဆိုင်တဲလေးနဲ့ လုပ်ကိုင်စားသောက်နေတာ။ သူလည်း အဆင်ပြေသလို လုပ်ကိုင်စားသောက်နေတာ။ အဲဒါကိုမှ ဒီလိုအသတ်ခံရတာက ဘယ်လိုအမုန်းတရားတွေရှိလို့လဲဆိုပြီး စဉ်းစားနေတာပေါ့။ သူ့အမေက ညအိပ်ရာဝင်ခါနီးရင် သားသမီးတွေကိုဖုန်းဆက်နေကျ။ ဘယ်လိုနေကြလဲ၊ နေကောင်းရဲ့လား၊ ထမင်းစားပြီးပြီလား၊ ဘုရားတရားမမေ့နဲ့လို ့နေ့တိုင်းဖုန်းဆက်ပြောလေ့ရှိတယ်။ အဲဒီနေ့က ဆက်တော့ သူ့သားဖုန်းက စက်ပိတ်ထားပြီး ချွေးမရဲ့ဖုန်းကမကိုင်ဘဲနေတော့ ဘာလို့မကိုင်တာလဲ မသိဘူးဆိုပြီး တက်ကြည့်မှ အသတ်ခံထားရတာကို တွေ့ရတာ” ဟု အသတ်ခံရသူ ကိုအောင်ကျော်ထွန်း၏ အဒေါ်တော်စပ်သူက ပြောသည်။

အခင်းဖြစ်ပွားခဲ့သည့်ညက ကိုအောင်ကျော်ထွန်း၏ မိခင်ဖြစ်သူနှင့်အတူ ၎င်း၏ဦးလေးတော်စပ်သူ ဦးညိုမင်းလည်း လိုက်ပါခဲ့သည်ဟု သိရသည်။ ကိုအောင်ကျော်ထွန်း၏ မိခင်ဖြစ်သူက ၎င်း၏သားဖြစ်သူနှင့် အဆက်အသွယ်မရသဖြင့် ထားဝယ်မြို့မှ ၂၃ မိုင်ကျော်အကွာရှိ ပန်းရောင်အိမ်ကလေးသို့ သွားရောက်ရန် အဖော်အဖြစ် လိုက်ပါခဲ့သည်ဟု ဆိုသည်။ ]]ကျွန်တော့် မိန်းမကို သူ့အစ်မက ဖုန်းဆက်လိုက်တယ်။ အဲဒီနေ ့ည ၆ နာရီခွဲ ၇ နာရီလောက်ဆိုရင် ကျွန်တော် (အခင်းဖြစ်နေအိမ်ဆီ) သွားအိပ်ဖို ့လုပ်နေတာ။ သူ့အစ်မက သူ့ဆီဖုန်းဆက်ပြီး နည်းနည်းသွားကြည့်ပေးပါ။ သူ့သား ဖုန်းဆက်တာ မကိုင်လို့ဆိုပြီးပြောတော့ ကျွန်တော်ဆိုင်ကယ်နဲ ့တက်လိုက်သွားတယ်။ တစ်ခါမှမရောက်ဖူးဘူး။ သူ့အစ်မခေါ်လို ့ကျွန်တော် တက်လိုက်သွားတာ။ ဒီကနေည ၇ နာရီကျော် ၈ နာရီလောက် တက်သွားတာ။ ဟိုကို ၉ နာရီလောက် ရောက်တယ်။ ဟိုရောက်တာနဲ့ သူ့အမေလည်း အော်ခေါ်တယ်။ ကျွန်တော်လည်း အော်ခေါ်တယ်။ ဖိနပ်တွေ ဆိုင်ကယ်တွေလည်း ရှိတယ်။ ဆိုင်ကယ်ရှိနေတော့ အစ်မကိုခေါ်လည်းမကြားဘူး။ ဘာမှမကြားဘူးဆိုပြီးပြောတယ်။ သူ့အမေက အိမ်ပေါ်အရင်တက်သွားပြီး ကျွန်တော် မသင်္ကာလို ့ဖုန်းမီးထွန်းပြီးတော့ အပေါက်လေးကနေ ကြည့်လိုက်တယ်။ ကြည့်လိုက်တော့အထဲမှာ သွေးတွေ ဘာတွေနဲ့လဲနေပြီ။ ဒါနဲ့ ကျွန်တော့် အစ်မကို အခြေအနေမကောင်းတော့ဘူးပေါ့။ ရွာထဲကို ဆိုင်ကယ်နဲ့ နှစ်ယောက်စလုံးဝင်ပြီးတော့ အကူအညီလိုက်တောင်းတယ်။ အကူအညီတောင်းတော့ ရွာသားတွေထွက်လိုက်လာပြီး ရွာလူကြီးကို အကြောင်းကြား၊ ကျွန်တော်တို့က အပြင်မှာရပ်နေတယ်။ ရဲတွေလာပြီး အကုန်စစ်ပြီးမှ ကျွန်တော်တို့ကို ဝင်ခွင့်ပေးတယ်။ ရဲမလာခင် တစ်ယောက်မှ တံခါးမဖွင့်ဘူး။ ရဲလာမှရိုက်ဖွင့်တာ။ ရဲတွေရောက်လာတာည ၁၀ နာရီလောက်ဖြစ်ပြီထင်တယ်။ နာရီတော့ အတိအကျမမှတ်မိဘူး။ ရုတ်တရက်ဆိုတော့ ဘာလုပ်ရမှန်းမသိဘဲ ရွာထဲကို အကူအညီသွားတောင်းတာ။ သူ့အမေလည်း ပါတယ်။ သူနဲ့ ကျွန်တော်က သိပ်ပြီးတွေ့ဆုံတာ မရှိဘူး။ သူ့အမေ အိမ်ဆင်းလာတဲ့အချိန်မှတွေ့ပြီး ပြောဖူးဆိုဖူးတာ ရှိတယ်။ အခုလည်း ပထမဆုံးအကြိမ်ရောက်တာပဲ။ သူ့အမေ ခေါ်သွားလို့ တက်လိုက်သွားတာ။ သူက ကင်းကင်းရှင်းရှင်းနေတယ်။ အသောက်အစားလည်း မရှိ၊ မူးယစ်ဆေးဝါးလည်း မရှိ၊ ကွမ်းလည်းမစား၊ ဆေးလိပ်လည်း မသောက်တတ်ဘူး။ ကျွန်တော်တို့ အိမ်ထဲကို ဝင်မကြည့်ရဘူး။ ဆိုင်ကယ်က အိမ်နောက်မှာပဲ ရှိနေတယ်။ အိမ်ထဲကို ရဲတွေပဲ ဝင်တယ်။ တစ်ယောက်မှ ပေးမဝင်ဘူး။ ရွာသားတွေလည်း ပေးမဝင်ဘူး။ အဲဒီနေရာက လမ်းအရမ်းပြတ်တယ်။ တော်ရုံလူ မနေရဲလောက်ဘူး” ဟု အခင်းဖြစ်နေအိမ်၌ မိသားစုသုံးဦးစလုံး အသတ်ခံထားရသည်ကို စတင်တွေ့ရှိခဲ့သည့် ကိုအောင်ကေျာ်ထွန်း၏ ဦးလေးတော်စပ်သူ ကိုညိုမင်းက ထိုနေ့က အဖြစ်အပျက်ကို ပြောပြသည်။

ကိုအောင်ကျော်ထွန်းအနေဖြင့် မီးရထားဝန်ထမ်းအဖြစ် တာဝန်ထမ်းဆောင်နေသည်မှာ ခြောက်နှစ်ခန့်ရှိပြီဖြစ်ပြီး ယခင်က ထားဝယ်ဘူတာကြီးဖြစ်သည့် ဇလွန်းကျေးရွာရှိ ဘူတာနှင့် ဆိပ်ကမ်းဘူတာတို့တွင် တာဝန်ထမ်းဆောင်ခဲ့ပြီးနောက် လွန်ခဲ့သည့် သုံးနှစ်ခန့်မှစတင်ကာ လက်ရှိတာဝန်ကျသည့် ဥသာရံကျေးရွာအနီး ထားဝယ်-ရေး လမ်းပိုင်း မိုင်တိုင်အမှတ် ၂၃/၄ ရှိကားလမ်းမပေါ်မှ ရထားသံလမ်းဖြတ်ထားသည့်နေရာတွင် ရထားလမ်းဂိတ်စောင့်အဖြစ် တာဝန်ထမ်းဆောင်နေခြင်းဖြစ်သည်ဟု မိသားစုဝင်များက ပြောသည်။ မွေးချင်းမောင်နှမ ငါးဦးရှိပြီး ဒုတိယမြောက်ဖြစ်သည့် ကိုအောင်ကျော်ထွန်း၌ အသက် ငါးနှစ်အရွယ်နှင့် တစ်နှစ်ကျော်အရွယ်သား နှစ်ဦးရှိပြီး ငါးနှစ်အရွယ်သား တစ်ဦးမှာ ယခင်က မိသားစုနေထိုင်သည့် အခင်းဖြစ်ပွားရာ နေအိမ်သို့ ဖခင်ဖြစ်သူက ခေါ်သွားလေ့ရှိသော်လည်း လူသတ်မှုဖြစ်ပွားသည့်နေ့ က ထားဝယ်မြို့ရှိ အဘွားဖြစ်သူ၏နေအိမ်တွင် ကျန်ရစ်ခဲ့ကြောင်း သိရသည်။

အဆိုပါပန်းရောင်အိမ်ကလေးအတွင်း မိသားစုသုံးဦးစလုံး အသတ်ခံရကြောင်း တွေ့ရှိပြီးနောက် ရဲတပ်ဖွဲ့ကို အကြောင်းကြားခဲ့ပြီး လိုအပ်သည့်စစ်ဆေးမှုများ ပြုလုပ်ကာ ပရဟိတအဖွဲ့များ၏ လူနာတင်ယာဉ်များဖြင့် ရေဖြူမြို့ရှိ ပြည်သူ့ဆေးရုံရင်ခွဲရုံသို့ ပို့ဆောင်ခဲ့သည်။

“ ကျွန်တော်တို့ဆီ သတင်းဝင်လာတာက ည ၁၁ နာရီ ၁၆ လောက်မှာပါ။ ဟိုရောက်တော့ ၁၁ နာရီခွဲပေါ့။ ထားဝယ်ကနေ ၂၃ မိုင်ရုံးကနေဆို ကိုးမိုင်ကျော်ကျော်လေးပေါ့။ ဥဿရံ မီးရထားလမ်းကျော်လိုက်တာနဲ ့ ညာဘက်တောင်ကုန်းတက်ကလေးက အိမ်ပါ။ မီးရထားဝန်ထမ်း အဆောက်အအုံပါ။ အသတ်ခံရတဲ့သူက ရထားသံလမ်းစောင့်ပေါ့။ ဟိုမှာက မိသားစုသုံးယောက်စလုံးက ပက်လက်လန်နေတဲ့ အနေအထားနဲ့ သေနေတယ်။ ကလေးကတော့ မှောက်လျက်ကလေးပါ။ အမျိုးသားကတော့ ဘောင်းဘီတိုနဲ ့အကျႌမပါဘူး။ အမျိုးသမီးကတော့ အကျႌအဝတ်အစား အပြည့်အစုံပါပဲ။ ယောကျ်ားမှာက လည်ပင်းပြတ်ရှဒဏ်ရာ၊ ကလေးမှာလည်း လည်ပင်းမှာပဲ။ အမျိုးသမီးမှာက ဗိုက်မှာရယ် နဖူးမှာရယ်။ သူတို ့အသတ်ခံရတာ အိမ်ထဲမှာပဲ။ အခန်းဖွဲ့ထားတာ မရှိဘူး။ ကျွန်တော်တို့ကတော့ သွားကူညီပြီး အလောင်းတွေသယ်ပြီးတော့ ရေဖြူဆေးရုံရင်ခွဲရုံကို ပို့ပေးခဲ့တယ်” ဟု အခင်းဖြစ်နေရာသို ့သွားရောက်ကူညီခဲ့သည့် မြင့်မြတ်ရေဖြူ ပရဟိတအသင်းမှ အဖွဲ့ဝင်တစ်ဦးက ပြောသည်။

အသတ်ခံရသည့် မိသားစုနေထိုင်သည့်နေအိမ်မှာ ထားဝယ်-ရေး လမ်းမပေါ်ရှိ မိုင်တိုင် ၂၃ မိုင်အနီး ဥဿရံကျေးရွာမှ လေးဖာလုံခန့်အကွာတွင်ရှိပြီး လူသူပြတ်တောက်သည့်နေရာဖြစ်သည့်အပြင် အနီးဝန်းကျင်၌ နေအိမ်များမရှိဘဲ အသတ်ခံရသည့် မိသားစုနေထိုင်သည့် နေအိမ်တစ်လုံးသာရှိကြောင်း ဆိုသည်။ အသတ်ခံရသည့်မိသားစုဝင် သုံးဦးကို မြင့်မြတ်ရေဖြူပရဟိတအသင်းနှင့် ပုဂေါဇွန်းဇမ္ဗူအရိပ်ပရဟိတအသင်းတိုမှ လူနာတင်ယာဉ် သုံးစီးဖြင့် သွားရောက်သယ်ယူပြီး ရေဖြူဆေးရုံရင်ခွဲရုံသို့ ပို့ဆောင်ပေးခဲ့သည်။

“ အခင်းဖြစ်အနေအထားက မိသားစု သုံးယောက်စလုံးကို သတ်သွားတာဗျ။ ယောကျ်ားကိုတော့ လည်ပင်းကို လှီးသွားတယ်။ အမျိုးသမီးကိုတော့လည်း လည်ပင်းကို ထိုးသွားတယ်။ ဝမ်းဗိုက်ကိုလည်း ဓားနဲ့ ထိုးသွားတယ်။ ကလေးကိုလည်း လည်ပင်းလှီးသွားတယ်။ ကလေးက မှောက်လျက်သေသွားတယ်။ အသက်ကတော့ ၃၀ ဝန်းကျင်တွေပါ။ ကလေးကတော ့တစ်နှစ်ကျော်ပေါ့။ ယောကျ်ားလေး။ အသတ်ခံရတဲ့ အမျိုးသားက မီးရထားဝန်ထမ်းဂိတ်စောင့်ပေါ့။ သူတို့နေတဲ့နေရာက ရွာနဲ ့အတော်ဝေးတယ်။ လူတော်တော်ပြတ်တယ်ဗျ။ သိတဲ့အချိန်ကို ၁၀ နာရီကျော်သွားပြီ။ အိပ်ချိန်လို ဖြစ်နေတာပေါ့။ အသတ်ခံရတာကို ဘယ်လိုစသိလဲဆိုတော့ သူ့ (အသတ်ခံရသူအမျိုးသား)ရဲ့ အမေဘက်က သူ့သားဆီ ဖုန်းဆက်တာမကိုင်လို ့အရင်ဆုံးဆိုင်ကယ်နဲ့ လာပြီး ကြည့်တယ်ပေါ့။ ဒီရောက်တော့ တံခါးကြီးက အပြင်ကနေ သော့ခတ်ထားတယ်။ သော့ခတ်ထားလို့ အပေါက်ကနေ ဖုန်းမီးနဲ ့ချောင်းကြည့်တော့ သွေးတွေနဲ ့သေနေတာတွေ့တော့ အနီးအနားက လူတွေကို သွားအကူအညီတောင်းတာ။ အနီးအနားက လူတွေရောက်လာတော့ ရဲစခန်းကို ဖုန်းဆက်တယ်။ ကျွန်တော်တို့ ကြားကြားချင်းလိုက်သွားတော့ တံခါးက သော့ခတ်ထားလို့မဖြစ်ဘူး။ တကယ်လို့ အသက်ငွေ့ငွေ့လေး ကျန်ရင်တောင် မီကောင်းတယ်ဆိုပြီး တံခါးကို ရိုက်ဖျက်ပြီးဝင်လိုက်တာ။ အကုန်လုံးက အေးနေပြီ။ (သေတာ) တော်တော်ကြာနေပြီ။ ကျွန်တော်တို့ ခန့်မှန်းတာတော့ ညဦးပိုင်းမှောင်ရီပြိုးချိန် ည ၇ နာရီဝန်းကျင်လောက် ထင်တာပဲ။ ဘာလို့လဲဆိုတော့ အရမ်းကြီးလင်းနေတဲ့အချိန် မဖြစ်နိုင်ဘူးလေ။ လမ်းဘေးမှာလေ။ ပစ္စည်းယူတာ ဘာမှမရှိဘူး” ဟု အမှုနှင့်ပတ်သက်၍ စုံစမ်းစစ်ဆေးနေသည့် ရေဖြူမြို့မရဲစခန်းမှ တာဝန်ရှိသူ ရဲအရာရှိတစ်ဦးက ပြောကြားသည်။ မီးရထားဝန်ထမ်း မိသားစုသုံးဦးစလုံးကို သတ်သွားသည့်အနေအထားမှာ ရန်ငြိုးကြောင့် ဖြစ်နိုင်ကြောင်း လောလောဆယ်သုံးသပ်ထားပြီး အခင်းဖြစ်နေအိမ်ရှိ ပစ္စည်းများနှင့် ဆိုင်ကယ်ကို ယူဆောင်သွားခြင်း မရှိခဲ့ကြောင်း၊ လက်ရှိတွင် အသတ်ခံရသည့် အမျိုးသားနှင့် ပေါင်းသင်းမှု ရှိသူများကို စုံစမ်းနေပြီး တရားခံဖြစ်သူအား ဖမ်းဆီးရမိခြင်းမရှိသေးကြောင်း ၎င်းက ဇွန် ၁၄ ရက်တွင် ဆိုသည်။ အသတ်ခံရသည့်အနေအထားမှာ ရုန်းရင်းဆန်ခတ်ဖြစ်ပွားခဲ့သည့် အေနအထားမရှိသည့်အပြင် အသတ်ခံရသူ သုံးဦးစလုံးအား သေစေနိုင်သည့်နေရာများကိုသာ ဓားဖြင့်ထိုးသတ်သွားခဲ့သောကြောင့် လူသတ်တရားခံမှာ သွေးအေးအေးဖြင့် သတ်သွားသည့် အနေအထားရှိပြီး တရားခံမှာ တစ်ဦးထက်ပိုနိုင်ကြောင်း သုံးသပ်မှုများလည်း ရှိနေသည်။

ကိုအောင်ကျော်ထွန်းတို့ မိသားစုဝင်သုံးဦး၏ ရုပ်အလောင်းကို ဆေးရုံ၌ စစ်ဆေးပြီးနောက် ဇာတိဖြစ်သည့် ထားဝယ်မြို့ ကျောက်မော်ရပ်ကွက်ရှိ ရပ်ကွက်ဇရပ်တွင် နာရေးအခမ်းအနား ပြုလုပ်ထားသည်ကို တွေ့ရသည်။ ကျန်ရစ်သော ရုပ်အလောင်းများကို ထားဝယ်မြို့ ဇဟာသုသာန်၌ ဇွန် ၁၆ ရက် မွန်းလွဲပိုင်းတွင် မီးသဂြုႋဟ်ခဲ့သည်။ ထားဝယ်မြို့ပေါ်မှ လူအများအပြား သုသာန်သို့ လိုက်ပါပို့ဆောင်ကြသည်။

“ နေထိုင်တာကလည်း အေးအေးဆေးဆေးပဲ။ အသုဘကို ဥဿရံကရော သက်ကယ်ကွက်ရွာက ရွာသားတွေလည်း လာကြတယ်။ ရွာသားတွေလည်း ဘာဖြစ်လို့ ဒီလိုအသတ်ခံရလဲဆိုတာ အ့ံသြနေကြတယ်။ သူက သူမုန်းအောင်လုပ်တဲ့သူလည်း မဟုတ်ဘူး။ အနီးအနားက ရွာသားတွေလည်း သူ့အတွက် ဝမ်းနည်းနေကြတယ်” ဟု ကိုအောင်ကျော်ထွန်း၏ အဒေါ်ဖြစ်သူက ဆိုသည်။

ထို့ပြင် “သူပြောနေဆိုနေတဲ့ အနေအထားကတော့ ကျွန်မတို့အနေနဲ့ဆိုရင်တော့ ကောင်းတယ်။ သူအသတ်မခံရခင် သူ့ကိုဘယ်သူက သတ်ဖို ့ဘာလုပ်ဖို ့ခြိမ်းခြောက်တာ ခံနေရတယ်လို ့ပြောဖူးတာမရှိဘူး။ သူက ပျော်ပွဲရွှင်ပွဲတွေမှာ ဆင်ကမယ်။ တရုတ်ဘုံံကျောင်းမှာဆို တိုးနယား ကမယ်။ ဒါတွေတော့ အတော်လေး ပြောတယ်။ မီးရထားဝန်ထမ်းလည်း လုပ်တယ်။ အလုပ်အားနေရင် အနီးအနားက အခြားကျပန်း အလုပ်တွေလည်း လုပ်တယ်။ သူ့ကို ဘာခိုင်းခိုင်း အကုန်လုပ်ပေးတယ်။ ကူညီပေးတယ်။ အရက်လည်း မသောက်တတ်ဘူး။ ကွမ်းလည်းမစား၊ ဆေးလိပ်လည်း မသောက်တတ်ဘူး” ဟု အဒေါ်ဖြစ်သူက ဆက်ပြောပြသည်။ အသတ်ခံရသည့်အနေအထားမှာ အသက် ၂၆ နှစ်အရွယ် ကိုအောင်ကျော်ထွန်းတွင် ညာဘက်ချိုင်းအောက် ထိုးသွင်းဒဏ်ရာတစ်ချက်နှင့် လည်ပင်းပြတ်ရှိဒဏ်ရာ တစ်ချက်၊ ဇနီးဖြစ်သူ မခင်ဖြိုးဝေ (၂၈ နှစ်) ၌ ဝမ်းဗိုက်တွင် ထိုးသွင်းဒဏ်ရာ နှစ်ချက်၊ ရင်အုံတွင်ထိုးသွင်းဒဏ်ရာ နှစ်ချက်နှင့် လည်ပင်းပြတ်ရှဒဏ်ရာ တစ်ချက်၊ အသက်တစ်နှစ်ကျော်အရွယ် ကလေးငယ်၌ နောက်ကျောဘက်ထိုးသွင်းဒဏ်ရာ တစ်ချက်နှင့် လည်ပင်းပြတ်ရှဒဏ်ရာ တစ်ချက်တို့ဖြင့် သေဆုံးခဲ့ခြင်းဖြစ်ကြောင်း တိုင်းဒေသကြီးရဲတပ်ဖွဲ့မှ ရဲအရာရှိကြီးတစ်ဦးက ပြောသည်။

ယင်းအမှုနှင့်ပတ်သက်၍ တိုင်းဒေသကြီး ရဲတပ်ဖွဲ့မှူးကိုယ်တိုင် အနီးကပ်ကြီးကြပ်ကာ အမှုစစ်အဖွဲ့ကို ဖွဲ့စည်းပြီး CID နှင့် အခြားကျန်ရှိသည့် ရဲတပ်ဖွဲ့အင်အားဖြည့်တင်း၍ တရားခံကို စုံစမ်းထောက်လှမ်း ရှာဖွေနေကြောင်း၊ မကြာမီအချိန်တွင် တရားခံဖြစ်သူကို ဖော်ထုတ်ဖမ်းဆီးနိုင်လိမ့်မည်ဟု ၎င်းက ဆိုသည်။ အဆိုပါ သုံးလောင်းပြိုင်လူသတ်မှုနှင့် ပတ်သက်၍ ရေဖြူမြို့မ ရဲစခန်းက (ပ)၂၈ /၂၀၂၀ ရာဇသတ်ကြီးပုဒ်မ ၃၀၂ ဖြင့် အမှုဖွင့်လှစ်ထားသည်။ လက်ရှိ သုံးလောင်းပြိုင်လူသတ်မှုဖြစ်စဉ်မှာ ထားဝယ်ဒေသအတွင်း မကြားဖူး မကြုံဖူးသည ့်ရက်စက်လှသော လူသတ်မှုတစ်ခုဖြစ်သောကြောင့် ဒေသခံများအကြား စိုးရိမ်ထိတ်လန့်မှု ကြီးစွာဖြစ်ပေါ်နေကြသည်။

တရားခံဖြစ်သူကို အမြန်ဆုံး ဖော်ထုတ်ဖမ်းဆီးပေးရန် အလိုရှိနေကြသည်။ ပြီးခဲ့သည့် ၂၀၁၆ ခုနှစ် နိုဝင်ဘာလ ၁၉ ရက်ညက ထားဝယ်မြို့ရှိ ရွှေဝယ်သီရိအားကစားရင်ပြင်၌ သီချင်းဆိုပြိုင်ပွဲ ပြုလုပ်နေစဉ် ပြိုင်ပွဲကျင်းပရာ စင်နံဘေးရှိဘောလုံးကွင်းအစပ်၌ ဒေသခံများ အရေးလုပ်ဆောင်နေသူ အသက် ၂၂ နှစ်အရွယ် နော်ချစ်ပန်းတိုင်မှာ လည်ပင်းထိုးသွင်း ဒဏ်ရာ၊ မျက်နှာပြတ်ရှဒဏ်ရာများဖြင့် အသတ်ခံခဲ့ရသည့် ဖြစ်စဉ်ရှိခဲ့ဖူးသည်။ ယင်းဖြစ်စဉ်အတွက် ရဲတပ်ဖွဲ့က တရားခံဖြစ်သူကို အပူတပြင်း ရှာဖွေစုံစမ်းဖော်ထုတ်ခဲ့သော်လည်း ယနေ့အထိ တရားခံကို မဖော်ထုတ်နိုင်ခဲ့ပေ။ ထိုကဲ့သို့ဖြစ်စဉ်များ ရှိခဲ့ဖူးသောကြောင့် လက်ရှိ သုံးလောင်းပြိုင်လူသတ်မှုအပေါ် ရဲတပ်ဖွဲ့၏ လုပ်ဆောင်မှုကိုဒေသ ခံများ စောင့်ကြည့်နေကြသည်။ အ သတ်ခံရသူများ၏မိသားစုဝင်များ ကလည်း တရားခံကိုအမြန်ဆုံးဖမ်းမိစေရန် ဆန္ဒရှိနေကြသည်။

သုံးလောင်းပြိုင်လူသတ်မှု အခင်းဖြစ်သည့်နေအိမ်သို့ ဇွန် ၁၆ ရက် ညနေပိုင်းက စာရေးသူတို့ သွားရောက် ကြည့်ရှုခဲ့သည်။ အနေအထားအရ အခင်းဖြစ်နေအိမ် အနီးဝန်းကျင်တွင် နေအိမ်များမရှိဘဲ တစ်ဖာလုံခန့်အကွာတွင်မူ နေအိမ်နှစ်လုံးရှိနေသည်ကို တွေ့ရသည်။ အခင်းဖြစ်နေအိမ်အနီးမှ ကားလမ်းမပေါ်တွင် ညနေပိုင်း၌ ယာဉ်အသွားအလာ ပြတ်တောက်မှု သိပ်မရှိ။ ပန်းရောင်အိမ်ကလေးပေါ် အတက်လှေကားခြေရင်းတွင် မိန်းမစီး ဖိနပ်နှစ်ရံ၊ ယောကျ်ားစီး ဖိနပ်တစ်ရံနှင့် ကလေးစီး ဖိနပ်တစ်ရံ ရှိနေသည်။ နေအိမ်အဝင်ဝတွင် အကျႌများ လှန်းထားပြီး တံခါးကို သစ်သားချောင်းဖြင့် ပိတ်ထားသည်။ အိမ်အောက်တွင်မူ ကလေးကစားစရာများ ပြန့်ကြဲနေသည်ကို တွေ့ရသည်။ တစ်ချိန်က ကလေးငယ်ဆော့ကစားသံ၊ ရယ်မောသံများဖြင့် သာယာအေးချမ်းခဲ့ဖူးသည့် ပန်းရောင်အိမ်ကလေးက ငိုညည်းသံများဖြင့်သွေးပျက်ဖွယ်ညတစ်ည၏ အလွန်တွင် တိတ်ဆိတ်ခြောက်ကပ်နေသည့် အိမ်တစ်လုံးအဖြစ် အသွင်ပြောင်း သွားခဲ့ချေပြီဖြစ်သည်။ အိမ်အနီးရှိ မီးရထားသံလမ်းကြီးနှင့် ဂိတ်တံခါးမောင်းတံကြီးမှာ ထိန်းသိမ်းမည့် အစောင့်မရှိတော့ဘဲ ငြိမ်သက်နေသည်။ အသက်သွင်းပေးမည့်သူ မရှိတော့သည့် ပန်းရောင်အိမ်ကလေးမှာလည်း ဇွန်လ၏ မိုးဖွဲများကြားတွင် အသက်မဲ့ကာ တိတ်ဆိတ်နေသည်။