ဂျပန်အသင်းဂိုးသမား ကာဝါရှီးမားက ယနေ့ ညကစားမည့် ပိုလန်အသင်းနှင့်အုပ်စုနောက်ဆုံးပွဲစဉ်တွင် အသင်းဖော်များကိုပြန်ကူညီသွားမည်ဟု ယင်းပွဲမတိုင်မီ သတင်းစာရှင်းလင်းပွဲတွင် ပြောကြားခဲ့သည်။ အသက် (၃၅)နှစ်ရှိဝါရင့်ဂိုးသမား ကာဝါရှီးမားသည် ပြီးခဲ့သည့်ဆီနီဂေါအသင်းနှင့် (၂-၂) ဂိုးသရေကျသောပွဲစဉ်တွင် အမှားအယွင်းတချို့ပြုလုပ်ခဲ့ခြင်းကြောင့် ဆီနီဂေါတောင်ပံတိုက်စစ်ကစားသမား မာနေ၏ အဖွင့်ဂိုးကိုခွင့်ပြုခဲ့ ရသည်။ သို့ရာတွင် ယနေ့ညကစားမည့်ပိုလန်အသင်းနှင့်ပွဲစဉ်တွင် ဂျပန်အသင်းနည်းပြ နီရှီနိုက ၎င်းအားပွဲထွက်အသုံးပြုဖွယ်ရှိနေရာ အသင်းဖော်များကိုပြန်ကူညီပြီး ဂျပန်အသင်းနောက်တစ်ဆင့်တက်ရေး အစွမ်းကုန်ကြိုးစားပေးသွားမည်ဟု ဆိုခဲ့ခြင်းဖြစ်သည်။
Photo: AFP
ကာဝါရှီးမားက " ပြီးခဲ့တဲ့ဆီနီဂေါအသင်းနဲ့ ပွဲစဉ်မှာ ကျွန်တော့်ကိုကူညီခဲ့တဲ့အသင်းဖော်တွေကြောင့် အရမ်းဝမ်းသာပီတိဖြစ်ခဲ့ရပါတယ်။ အဲဒါကြောင့် အခုအချိန်မှာ သူတို့ကိုပြန်ကူညီပေးချင်ပါတယ်။ ဂျပန်အသင်းကို ကိုယ်စားပြုခွင့်ရတဲ့အချိန်တိုင်း ဝေဖန်မှုတွေကိုရင်ဆိုင်အသင့်ပါပဲ။ ဒါပေမဲ့ ပြီးခဲ့တဲ့ပွဲကလိုမျိုး ထပ်မမှားဖို့တော့ ကျွန်တော်ပြင်ဆင်သွားရမှာပါ'' ဟုပြောကြားခဲ့သည်။
Photo: AFP
ဂျပန်အသင်းသည် ယနေ့ညကစားမည့် ပိုလန်အသင်းနှင့်ပွဲစဉ်တွင် သရေကစားနိုင်ပါက (၁၆)သင်းအဆင့်သို့ အသင်းသမိုင်းတစ်လျှောက် (၃)ကြိမ်မြောက် တက်ရောက်နိုင်မည်ဖြစ်ကြောင်း သိရသည်။ ကာဝါရှီးမားသည် ဂျပန်အသင်းအတွက် (၈၆)ပွဲပါဝင်ကစားပေးထားပြီး အိုကာဇာကီ၊ ဟာဆီဘီ၊ နာဂါတိုမို၊ ဟွန်ဒါ၊ ကာဂါဝါတို့ပြီးနောက် လက်ရှိက စားမားများထဲတွင် ပွဲအများဆုံးကစားထားသူဖြစ်သည်။
