ရှစ်လေးလုံးပါတီအား ရှစ်လေးလုံးပြည်သူ့ပါတီ အမည်ပြောင်းလဲကာ ဧပြီ ၆ ရက်တွင် နေပြည်တော် ပြည်ထောင်စုရွေးကောက်ပွဲကော်မရှင်တွင် ပြန်လည်မှတ်ပုံတင်လျှောက်ထားခဲ့သည်။
ဦးကိုကိုကြီးအပါအဝင် ပါတီတည်ထောင်လိုသူများက နိုင်ငံရေးပါတီတစ်ရပ်အား ရှစ်လေးလုံးပါတီအမည်ဖြင့် ပါတီမှတ်ပုံတင်ခြင်းကို ၂၀၁၇ ခုနှစ် ဒီဇင်ဘာ ၁၉ ရက်တွင် လျှောက်ထားခဲ့သည်။
ထို့နောက် ရှစ်လေးလုံးပါတီအမည် အသုံးပြုခြင်းနှင့်ပတ်သက်၍ ပြည်ထောင်စုရွေးကောက်ပွဲကော်မရှင် ဥက္ကဋ္ဌအပါအဝင် အဖွဲ့ဝင်များနှင့် ဦးကိုကိုကြီးဦးဆောင်သော ပါတီတည်ထောင်လိုသူများ မတ် ၂၆ ရက်က နေပြည်တော်ရှိ ပြည်ထောင်စုရွေးကောက်ပွဲကော်မရှင်ရုံးတွင် တွေ့ဆုံဆွေးနွေးခဲ့သည်။
ထိုသို့ဆွေးနွေးရာတွင် ပြည်ထောင်စုရွေးကောက်ပွဲကော်မရှင်အနေဖြင့် ပါတီအမည်အား အသုံးပြုခြင်းမပြုရန် ပြောဆိုခြင်းမပြုသော်လည်း ပါတီအမည်အပေါ် ကန့်ကွက်မှုနှင့် အငြင်းပွားမှုများ ဖြစ်ပေါ်နိုင်မည်လားဆိုသည့် အခြေအနေပေါ်တွင် ဆွေးနွေးခဲ့ကြောင်း သိရသည်။
ယင်းနောက် အဆိုပါအမည်ကိစ္စရပ်နှင့်ပတ်သက်၍ ဧပြီ ၁ ရက်က ရန်ကုန်မြို့၌ ပါတီဖြစ်မြောက်ရေးကော်မတီဝင်များ စုံညီအစည်းအဝေးကျင်းပခဲ့ပြီး ပါတီအမည်အား ‘ရှစ်လေးလုံးပြည်သူ့ပါတီ’ ဟု အမည်ပြောင်းလဲ၍ မှတ်ပုံတင်ရန်ဆုံးဖြတ်ခဲ့သည်။
“နာမည်ကို နည်းနည်းပြန်လည်ဖြည့်စွက်ဖို့ဆိုပြီးတော့ တိုင်းနဲ့ပြည်နယ် ၁၀ ခုကနေပြီးတော့ နာမည်တစ်ခုပြန်ရွေးတယ်ပေါ့။ အဲဒီရွေးတဲ့ဟာကို ပြန်လာတင်ပေးတာပါ။ တိုင်းနဲ့ပြည်နယ်အသီးသီးရဲ့ သူတို့စိတ်ထဲမှာရှိတဲ့ သူတို့အဆိုပြုတဲ့နာမည်တွေကို ကျွန်တော်တို့က မဲစနစ်နဲ့ရွေးခဲ့တာပါ။ နာမည်ပြောင်းလိုက်တာက ရှစ်လေးလုံးပြည်သူ့ပါတီဆိုပြီး ပြန်ပြောင်းတင်တာပါ။ ကျွန်တော်တို့က Vote နဲ့ အားလုံးနာမည်ခုနစ်ခု ထွက်လာတယ်။ ခုနစ်ခုမှာ အများဆုံးဖြစ်တဲ့ ပြည်သူ့ဆိုတဲ့ဟာကို ရွေးလိုက်တာ” ဟု ပါတီဖြစ်မြောက်ရေး ဗဟိုလုပ်ငန်းကော်မတီ ဘဏ္ဍာရေးတာဝန်ခံ ဦးမောင်မောင်လှိုင်က ပြောကြားသည်။
ထို့ပြင် ကြားဖြတ်ရွေးကောက်ပွဲတစ်ရပ်ကို ၂၀၁၈ ခုနှစ်အတွင်း ကျင်းပသွားရန်ရှိနေသည်။
ကြားဖြတ်ရွေးကောက်ပွဲကျင်းပရန် နီးကပ်သည့်အချိန်ကျမှသာ ပါတီမှတ်ပုံတင်ခွင့်ကျမည်ဆိုပါက နိုင်ငံရေးလှုပ်ရှားခွင့်အချိန်ကာလ အခက်အခဲရှိမည်ကိုစိုးရိမ်ကြောင်း ပါတီဖြစ်မြောက်ရေး ဗဟိုဦးဆောင်အဖွဲ့ဝင် ဦးမင်းဇေယျက ပြောကြားသည်။
