ကွန်ဂိုနိုင်ငံ၌ အီဘိုလာ ရောဂါ ကူးစက်ပြန့်ပွားမှုကြောင့် သေဆုံးသူ ၁,၀၀၀ ကျော်သွားပြီဖြစ်ကြောင်း အာဖရိက၏ ထိပ်တန်း ကျန်းမာရေးအဖွဲ့အစည်းက ထုတ်ပြန်ခဲ့သည်။

ပဋိပက္ခများ၊ ဒေသခံလူထု၏ ငြင်းဆန်မှုများနှင့် တုံ့ပြန်ဆောင်ရွက်မှု မညီမျှခြင်းတို့က ရောဂါပြန့်ပွားမှုကို ပိုမိုဆိုးရွာလာစေခဲ့သည့်အတွက် သမိုင်းတွင် အမြန်ဆုံး ကူးစက်ပြန့်ပွားသည့် အီဘိုလာ ရောဂါဖြစ်ပွားမှုအဖြစ် ဝမ်းနည်းဖွယ်ရာ သေဆုံးမှု အရေအတွက်သို့ ရောက်ရှိလာခဲ့သည်။

အာဖရိက ရောဂါထိန်းချုပ်ရေးနှင့် ကာကွယ်ရေးစင်တာ (Africa CDC) ၏ ညွှန်ကြားရေးမှူးချုပ် ဒေါက်တာ ယန်းကာဆီယာ က ဂါနာနိုင်ငံ၌ ဇူလိုင် ၂၂ ရက်က ပြုလုပ်သည့် ကျန်းမာရေး ထိပ်သီးအစည်းအဝေးတွင် ပြောကြားရာ၌ သေဆုံးသူ ၁,၀၃၁ ဦးရှိကြောင်း အတည်ပြုခဲ့သည်။

"ဒါဟာ လူတွေ သေဆုံးနေကြတာ ဖြစ်ပါတယ်။ ကာကွယ်ဆေး မရှိလို့၊ ဆေးဝါး မရှိလို့၊ ရန်ပုံငွေ မရှိလို့ သူတို့ သေဆုံးနေကြရတာပါ" ဟု ၎င်းက ထပ်လောင်းပြောဆိုခဲ့သည်။

ကွန်ဂို ကျန်းမာရေးဝန်ကြီးဌာန၏ နောက်ဆုံးရ သတင်းထုတ်ပြန်ချက်အရ ဇူလိုင် ၂၀ ရက်နေ့အထိ ယခု ကူးစက်ပြန့်ပွားမှုတွင် အတည်ပြုလူနာ ၂,၄၇၃ ဦး ရှိခဲ့သည်။ အနည်းဆုံး လူနာ ၇၃၇ ဦးကို သီးသန့်ခွဲခြားထားခြင်း သို့မဟုတ် ဆေးရုံတင်ထားခြင်းဖြစ်ကြောင်း သိရသည်။

မေလ ၁၅ ရက်နေ့တွင် စတင်ကြေညာခဲ့သည့် ယခု ရောဂါပြန့်ပွားမှုသည် ယခင် အီဘိုလာ ရောဂါဖြစ်ပွားမှု အများစုနှင့် မတူဘဲ ကူးစက်စေသည့် ဘွန်ဒီဘူဂျို ဗိုင်းရပ်စ်မျိုးကွဲအတွက် အတည်ပြုထားသော ကာကွယ်ဆေး သို့မဟုတ် ကုသဆေးများ မရှိသေးပေ။

ထို့ပြင် ယင်းသည် စံချိန်တင်ခဲ့ဖူးသည့် မည်သည့် ရောဂါပြန့်ပွားမှုထက်မဆို ပိုမိုမြန်ဆန်သော နှုန်းထားဖြင့် လူပေါင်းများစွာကို သေဆုံးစေခဲ့ပြီး ဖြစ်ပွားသူ ၂၈,၀၀၀ အနက် သေဆုံးသူ ၁၁,၀၀၀ ကျော်ရှိခဲ့သဖြင့် အဆိုးရွားဆုံးဟု သတ်မှတ်ခဲ့ကြသည့် ၂၀၁၃-၂၀၁၆ ခုနှစ် ရောဂါဖြစ်ပွားမှုကိုပင် ကျော်လွန်ခဲ့သည်။

အဆိုပါ ၂၀၁၃-၂၀၁၆ ရောဂါဖြစ်ပွားစဉ်က ပထမဆုံး လူနာမှ သေဆုံးသူ ၁,၀၀၀ ရောက်ရှိရန် ရှစ်လခန့် ကြာမြင့်ခဲ့သည်။

ကမ္ဘာ့ကျန်းမာရေးအဖွဲ့ (WHO) ကမူ ရောဂါပြန့်ပွားမှု၏ အမှန်တကယ် အတိုင်းအတာမှာ တရားဝင် ထုတ်ပြန်ထားသည့် ဂဏန်းများထက် နှစ်ဆမှ လေးဆအထိ ပိုမိုကြီးမားနိုင်ကြောင်း ပြောကြားခဲ့သည်။

ရောဂါ၏ ဗဟိုချက်ဖြစ်သော အချို့သော ဒေသခံအသိုက်အဝန်းများသို့ သွားရောက်ရန် ခက်ခဲနေဆဲဖြစ်ပြီး အဓိကအားဖြင့် သောင်းကျန်းသူအဖွဲ့များ ပါဝင်သည့် တိုက်ပွဲများကြောင့် ဖြစ်သည်။

အီဘိုလာ ရောဂါသည် ဖြစ်ပွားလေ့မရှိသော်လည်း ကူးစက်နိုင်ခြေ အလွန်မြင့်မားပြီး အော့အန်ခြင်း၊ သွေး သို့မဟုတ် သုက်ရည် ကဲ့သို့သော ခန္ဓာကိုယ်ထွက် အရည်များနှင့် ထိတွေ့မိခြင်းမှတစ်ဆင့် ကူးစက်နိုင်သည်။ ယင်းသည် ပြင်းထန်သော ရောဂါဝေဒနာကို ဖြစ်စေနိုင်ပြီး သေဆုံးသည်အထိ ဖြစ်စေနိုင်သည်။