အီရန်ဘောလုံးအဖွဲ့ချုပ်(FFIRI) ဥက္ကဋ္ဌ မာဒီတာ့ဂျ်က ကမ္ဘာ့ဖလားပြိုင်ပွဲကို လက်ခံကျင်းပမယ့်သူက အမေရိကန်သမ္မတ ဒေါ်နယ်ထရန့် မဟုတ်သလို အမေရိကန်နိုင်ငံလည်း မဟုတ်ဘဲ ကမ္ဘာ့ဘောလုံးအဖွဲ့ချုပ် (FIFA) သာဖြစ်ကြောင်း ဝေဖန်ပြောကြားခဲ့ပါတယ်။
မာဒီတာ့ဂျ်အပါအဝင် တခြားတာဝန်ရှိသူနှစ်ဦးဟာ ပြီးခဲ့တဲ့တစ်ပတ်က ကနေဒါနိုင်ငံ၊ ဗန်ကူးဗားမြို့မှာ ကျင်းပတဲ့ ဖီဖာကွန်ဂရက်ကို တက်ရောက်ဖို့အတွက် တိုရွန်တိုမြို့ရှိ လေဆိပ်ကို ရောက်ရှိလာပြီးမှ ဗီဇာငြင်းပယ်ခံရတာကြောင့် ပြန်လာခဲ့ရပါတယ်။
ဒါကြောင့် မာဒီတာ့ဂျ်က အမေရိကန်ကို သွားရောက်ယှဉ်ပြိုင်ရမယ့် ကမ္ဘာ့ဖလားခရီးစဉ်အတွက် အာမခံချက်ရှိရန်လိုကြောင်း ပြောကြားစဉ် အခုလို ထည့်သွင်းပြောကြားခဲ့ခြင်းဖြစ်ပါတယ်။
''ကျွန်တော်တို့ ခရီးစဉ်အတွက် အာမခံချက်တစ်ခု လိုပါတယ်။ အဲဒါက သူတို့အနေနဲ့ ကျွန်တော်တို့စနစ်ရဲ့ ပြယုဂ်တွေကို အထူးသဖြင့် IRGC (အီရန်တော်လှန်ရေးအစောင့်တပ်) ကို စော်ကားခွင့်မရှိဘူးဆိုတာပါပဲ။ ဒါက သူတို့အလေးအနက်ထား ဂရုစိုက်ရမယ့် ကိစ္စတစ်ခုပါ။ ကျွန်တော်တို့အနေနဲ့ ခြေစစ်ပွဲအောင်မြင်ထားတဲ့ ကမ္ဘာ့ဖလားပြိုင်ပွဲအတွက် သွားရမှာဖြစ်ပြီး ကျွန်တော်တို့ကို လက်ခံကျင်းပပေးမယ့်သူက ဖီဖာပဲ ဖြစ်ပါတယ်။ မစ္စတာထရန့် ဒါမှမဟုတ် အမေရိကန်မဟုတ်ပါဘူး။ သူတို့က ကျွန်တော်တို့ကို ဧည့်သည်အဖြစ် လက်ခံပေးမယ်ဆိုရင် ကျွန်တော်တို့ရဲ့ စစ်ဘက်ဆိုင်ရာအဖွဲ့အစည်းတွေကို ဘယ်လိုနည်းနဲ့မှ စော်ကားခွင့်မရှိဘူးဆိုတာလည်း လက်ခံရပါမယ်'' လို့ မာဒီတာ့ဂျ်က အစိုးရပိုင် IRIB ရုပ်သံကတစ်ဆင့် ပြောကြားခဲ့ပါတယ်။
