ဗိုလ်မှူးတစ်ဦးနှင့် အမျိုးသမီးနှစ်ဦးကို သူရဘွဲ့အပါအဝင်သူရဲကောင်းမှတ်တမ်းဝင်တံဆိပ် ခုနစ်ဦးနှင့် ရဲဗလဘွဲ့ ၃၂ ဦးချီးမြှင့်အပ်နှင်းကြောင်း အမျိုးသားကာကွယ်ရေးနှင့် လုံခြုံရေးကောင်စီက အမိန့်ကြော်ငြာစာအမှတ် ၅၇/ ၂၀၂၆ ဖြင့် ယနေ့(မတ် ၂၇ ရက်)တွင် ထုတ်ပြန်သည်။
ပြည်ထောင်စုသမ္မတမြန်မာနိုင်ငံတော်၊ ယာယီသမ္မတက နိုင်ငံတော်ကာကွယ်ရေးနှင့် လုံခြုံရေးတာဝန်များကို စွမ်းစွမ်းတမံထမ်းဆောင်ခဲ့သည့် ၄၂ ဦးအား ဂုဏ်ထူးဆောင်ဘွဲ့များ၊ ဂုဏ်ထူးဆောင်တံဆိပ်များကို ချီးမြှင့်အပ်နှင်းကြောင် အမိန့်စာတွင် ဖော်ပြထားသည်။
တပ်မတော်ဆိုင်ရာစွမ်းရည်သတ္တိဂုဏ်ထူးဆောင်ဘွဲ့ဖြစ်သည့် သူရဘွဲ့အား ကာကွယ်ရေးဝန်ကြီးဌာန ဗိုလ်မှူး ဇော်မျိုးနိုင်၊ ဒေါ်စန်းမော်အေးနှင့် ဒေါ်စနေမတို့အား ချီးမြှင့်အပ်နှင်းခဲ့သည်။
ထို့အတူ သူရဲကောင်းမှတ်တမ်းဝင်တံဆိပ်အား ကာကွယ်ရေးဝန်ကြီးဌာနမှ ဗိုလ်မှူး အောင်နိုင်မိုးလှိုင်၊ ဗိုလ်မှူး ရဲဇော်ထွန်း၊ ဗိုလ်မှူးရှားလူ၊ ဗိုလ်ကြီး မင်းကြည်ဟိန်း၊ ဗိုလ်သက်ပိုင်မြင့်၊ ဗိုလ်ပြည့်စုံအောင် ဒုတိယတပ်ကြပ် သူရိန်အောင်တို့ကို ချီးမြှင့်အပ်နှင်းခဲ့သည်။
အလားတူ မြန်မာနိုင်ငံရဲတပ်ဖွဲ့ဆိုင်ရာစွမ်းရည်သတ္တိဂုဏ်ထူးဆောင်တံဆိပ် ရဲဗလတံဆိပ်အား ကာကွယ်ရေးဝန်ကြီးဌာနမှ ငါးဦး၊ စစ်ကိုင်းတိုင်းဒေသကြီးမှ ခြောက်ဦး၊ မကွေးတိုင်းဒေသကြီးမှ ၂၁ ဦးတို့အား ချီးမြှင့်အပ်နှင်းခဲ့သည်။
