မန္တလေးသို့ သယ်ဆောင်ရောင်းချမည့် ၈ ဒသမ ၉၉၅ ဘီလျံတန်ဖိုးရှိ ဘိန်းဖြူနှင့် စိတ်ကြွဆေးပြားများ ဖမ်းဆီးရမိခဲ့ကြောင်း မြန်မာနိုင်ငံမူးယစ်ဆေးဝါးတားဆီးနှိမ်နင်းရေးအဖွဲ့ထံမှ သိရသည်။
နိုဝင်ဘာ ၆ ရက် ညနေ ၄ နာရီခွဲခန့်က ပုသိမ်ကြီးမြို့နယ်၊ ကျောက်ချောကျေးရွာအနီးတွင် ပြင်ဦးလွင်မှ မန္တလေးဘက်သို့ကျော်သူထိုက် မောင်းနှင်လာသော TOYOTA DYNA မော်တော်ယာဉ်အား သတင်းအရ စစ်ဆေးရှာဖွေခဲ့ရာ ယာဉ်ပေါ်မှ ဘိန်းဖြူ ၅၅ ကီလို(၎င်းဒေသတန်ဖိုးငွေကျပ် ၁ ဒသမ ၃၇၅ ဘီလျံ)နှင့် စိတ်ကြွဆေးပြား၅ ဒသမ ၈ သန်း(၎င်းဒေသတန်ဖိုးငွေကျပ် ၇ ဒသမ ၆၂ ဘီလီယံ)ဖမ်းဆီးရမိခဲ့သဖြင့် စုစုပေါင်း ၎င်းဒေသတန်ဖိုးငွေကျပ် ၈.၉၉၅ ဘီလီယံတန်ဖိုးရှိ မူးယစ်ဆေးဝါးများ ဖမ်းဆီးရမိခဲ့ကြောင်း သိရသည်။
စစ်ဆေးဖော်ထုတ်ချက်အရ နိုဝင်ဘာ ၇ ရက် နေ့လယ် ၁၁ နာရီခွဲတွင် မူးယစ်ဆေးဝါးများသယ်ဆောင်ရာ၌ပူးပေါင်းပါဝင်သူ အောင်ကြည်အား မတ္တရာမြို့နယ်၊ ကပိုင်ကျေးရွာတွင် လည်းကောင်း၊ နိုဝင်ဘာ ၁၄ ရက် ညနေ ၆ နာရီတွင် မူးယစ်ဆေးဝါးများအား တာဝန်ခံသယ်ဆောင်သူကျော်ကျော်မြိုင်(ခ)ကျော်ကြီးအား အမရပူရမြို့နယ်၊ မြစ်ငယ်တံတားအနီးတွင် လည်းကောင်း၊ နိုဝင်ဘာ ၁၆ ရက် နံနက် ၈ နာရီခွဲတွင် ဖမ်းဆီးရမိ မူးယစ်ဆေးဝါးများသယ်ဆောင်ရာ၌ပူးပေါင်းပါဝင်သူ ဝေယျာစိုး(ခ)ကိုတိုး အား ပြင်ဦးလွင်မြို့၊ ရပ်ကွက်ကြီး(၂၁)တွင် လည်းကောင်း အသီးသီးဖမ်းဆီးရမိခဲ့ကြောင်း သိရသည်။
ထို့ပြင် ကွင်းဆက်ဖော်ထုတ်ချက်အရ ဖမ်းဆီးရမိ မူးယစ်ဆေးဝါးများအား သယ်ဆောင်ခိုင်းသူမှာ ပြင်ဦးလွင်မြို့၊ ရပ်ကွက်ကြီး(၂၁)နေ မောင်ငယ်(ခ)စိုင်းမောင်ငယ်(ဖမ်းဆီးရန်ကျန်)ဖြစ်ပြီး
နောင်ချိုမြို့နယ်မှ မန္တလေးသို့ သယ်ဆောင်ရောင်းဝယ်ခြင်းဖြစ်ကြောင်း သိရှိရသဖြင့် ၎င်းတို့အား မူးယစ်ဆေးဝါးနှင့် စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အရေးယူထားရှိပြီးကွင်းဆက်ပြစ်မှုကျူးလွန်သူများအား ဆက်လက်ဖော်ထုတ်လျက်ရှိကြောင်း သိရသည်။
