မူးယစ်စိတ်ကြွဆေးပြားများ မှောင်ခိုကူးမှုတွင် အာရက္ခတပ်တော် (AA) အဖွဲ့ ပါဝင်ပတ်သက်ခဲ့ကြောင်း ဘင်္ဂလားဒေ့ရှ် နယ်ခြားစောင့်တပ်ဖွဲ့ (BGB) က စက်တင်ဘာ ၁၅ ရက်က ထုတ်ပြန်ခဲ့သည်။
"ဘင်္ဂလီ (မူရင်းတွင် ရိုဟင်ဂျာဟု ဖော်ပြ) တွေက ယာဘဆေးပြားတွေကို အဓိက မှောင်ခိုကူးသူတွေ ဖြစ်ပါတယ်။ သူတို့က မူးယစ်ဆေးတွေကို လျင်လျင်မြန်မြန် ရွှေ့ပြောင်းနေတာကြောင့် သူတို့ကို ဖမ်းမိဖို့ ခက်ခဲပါတယ်။ ကျွန်တော်တို့နိုင်ငံထဲက မသမာသူတစ်ချို့က သူတို့ရဲ့ အကျိုးစီးပွားအတွက် မြန်မာနိုင်ငံရဲ့ AA လက်နက်ကိုင်အဖွဲ့ဆီက မူးယစ်စိတ်ကြွဆေးပြားတွေကို ယူပြီး ဘင်္ဂလားဒေ့ရှ်နိုင်ငံထဲကို သွင်းနေကြပါတယ်" ဟု ဘင်္ဂလားဒေ့ရှ်၏ Ramu Sector တပ်မှူး ဗိုလ်မှူးကြီး မိုဟီဒူဒင် အာမက်က ကော့ဘဇားဟိုတယ်တွင် ပြုလုပ်သည့် သတင်းစာရှင်းလင်းပွဲတွင် ပြောကြားခဲ့သည်။
ထိုသတင်းစာရှင်းလင်းပွဲတွင် မကြာသေးမီက မူးယစ်ဆေးဝါးနှင့် လက်နက်များ ဖမ်းဆီးရမိခဲ့သည့် BGB ၏ အောင်မြင်မှုများကို အလေးထားဖော်ပြခဲ့ပြီး နယ်စပ်လုံခြုံရေးကို တိုးမြှင့်သည့် အစီအမံအသစ်များကိုလည်း ထုတ်ဖော်ပြောဆိုခဲ့သည်။
ကမ်းရိုးတန်းဒေသများတစ်လျှောက် မူးယစ်ဆေးဝါးမှောင်ခိုကူးမှုသည် ယခုအခါတွင် အကြီးဆုံး ခြိမ်းခြောက်မှုဖြစ်လာသည်ဟုလည်း မိုဟီဒူဒင်က ပြောကြားခဲ့သည်။
"Ukhiya-Teknaf နယ်စပ်တစ်လျှောက် စောင့်ကြည့်မှုတွေကို တင်းကျပ်ထားတာကြောင့် မှောင်ခိုသမားတွေဟာ ပင်လယ်ရေလမ်းကြောင်းတွေမှာ လှုပ်ရှာလာခဲ့ပါတယ်။ ဘင်္ဂလားဒေ့ရှ်နိုင်ငံထဲကို ဝင်လာတဲ့ မူးယစ်ဆေးဝါးစုစုပေါင်းရဲ့ ၈၀ ရာခိုင်နှုန်းနီးပါးက Maheshkhali ၊ Banshkhali ၊ Kutubdia ၊ Anwara နဲ့ Kuakata ကမ်းရိုးတန်းတွေက ဖြတ်သန်းပြီး ဝင်ရောက်လာခဲ့တာပါ။ အဲဒီလမ်းကြောင်းတွေကတစ်ဆင့် ဘင်္ဂလားဒေ့ရှ်နိုင်ငံတစ်ခုတည်းသာမကဘဲ အခြားနိုင်ငံတွေကိုလည်း မူးယစ်ဆေးတွေ မှောင်ခိုကူနေတာကြောင့် ကျွန်တော်တို့ရဲ့ လူငယ်တွေနဲ့ ကျွန်တော်တို့စီးပွားရေးအတွက် ဆိုးရွားတဲ့ ခြိမ်းခြောက်မှုတစ်ခုဖြစ်နေပါတယ်" ဟု မိုဟီဒူဒင်က ပြောကြားခဲ့သည်။
ညအမှောင်ထဲတွင် မြန်မာနိုင်ငံအတွင်းသို့ ဝင်ရောက်နေသည့် ဘင်္ဂလားဒေ့ရှ် ဆွဲပိုက်ချသင်္ဘောများ၏ လှုပ်ရှားမှုများကို ဖော်ပြထားသည့် ရေဒါရုပ်ပုံများကို ရိုက်ကူးထားသည့် ဓာတ်ပုံများကိုလည်း မိုဟီဒူဒင်က ပြသခဲ့သည်။
BGB ၊ ရေပတ်နှင့် ကမ်းခြေစောင့်တပ်ဖွဲ့များသည် မူးယစ်ဆေးဝါးမှောင်ခိုကူးမှုကို တားဆီးရန် ပူးပေါင်းဆောင်ရွက်နေသည်ဟုလည်း ၎င်းက ဆိုသည်။
မြန်မာအာဏာပိုင်များ၏ မကြာခဏ ဖမ်းဆီးထိန်းသိမ်းခြင်းကို ခံခဲ့ရသည့်ဘင်္ဂလားဒေ့ရှ် ငါးဖမ်းသမားများ၏ အရေးကိစ္စနှင့်ပတ်သက်ပြီး မိုဟီဒူဒင်က ပြောကြားခဲ့ရာတွင် ထိုငါးဖမ်းသမားများသည် မြန်မာ့ရေပြင်များအတွင်းသို့ ရည်ရွယ်ချက်ရှိရှိ သို့မဟုတ် မတော်တဆ ဝင်ရောက်ခဲ့ချိန်တွင် ဖမ်းဆီးခံခဲ့ရခြင်းဖြစ်သည်ဟု ဆိုသည်။
"AA က ဘင်္ဂလားဒေ့ရှ်ရေပြင်ထဲကိုဝင်ပြီး ငါးဖမ်းသမားတွေကို ဖမ်းဆီးခဲ့တဲ့ ဖြစ်စဉ်မျိုး ဘယ်တုန်းကမှ မရှိခဲ့ပါဘူး ကျွန်တော်တို့ကလည်း ကျွန်တော်တို့ရဲ့ ငါးဖမ်းသမားတွေကို ပင်လယ်ရေကြောင်းနယ်စပ်ကို မကျော်ဖို့ သတိပေးထားပါတယ်" ဟု မိုဟီဒူဒင်က ပြောကြားခဲ့သည်။
ဇူလိုင် ၁၅ ရက်ကတည်းက BGB သည် ကော့ဘဇား၏ နယ်စပ်ဒေသများနှင့် ဘန်ဒါဘန်မြို့၏ နေရာဒေသအချို့တွင် ယာဘဆေးပြား ၂၈၀၀၀၀၀ ခန့်နှင့် ရိုင်ဖယ်များ အပါအဝင် လက်နက် ၂၂ လက်ကို ဖမ်းဆီးရမိခဲ့သည်။
ဘင်္ဂလားဒေ့ရှ် အရန်စစ်တပ်၏ သီးခြားထုတ်ပြန်ချက်တွင် လွန်ခဲ့သည့် သုံးလအတွင်း ဖမ်းဆီးရမိသည့် လက်နက်များအနက် ပြည်တွင်းလုပ်နှင့် ပြည်ပလုပ် ပစ္စတိုသေနတ် ၁၆ လက်၊ revolver (ငါးလုံးပြူး၊ ခြောက်လုံးပြူးအစရှိသည့် ဆုံလည်သေနတ်) နှစ်လက်၊ submachine gun နှစ်လက်၊ ရိုင်ဖယ် ငါးလက်၊ လက်လုပ်သေနတ် ၁၆ လက်၊ ပြောင်းချောသေနတ် သုံးလက်၊ မော်တာကျည် သုံးလက်၊ လက်ပစ်ဗုံး ရှစ်လုံး၊ အခြားလက်နက်အမျိုးအစား ၂၇ မျိုး၊ ကျည်အိမ် ၂၁ ခုနှင့် ကျည်တောင့် ၁၀၀၃ တောင့်တို့ကို သိမ်းဆည်းရမိခဲ့ကြောင်း ဖော်ပြခဲ့သည်။
Ref: The Daily Star
