ဂျီရိုနာ - အလာဗတ်စ် (မြန်မာစံတော်ချိန် ဧပြီလ ၅ ရက် ည ၆:၃၀ နာရီ)
နှစ်သင်းစလုံး တန်းဆင်းဇုန်အန္တရာယ်ကလွတ်အောင် အတိမ်းအစောင်းခံလို့ မရသေးဘူး။ အလာဗတ်စ်က အန္တရာယ်နဲ့ ပိုနီးလို့ အမှတ်ရအောင် ကစားနိုင်ဖို့ ပိုအရေးကြီးနေတယ်။ အဝေးကွင်းမှာ အလာဗတ်စ် သတိထားကစားနိုင်လို့ ဂိုးအနည်းသရေပွဲ ဖြစ်သွားမယ်ထင်တယ်။
ရီးယဲလ်မက်ဒရစ် - ဗလင်စီယာ (မြန်မာစံတော်ချိန် ဧပြီလ ၅ ရက် ည ၈:၄၅ နာရီ)
ဗလင်စီယာကစားပုံ ပြန်တက်လာနေတယ်။ တန်းဆင်း ဇုန်ထဲကလည်း လွတ်လာနေပြီဆိုပေမဲ့ အဝေးကွင်းမှာတော့ အင်အားကြီးအသင်းတွေကို ရင်ဆိုင်နိုင်တဲ့ အစွမ်းမျိုးတော့ မရှိသေးဘူး။ ရီးယဲလ်မက်ဒရစ်က ပွဲကျပ်တွေဆက်နေတယ်ဆိုပေမဲ့ ရှိတဲ့အင်အားနဲ့ ဟန်မပျက်ရှေ့ဆက်နိုင်တုန်းပဲ။ တိုက်စစ်ပိုင်းကလည်း ဂိုးပိုမြူးလာသလို တွေ့ရတဲ့အပြင် အိမ်ကွင်းလည်းဖြစ်လို့ အတိမ်းအစောင်းမရှိအောင် ကစားပြဖို့ များနေတယ်။ အစဉ်အလာအရ အသာရလေ့ရှိတဲ့ ရီးယဲလ်ကို ရွေးထားလိုက်တယ်။ ဂိုးများမယ်။
မာယော့ကာ - ဆယ်လ်တာဗီဂို (မြန်မာစံတော်ချိန် ဧပြီလ ၅ ရက် ည ၁၁:၀၀ နာရီ)
ဒီနှစ်သင်းဆုံတိုင်း တစ်သင်းကို တစ်သင်း အနိုင်ရအောင် ခက်ခက်ခဲခဲကစားကြရလေ့ရှိတယ်။ အခုလည်း ခြေစွမ်းမကွာလို့ အကြိတ်အနယ်ရှိဦးမှာပါ။ မာယော့ကာတိုက်စစ်ပုံမှန်မရှိလို့ ဆယ်လ်တာကိုပဲ ရွေးထားချင်တယ်။ ဂိုးနည်းမယ်။
ဘာစီလိုနာ - ဘက်တစ် (မြန်မာစံတော်ချိန် ဧပြီလ ၆ ရက် နံနက် ၁:၃၀ နာရီ)
အက်သလက်တီကိုနဲ့ စပိန်ဘုရင့်ဖလားဗိုလ်လုပွဲတက်ရေးအဆုံးအဖြတ်ပွဲကစားအပြီး ဘက်တစ်နဲ့ ဆက်ရင်ဆိုင်ရတာက ဘာစီလိုနာအတွက် ရုပ်ပိုင်း၊ စိတ်ပိုင်းစိန်ခေါ်မှုများတဲ့ပွဲလို့ ပြောရမယ်။ ဘက်တစ်က ခုတလော ကစားပုံပြန်တက်နေတယ်။ အထူးသဖြင့် တိုက်စစ်ပိုင်းက အတော်လေးအားကောင်းပြီး ဂိုးတွေလည်း ရနေတယ်။ ဘာစီလိုနာကတော့ ပွဲကျပ်တွေကြား အလှည့်ကျလူထုတ်တာကို မဖြစ်မနေသုံးနေရတယ်။ ခံစစ်မှာလည်း ဒဏ်ရာပြဿနာတွေရှိလို့ ကြံ့ခိုင်မှုပုံမှန်မရှိနိုင်ဘူး။ ဒီပွဲက တိုက်စစ်အား ပြိုင်မယ့်ပွဲဖြစ်တယ်။ အစဉ်အလာအရ ဘာစီလိုနာကို ဦးစားပေးရမယ့်ပွဲ ဖြစ်နေတယ်။ ဂိုးများနိုင်တယ်။
