ဖယ်ခုံမြို့နယ်တွင် ဆရာ​တော်တစ်ပါးနှင့် ကပ္ပိယတစ်ဦးအား ​ဒေသခံ PDF အဖွဲ့က သတ်ဖြတ်မှုအ​ပေါ်မည်သည့်အကြောင်းဖြင့်ဖြစ်စေ လက်နက်ကိုင်အဖွဲ့က လက်နက်မရှိသူများကို သတ်ဖြတ်ခြင်းသည် စစ်ရာဇဝတ်မှုဖြစ်၍ ခြွင်းချက်မရှိအရေးယူပေးရန် ရှမ်းအရပ်ဘက်အဖွဲ့ ၁၇ ဖွဲ့​က မတ် ၂၃ ရက်တွင်  တောင်းဆိုချက်ထုတ်ပြန်သည်။

၂၀၂၅ ခုနစ် မတ် ၄ ရက်တွင် ဖယ်ခုံမြိုနယ် အုံတိုင်းကျေးရွာဘုန်းကြီးကျောင်း၌ သတ်ဖြတ်ခံခဲ့ရ သော ရွှေဓမ္မရောင်ခြည်သျှမ်းကျောင်းဆရာတော် ဦးဓမ္မသာရ(ခ) ဦးဇင်းပိန်နှင့် ကပ္ပိယ ကိုစိုင်းပီးတို့အား သတ်ဖြတ်သည်ဟု PDF အဖွဲ့တစ်ခုဖြစ်သော ပျားစစ်ကြောင်းမှ ဝန်ခံခဲ့ပြီးဖြစ်​ကြောင်း၊ ဒေသတွင်းရှိ သက်ဆိုင်ရာ အာဏာပိုင်အဖွဲ့အစည်းများအနေဖြင့် အဆိုပါအမှုဖြစ်စဉ်နှင့် ပတ်သက်၍ ရာဇဝတ်မှုကျူးလွန်ထားသူကို အရေးယူနိုင်ရေးအတွက် ကြိုးပမ်းလျက်ရှိသည်ဟု ကြားသိရပြီး မိမိတို့ သျှမ်းလူငယ်များမှလဲ တတ်စွမ်းသမျှ ပူးပေါင်းဆောင်ရွက်လျက်ရှိ​ကြောင်း ရှမ်းအရပ်ဘက်အဖွဲ့အစည်းများ၏ ထုတ်ပြန်ချက်တွင်ပါရှိသည်။

သို့ရာတွင်  NUG လက်အောက်ခံ ဖယ်ခုံမြိုပလဖ က ဖယ်ခုံမြို့ ဖယ်ခုံအင်းအရှေ့ဘက်ခြမ်း ကျေးရွာများမှ ဒေသခံပြည်သူများကို ပျားစစ်ကြောင်း၏ ဆရာတော်ကို သတ်ဖြတ်မှုလုပ်ရပ်သည် မှန်ကန်ကြောင်း ထောက်ခံလက်မှတ်များကို အဓမ္မ လိုက်လံ ကောက်ယူနေသည်ဟု မိမိတို့ကြားသိရ​ကြောင်း၊ ၎င်းလုပ်ရပ်သည် ဒေသခံပြည်သူများ၏ လုံခြုံရေးကို ခြိမ်းခြောက်ရာရောက်နေသည့်အပြင် အမှု ဖြစ်စဉ်အတွက် မလိုလားအပ်သော ရှုပ်ထွေးမှုများကိုပိုမိုဖြစ်ပေါ်လာစေနိုင်သည်ဟု မိမိတို့ရှုမြင်သဖြင့် သက်ဆိုင်ရာ နယ်မြေအာဏာပိုင်အဖွဲ့အစည်းများကိုအမှု၏ ဖြစ်စဉ်အမှန်ပေါ်ပေါက်ရေးအတွက် ဒေသခံများ၊ ဒေသတွင်းသို့ စစ်ရှောင်လာသော ပြည်သူများ၏ လုံခြုံရေးကို ကာကွယ်ပေးရန် ​တောင်းဆို​ကြောင်း ရှမ်းအရပ်ဘက်အဖွဲ့အစည်းများကဆိုသည်။

ထို့ပြင် မည်သည့်အကြောင်းပြချက်ဖြင့်ဖြစ်စေ လက်နက်ကိုင်ထားသော တပ်ဖွဲ့တစ်ခု၊ လူပုဂ္ဂိုလ်တို့မှ လက်နက် မရှိသော လူပုဂ္ဂိုလ်များကို သတ်ဖြတ်ခြင်းသည် စစ်ရာဇဝတ်မှုသာဖြစ်၍ ကျူးလွန်သူတို့ကို ခြွင်းချက်မရှိအရေးယူပေးရန်နှင့် စစ်ရာဇဝတ်မှုဖြစ်သည့်အတွက် စစ်ဥပဒေအရ သက်ဆိုင်ရာ အာဏာပိုင်အဖွဲ့အစည်းများမှ တာဝန်ယူ၍ အမှုကို တရားစွဲဆိုဆောင်ရွက်ပေးရန် ရှမ်းအရပ်ဘက်အဖွဲ့အစည်းများက ​တောင်းဆိုခဲ့သည်။

ထို့အတူ  အမှုမှန်မပေါ်ပေါက်မခြင်း ဒေသခံပြည်သူများ၏လုံခြုံရေးနှင့် အမှုတရားမျှတမှုဖြစ်စဉ်အတွက် ပျားစစ်ကြောင်း၏ လက်နက်များကို ဒေသတွင်းတာဝန်ရှိသူများမှ တာဝန်ခံ ထိန်းသိမ်းထားပေးပါရန်နှင့် NUG အနေဖြင့် မလိုလားအပ်သော လူမျိုးရေး၊ ဘာသာရေး ပဋိပက္ခများ မဖြစ်ပေါ်လာစေရေးအတွက် မိမိတို့ လက်အောက်ခံ ပလဖနှင့် တပ်ရင်းတပ်ဖွဲ့များ၏ လုပ်ရပ်ကို ထိန်းသိမ်းပေးရန် ရှမ်းအရပ်ဘက်အဖွဲ့အစည်းများက ​တောင်းဆိုထားသည်။